സെന്റ് ജോൺസ്: ആഗോള സ്വർണ്ണ വിപണിയിൽ കരുത്തുറ്റ സാന്നിധ്യമാകാൻ ലക്ഷ്യമിട്ട് കാനഡ ആസ്ഥാനമായ ഇക്വിനോക്സ് ഗോൾഡ് കോർപ്പറേഷൻ. ന്യൂഫൗണ്ട്ലാൻഡ് ആൻഡ് ലാബ്രഡോറിലെ വാലന്റൈൻ ഖനിയിൽ നിന്ന് ഈ വർഷം രണ്ട് ലക്ഷം ഔൺസ് വരെ സ്വർണ്ണം ഉൽപ്പാദിപ്പിക്കാനാണ് കമ്പനി ലക്ഷ്യമിടുന്നത്. ഈ പുതിയ മുന്നേറ്റത്തോടെ കാനഡയിലെ സ്വർണ്ണ ഉൽപ്പാദകരിൽ ആദ്യ മൂന്ന് സ്ഥാനങ്ങളിൽ ഒന്നിലേക്ക് എത്താൻ ഇക്വിനോക്സ് ഗോൾഡിന് സാധിക്കുമെന്നാണ് വിലയിരുത്തൽ. നിലവിൽ അംനികോ ഈഗിൾ മൈൻസ് ലിമിറ്റഡാണ് കാനഡയിൽ സ്വർണ്ണ ഉൽപ്പാദനത്തിൽ ഒന്നാമത്.
ഒന്റാറിയോയിലെ ഗ്രീൻസ്റ്റോൺ ഖനിയിൽ നിന്നുള്ള 3 ലക്ഷം ഔൺസ് കൂടി ചേരുന്നതോടെ ഇക്വിനോക്സ് ഗോൾഡിന്റെ കാനഡയിലെ ആകെ ഉൽപ്പാദനം ഈ വർഷം 5 ലക്ഷം ഔൺസ് കടക്കും. 2025 സെപ്റ്റംബറിൽ വാലന്റൈൻ ഖനിയിൽ നിന്ന് ആദ്യത്തെ സ്വർണ്ണക്കട്ടി നിർമ്മിക്കുകയും നവംബറിൽ വാണിജ്യ ഉൽപ്പാദനം ആരംഭിക്കുകയും ചെയ്തിരുന്നു. ജനുവരിയിലെ കനത്ത മഞ്ഞുവീഴ്ചയും കൊടുംതണുപ്പും പ്രവർത്തനങ്ങളെ നേരിയ തോതിൽ ബാധിച്ചെങ്കിലും ഫെബ്രുവരി മാസത്തോടെ ഖനിയിലെ ഉൽപ്പാദനം പൂർണ്ണ ശേഷിയിലേക്ക് തിരിച്ചെത്തിയതായി കമ്പനി എക്സിക്യൂട്ടീവ് വൈസ് പ്രസിഡന്റ് റയാൻ കിംഗ് അറിയിച്ചു.
ഈ വർഷം ആദ്യ പകുതിയിൽ ഉൽപ്പാദനം ക്രമാനുഗതമായി വർദ്ധിപ്പിച്ച് രണ്ടാം പകുതിയോടെ പൂർണ്ണ തോതിലെത്തിക്കാനാണ് കമ്പനി പദ്ധതിയിടുന്നത്. വർഷത്തിന്റെ അവസാന പാദങ്ങളിൽ ഉൽപ്പാദനത്തിൽ വലിയ മുന്നേറ്റമുണ്ടാകുമെന്നാണ് വിപണിക്ക് നൽകിയിട്ടുള്ള സൂചന. വാലന്റൈൻ ഖനിക്ക് പുറമെ കാലിഫോർണിയയിലും നിക്കരാഗ്വയിലും കമ്പനിക്ക് ഖനികളുണ്ട്. ഇതെല്ലാം കൂടി ചേരുന്നതോടെ ഈ വർഷം കമ്പനിയുടെ മൊത്തം സ്വർണ്ണ ഉൽപ്പാദനം 8 ലക്ഷം ഔൺസിലെത്തുമെന്നാണ് സാമ്പത്തിക വിദഗ്ധരുടെ കണക്കുകൂട്ടൽ. ഉത്തര അമേരിക്കൻ മേഖലയിൽ കൂടുതൽ നിക്ഷേപങ്ങൾ ഇറക്കുന്നത് കമ്പനിയുടെ ഓഹരി മൂല്യത്തിലും വലിയ വർദ്ധനവിനായി സഹായിക്കും.
നിലവിൽ 14 വർഷത്തെ ഖനന സാധ്യതയാണ് വാലന്റൈൻ ഖനിയിൽ പ്രതീക്ഷിക്കുന്നത്. എന്നാൽ ഖനി പ്രദേശത്ത് പുതുതായി കണ്ടെത്തിയ രണ്ട് സ്വർണ്ണ മേഖലകൾ ഖനിയുടെ ആയുസ്സ് ഇനിയും വർദ്ധിപ്പിക്കാൻ സഹായിച്ചേക്കും. ഒരിടത്ത് നടത്തിയ പരിശോധനയിൽ 70 മീറ്റർ താഴ്ചയിൽ ടണ്ണിന് മൂന്ന് ഗ്രാം എന്ന തോതിൽ സ്വർണ്ണത്തിന്റെ സാന്നിധ്യം കണ്ടെത്തിയിട്ടുണ്ട്. സ്വർണ്ണത്തിന് അന്താരാഷ്ട്ര വിപണിയിൽ ഔൺസിന് 5,100 യുഎസ് ഡോളറിന് മുകളിൽ വിലയുള്ള സാഹചര്യത്തിൽ, പുതിയ ഖനികളിൽ നിന്നുള്ള ഉൽപ്പാദനം ഇക്വിനോക്സ് ഗോൾഡിന് വലിയ നേട്ടമുണ്ടാക്കും.
newfoundland-labrador/nl-mine-equinox-gold
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
