ഒട്ടാവ : പശ്ചിമേഷ്യയിൽ ഇറാനെതിരെ അമേരിക്കയും ഇസ്രായേലും നടത്തുന്ന സൈനിക നീക്കങ്ങളിൽ കാനഡ നേരിട്ട് പങ്കെടുക്കില്ലെന്ന് പ്രധാനമന്ത്രി മാർക്ക് കാർണി വ്യക്തമാക്കി. ശനിയാഴ്ച നടന്ന ആക്രമണങ്ങൾക്ക് കാനഡ പിന്തുണ അറിയിച്ചിട്ടുണ്ടെങ്കിലും തുടർന്നുണ്ടാകുന്ന സൈനിക നീക്കങ്ങളിൽ രാജ്യം പങ്കാളിയാകില്ലെന്ന് അദ്ദേഹം അറിയിച്ചു. ഇന്ത്യ സന്ദർശനത്തിന്റെ ഭാഗമായി മുംബൈയിൽ മാധ്യമപ്രവർത്തക ഷെറീൻ ബാനുമായി നടത്തിയ ചർച്ചയിലാണ് പ്രധാനമന്ത്രി നിലപാട് വ്യക്തമാക്കിയത്. ആക്രമണത്തിന്റെ സൈനിക ആസൂത്രണത്തിലോ തയ്യാറെടുപ്പുകളിലോ കാനഡ ഭാഗമായിരുന്നില്ലെന്നും അദ്ദേഹം കൂട്ടിച്ചേർത്തു.
ഇറാൻ ആണവായുധങ്ങൾ കൈക്കലാക്കുന്നത് തടയുക, ഭീകരവാദ പ്രവർത്തനങ്ങൾ അവസാനിപ്പിക്കുക എന്നീ നിലപാടുകളിൽ കാനഡ ഉറച്ചുനിൽക്കുന്നതായി മാർക്ക് കാർണി പറഞ്ഞു. ഇറാനിലെ ജനങ്ങളെ പിന്തുണയ്ക്കുന്നതായും സംഘർഷാവസ്ഥയിൽ സാധാരണക്കാരുടെ ജീവൻ സംരക്ഷിക്കാൻ എല്ലാ കക്ഷികളും പരമാവധി ശ്രമിക്കണമെന്നും അദ്ദേഹം ആവശ്യപ്പെട്ടു. ഇസ്രായേലിന് സ്വയം പ്രതിരോധിക്കാനുള്ള അവകാശമുണ്ടെന്ന് വ്യക്തമാക്കിയ പ്രധാനമന്ത്രി, അന്താരാഷ്ട്ര സമാധാനത്തിനും സുരക്ഷയ്ക്കും ഭീഷണിയാകുന്ന ഇറാന്റെ നടപടികളെ തടയാനുള്ള അമേരിക്കൻ നീക്കത്തെ പിന്തുണയ്ക്കുന്നതായും അറിയിച്ചു.
സുരക്ഷാ സാഹചര്യം കണക്കിലെടുത്ത് ഇസ്രായേലിലെ ടെൽ അവീവിൽ നിന്ന് അനിവാര്യമല്ലാത്ത നയതന്ത്ര ഉദ്യോഗസ്ഥരെയും കുടുംബങ്ങളെയും താൽക്കാലികമായി മാറ്റാൻ ഉത്തരവിട്ടതായി വിദേശകാര്യമന്ത്രി അനിത ആനന്ദ് അറിയിച്ചു. നിലവിൽ മിഡിൽ ഈസ്റ്റിലെ മറ്റ് നയതന്ത്ര കാര്യാലയങ്ങളിൽ ഈ നിർദ്ദേശം ബാധകമല്ലെങ്കിലും സാഹചര്യം മാറുന്നതിനനുസരിച്ച് തീരുമാനമെടുക്കുമെന്നും മന്ത്രി വ്യക്തമാക്കി. ഇറാനിലുള്ള കനേഡിയൻ പൗരന്മാരോട് സുരക്ഷിത സ്ഥാനങ്ങളിൽ തുടരാനും പ്രാദേശിക അധികൃതരുടെ നിർദ്ദേശങ്ങൾ പാലിക്കാനും സർക്കാർ ആവശ്യപ്പെട്ടിട്ടുണ്ട്.
വാണിജ്യ വിമാന സർവീസുകൾ ലഭ്യമായിട്ടുള്ള സാഹചര്യത്തിൽ ഇസ്രായേൽ, ലബനൻ, പലസ്തീൻ എന്നിവിടങ്ങളിൽ കഴിയുന്ന കനേഡിയൻ പൗരന്മാർ മടങ്ങുന്ന കാര്യം പരിഗണിക്കണമെന്ന് അനിത ആനന്ദ് നിർദ്ദേശിച്ചു. സജീവമായ യുദ്ധസാഹചര്യത്തിൽ നയതന്ത്ര സഹായം നൽകുന്നതിന് പരിമിതികളുണ്ടാകുമെന്നും സർക്കാർ സഹായം മാത്രം പ്രതീക്ഷിക്കാതെ സ്വന്തം നിലയിൽ മുൻകരുതൽ പദ്ധതികൾ തയ്യാറാക്കണമെന്നും പൗരന്മാർക്ക് നൽകിയ ജാഗ്രതാ നിർദ്ദേശത്തിൽ പറയുന്നു. ഇറാനിൽ നിലവിൽ കാനഡയ്ക്ക് നയതന്ത്ര പ്രതിനിധികളില്ലാത്തത് പൗരന്മാർക്ക് സഹായം എത്തിക്കുന്നതിന് വെല്ലുവിളിയാണെന്നും മന്ത്രി ചൂണ്ടിക്കാട്ടി.
ഇറാൻ വിഷയത്തിൽ ഈ മാസം ആദ്യം മ്യൂണിക്ക് സുരക്ഷാ സമ്മേളനത്തിനിടെ യുഎസ് സ്റ്റേറ്റ് സെക്രട്ടറി മാർക്കോ റൂബിയോയുമായി ചർച്ച നടത്തിയിരുന്നതായി അനിത ആനന്ദ് സ്ഥിരീകരിച്ചു. എന്നാൽ ചർച്ചയുടെ കൂടുതൽ വിശദാംശങ്ങൾ വെളിപ്പെടുത്താൻ അവർ തയ്യാറായില്ല. ഇസ്രായേലിലുള്ള തങ്ങളുടെ നയതന്ത്ര ഉദ്യോഗസ്ഥരിൽ മടങ്ങാൻ താൽപ്പര്യമുള്ളവർക്ക് അതിനുള്ള അനുമതി അമേരിക്കൻ സർക്കാരും നൽകിയിട്ടുണ്ട്. ഔദ്യോഗിക സ്രോതസ്സുകളിൽ നിന്നുള്ള വിവരങ്ങൾ മാത്രം പൗരന്മാർ ആശ്രയിക്കണമെന്നും വ്യാജവാർത്തകളിൽ വഞ്ചിതരാകരുതെന്നും എംബസി അറിയിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
West Asian conflict: Canada says there will be no military intervention; supports Israel-US move
