കാനഡയിലെ ഫെഡറൽ റൂറൽ കമ്മ്യൂണിറ്റി ഇമിഗ്രേഷൻ പൈലറ്റ് പദ്ധതിയുടെ ഭാഗമായ മാനിറ്റോബയിലെ മൂന്ന് പ്രധാന മേഖലകൾ 2026-ലേക്കുള്ള തങ്ങളുടെ മുൻഗണനാ വിഭാഗങ്ങൾ പ്രസിദ്ധീകരിച്ചു. ആൾട്ടോണ/റൈൻലാൻഡ്, ബ്രാൻഡൻ, സ്റ്റെയ്ൻബാക്ക് എന്നീ കമ്മ്യൂണിറ്റികളാണ് കുടിയേറ്റക്കാർക്കായി പുതിയ പട്ടിക പുറത്തുവിട്ടത്. ഈ പദ്ധതി വഴി കാനഡയിൽ സ്ഥിരതാമസത്തിന് അർഹത നേടുന്നതിന് പ്രസ്തുത കമ്മ്യൂണിറ്റികൾ അംഗീകരിച്ചിട്ടുള്ള ഒരു തൊഴിലുടമയിൽ നിന്നുള്ള തൊഴിൽ ഓഫർ നിർബന്ധമാണ്. ഓരോ മേഖലയും 25 പ്രധാന തൊഴിലുകളും ആറ് മുൻഗണനാ തൊഴിൽ മേഖലകളുമാണ് നിശ്ചയിച്ചിരിക്കുന്നത്.
ആൾട്ടോണ/റൈൻലാൻഡ് മേഖലയിൽ ഇത്തവണ ആരോഗ്യമേഖലയെ പുതുതായി മുൻഗണനാ പട്ടികയിൽ ഉൾപ്പെടുത്തിയിട്ടുണ്ട്. വിദ്യാഭ്യാസം, നിയമം, ട്രേഡ്സ്, ഗതാഗതം, നിർമ്മാണം എന്നിവയാണ് ഇവിടുത്തെ മറ്റ് പ്രധാന മേഖലകൾ. ഇവിടെ അപേക്ഷകൾ ആദ്യം വരുന്നവർക്ക് ആദ്യം എന്ന രീതിയിലാണ് പരിഗണിക്കുന്നത്. മാനിറ്റോബയിലെ രണ്ടാമത്തെ വലിയ നഗരമായ ബ്രാൻഡൻ, പ്രകൃതിവിഭവങ്ങളും കൃഷിയും എന്ന പുതിയ വിഭാഗം ഇത്തവണ കൂട്ടിച്ചേർത്തു. അതുപോലെ തന്നെ അതിവേഗം വളരുന്ന നഗരമായ സ്റ്റെയ്ൻബാക്കും കൃഷി, പ്രകൃതിവിഭവങ്ങൾ എന്നീ മേഖലകൾക്ക് ഇത്തവണ കൂടുതൽ പ്രാധാന്യം നൽകുന്നുണ്ട്.
ഈ പദ്ധതി വഴി അപേക്ഷിക്കാൻ കഴിഞ്ഞ മൂന്ന് വർഷത്തിനിടെ കുറഞ്ഞത് ഒരു വർഷത്തെ പ്രവൃത്തിപരിചയം ആവശ്യമാണ്. കൂടാതെ കാനഡയിലെ വിദ്യാഭ്യാസ യോഗ്യതയോ അല്ലെങ്കിൽ ഇ.സി.എ റിപ്പോർട്ട് സഹിതമുള്ള വിദേശ ബിരുദമോ ഉണ്ടായിരിക്കണം. ജോലിയുടെ വിഭാഗം അനുസരിച്ച് നിശ്ചിത സി.എൽ.ബി സ്കോറും അപേക്ഷകർക്ക് നിർബന്ധമാണ്. സിംഗിൾ അപേക്ഷകർ ഏകദേശം 10,507 ഡോളറും ഏഴ് അംഗങ്ങളുള്ള കുടുംബമാണെങ്കിൽ 27,806 ഡോളറും സാമ്പത്തിക ഭദ്രതയായി കാണിക്കേണ്ടതുണ്ട്. നിങ്ങളുടെ ജോലി മുൻഗണനാ പട്ടികയിൽ ഇല്ലെങ്കിലും അംഗീകൃത തൊഴിലുടമയിൽ നിന്ന് ഓഫർ ലെറ്റർ ഉണ്ടെങ്കിൽ ഇപ്പോഴും അപേക്ഷിക്കാൻ സാധിക്കുന്നതാണ്. 2030 വരെയാണ് ഈ പൈലറ്റ് പദ്ധതിയുടെ കാലാവധി നിശ്ചയിച്ചിരിക്കുന്നത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Manitoba RCIP announces priority sectors and occupations
