വിശ്രമജീവിതത്തിന് കോടികൾ വേണം; കാനഡയിലെ യുവാക്കളെ ആശങ്കയിലാഴ്ത്തി പുതിയ സർവേ റിപ്പോർട്ട്

ഒട്ടാവ: ജോലിയിൽ നിന്ന് വിരമിച്ച ശേഷം സമാധാനപരമായ ഒരു ജീവിതം നയിക്കുക എന്നത് കാനഡയിലെ യുവതലമുറയ്ക്ക് മുന്നിൽ ഹിമാലയം കീഴടക്കുന്നതുപോലെ കഠിനമായ ഒന്നായി മാറുന്നു. രാജ്യത്തെ പ്രമുഖ ബാങ്കുകളായ ബിഎംഒ (BMO), ആർബിസി (RBC) എന്നിവ നടത്തിയ ഏറ്റവും പുതിയ സർവേകളിലാണ് കാനഡയിലെ യുവാക്കൾ നേരിടുന്ന സാമ്പത്തിക പ്രതിസന്ധിയുടെ കൃത്യമായ ചിത്രം പുറത്തുവരുന്നത്. ജീവിതച്ചെലവ് കുതിച്ചുയരുന്ന സാഹചര്യത്തിൽ, വിരമിക്കൽ കാലത്തേക്ക് കരുതിവെക്കേണ്ട തുകയിൽ വലിയ വർദ്ധനവാണ് കഴിഞ്ഞ ഒരു വർഷത്തിനിടെ ഉണ്ടായിരിക്കുന്നത്.

ബിഎംഒയുടെ വാർഷിക സർവേ പ്രകാരം, കാനഡയിലെ ഒരു ദമ്പതികൾക്ക് ജോലിയിൽ നിന്ന് വിരമിച്ച ശേഷം സുഖകരമായി ജീവിക്കാൻ ശരാശരി 1.7 ദശലക്ഷം ഡോളർ (ഏകദേശം 10 കോടിയിലധികം രൂപ) സമ്പാദ്യമായി വേണം. കഴിഞ്ഞ വർഷം ഇത് 1.54 ദശലക്ഷം ഡോളറായിരുന്നു. ഇതനുസരിച്ച് ഒരാൾക്ക് കുറഞ്ഞത് 8.5 ലക്ഷം ഡോളറെങ്കിലും ബാങ്ക് ബാലൻസ് ഉണ്ടെങ്കിൽ മാത്രമേ ഭാവി സുരക്ഷിതമാകൂ. എന്നാൽ പണപ്പെരുപ്പം കണക്കിലെടുക്കുമ്പോൾ തങ്ങൾക്ക് ഒരു ദശലക്ഷം ഡോളറെങ്കിലും ആവശ്യമായി വരുമെന്നാണ് മില്ലേനിയൽസ് (Millennials) കരുതുന്നത്.

നിലവിൽ ഒരു ശരാശരി യുവാവിന്റെ സമ്പാദ്യം വെറും 1.26 ലക്ഷം ഡോളർ മാത്രമാണെന്നിരിക്കെ, ലക്ഷ്യത്തിലെത്താൻ ഇവർ ഏറെ വിയർപ്പൊഴുക്കേണ്ടി വരും. സാമ്പത്തിക ഭദ്രതയെക്കുറിച്ച് 64 ശതമാനം യുവാക്കളും ആശങ്കാകുലരാണെന്ന് റിപ്പോർട്ടുകൾ വ്യക്തമാക്കുന്നു. നിലവിലെ ശരാശരി വരുമാനത്തിൽ നിന്ന് നിശ്ചിത തുക മാറ്റി വെച്ചാൽ പോലും, ലക്ഷ്യമിട്ട സമ്പാദ്യത്തിലേക്ക് എത്താൻ ഒരാൾക്ക് 70 വയസ്സ് കടക്കേണ്ടി വരുമെന്നാണ് കണക്കുകൾ സൂചിപ്പിക്കുന്നത്.

30 വയസ്സിൽ വിരമിക്കൽ ആസൂത്രണം തുടങ്ങുന്ന കാനഡക്കാർ 61 വയസ്സിൽ ജോലി അവസാനിപ്പിക്കാനാണ് ആഗ്രഹിക്കുന്നത്. എന്നാൽ റജിസ്റ്റേർഡ് റിട്ടയർമെന്റ് സേവിങ്സ് പ്ലാനുകളിലേക്ക് (RRSP) മാസം തോറും കൃത്യമായ തുക നിക്ഷേപിച്ചാൽ പോലും 73-75 വയസ്സുവരെ ജോലി ചെയ്യേണ്ടി വരുമെന്ന് ഇൻവെസ്റ്റ്മെന്റ് കാൽക്കുലേറ്ററുകൾ മുന്നറിയിപ്പ് നൽകുന്നു.

പ്രതിദിന ചെലവുകൾക്കിടയിൽ സമ്പാദ്യം എന്നത് പലർക്കും അസാധ്യമായി മാറുന്ന കാഴ്ചയാണ് കാണുന്നത്. വരുമാനത്തിന്റെ 10 ശതമാനം മാറ്റി വെക്കണമെന്ന് സാമ്പത്തിക വിദഗ്ധർ നിർദ്ദേശിക്കുന്നുണ്ടെങ്കിലും വാടകയും മറ്റ് ബില്ലുകളും അടച്ചു കഴിയുമ്പോൾ നിക്ഷേപിക്കാൻ തുകയില്ലാത്ത അവസ്ഥയിലാണ് ഭൂരിഭാഗവും. ഈ സാഹചര്യത്തിൽ, സാമ്പത്തിക ഭാരം കുറയ്ക്കാൻ സുഹൃത്തുക്കളോടൊപ്പമോ പങ്കാളികളോടൊപ്പമോ താമസിച്ച് ചെലവ് പങ്കിടുന്ന രീതിയിലേക്ക് യുവാക്കൾ മാറുകയാണ്. ചെറിയ തുകയാണെങ്കിൽ പോലും നേരത്തെ നിക്ഷേപിച്ചു തുടങ്ങുന്നതും കൃത്യമായ സാമ്പത്തിക അച്ചടക്കം പാലിക്കുന്നതും മാത്രമാണ് ഈ പ്രതിസന്ധി മറികടക്കാനുള്ള ഏക പോംവഴിയെന്ന് വിദഗ്ധർ ചൂണ്ടിക്കാട്ടുന്നു.

canadian-couples-retirement-how-long/

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt