ടെഹ്റാൻ: യുഎസ് പടക്കപ്പലായ യുഎസ്എസ് എബ്രഹാം ലിങ്കണ് നേരെ മിസൈൽ ആക്രമണം നടത്തിയതായി ഇറാൻ റെവല്യൂഷണറി ഗാർഡ് കോർപ്സ് (ഐആർജിസി). ഞായറാഴ്ച വൈകുന്നേരത്തോടെ നാല് ബാലിസ്റ്റിക് മിസൈലുകൾ പടക്കപ്പലിൽ നേരിട്ട് പതിച്ചതായാണ് ഇറാൻ ഔദ്യോഗികമായി അറിയിച്ചിരിക്കുന്നത്.
ഇറാൻ പരമോന്നത നേതാവ് ആയത്തുള്ള അലി ഖമനേയി ഉൾപ്പെടെയുള്ളവർ കൊല്ലപ്പെട്ട അമേരിക്കൻ-ഇസ്രയേൽ സംയുക്ത നീക്കത്തിന് മറുപടിയായാണ് ഈ ആക്രമണമെന്ന് ഐആർജിസി വ്യക്തമാക്കി. ‘ഓപ്പറേഷൻ ട്രൂ പ്രോമിസ് 4’ എന്ന് പേരിട്ടിരിക്കുന്ന സൈനിക നടപടിയുടെ ഭാഗമായാണ് നീക്കം നടന്നത്. തങ്ങളുടെ കമാൻഡർമാരെ വധിച്ച ശത്രുശക്തികൾക്കുള്ള ശക്തമായ താക്കീതാണിതെന്നും പശ്ചിമേഷ്യയിലെ അമേരിക്കൻ സൈനിക താവളങ്ങൾ ഇനിയും ലക്ഷ്യമിടുമെന്നും ഇറാൻ പുറത്തിറക്കിയ ഏഴാം നമ്പർ പ്രസ്താവനയിൽ പറയുന്നു.
അതേസമയം, പടക്കപ്പലിന് നേരെ ആക്രമണം നടന്നെന്ന ഇറാന്റെ അവകാശവാദം അമേരിക്കൻ പ്രതിരോധ കേന്ദ്രങ്ങൾ ഇതുവരെ സ്ഥിരീകരിച്ചിട്ടില്ല. നിലവിൽ മേഖലയിൽ കനത്ത ജാഗ്രത തുടരുകയാണ്. ഇറാന്റെ സൈനിക നീക്കത്തെത്തുടർന്ന് പശ്ചിമേഷ്യയിൽ വീണ്ടും യുദ്ധഭീതി ശക്തമായിട്ടുണ്ട്. വരും മണിക്കൂറുകളിൽ അമേരിക്കയുടെ ഔദ്യോഗിക പ്രതികരണം ഉണ്ടായേക്കുമെന്നാണ് അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നത്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/KdmCA708iUa8aT1Ocx1qs1?mode=gi_t
Iran launches missile attack on US warship; claims to have fired four ballistic missiles
