ഒട്ടാവ: കാനഡയുടെ കുടിയേറ്റ വകുപ്പ് മന്ത്രിയായി ചുമതലയേറ്റ ലീന മെറ്റ്ലേജ് ഡിയാബിന്റെ പ്രവർത്തനശൈലിക്കെതിരെ ഭരണ-പ്രതിപക്ഷാംഗങ്ങളും വിവിധ സമൂഹ സംഘടനകളും രംഗത്ത്. മന്ത്രിയെ നേരിട്ട് കാണാനോ പരാതികൾ ബോധിപ്പിക്കാനോ സാധിക്കുന്നില്ലെന്നും, പാർലമെന്ററി സമിതികളിൽ വകുപ്പുമായി ബന്ധപ്പെട്ട ചോദ്യങ്ങൾക്ക് കൃത്യമായ മറുപടി നൽകാൻ മന്ത്രിക്ക് കഴിയുന്നില്ല എന്നാണ് പ്രധാന വിമർശനം.
പ്രവിശ്യാ തലത്തിൽ മന്ത്രിപദവി വഹിച്ച പരിചയവുമുള്ള ലീന ഡിയാബ് ചുമതലയേറ്റപ്പോൾ വലിയ പ്രതീക്ഷകളാണ് കുടിയേറ്റ മേഖലയിൽ പ്രവർത്തിക്കുന്ന സംഘടനകൾക്കുണ്ടായിരുന്നത്. എന്നാൽ അധികാരമേറ്റ ശേഷം പ്രധാന സംഘടനകൾക്ക് പോലും മന്ത്രിയുമായി നേരിട്ട് കൂടിക്കാഴ്ച നടത്താൻ സാധിച്ചിട്ടില്ല. മുമ്പ് കുടിയേറ്റ മന്ത്രിയായിരുന്ന മാർക്ക് മില്ലർ എല്ലാവരുമായും സംസാരിക്കുകയും കാര്യങ്ങൾ വ്യക്തമാക്കുകയും ചെയ്യുമായിരുന്നു. എന്നാൽ പുതിയ മന്ത്രിയായ ലീന ഡിയാബിൽ നിന്ന് അത്തരമൊരു സഹകരണം ലഭിക്കുന്നില്ലെന്ന് ക്യുബെക്കിലെ സംഘടനകൾ പരാതിപ്പെടുന്നു. യുക്രേനിയൻ കനേഡിയൻ കോൺഗ്രസ് ഉൾപ്പെടെയുള്ള സംഘടനകൾ മാസങ്ങളായി കൂടിക്കാഴ്ചയ്ക്കായി ശ്രമിച്ചിട്ടും വീഡിയോ കോൺഫറൻസിലൂടെ മാത്രമാണ് സംസാരിക്കാൻ കഴിഞ്ഞത്.
പാർലമെന്ററി കമ്മിറ്റികളിലും ചോദ്യോത്തര വേളകളിലും മന്ത്രിയുടെ പ്രകടനം മോശമാണെന്ന് സ്വന്തം പാർട്ടിയായ ലിബറൽ പാർട്ടിയിലെ എംപിമാർ പോലും അഭിപ്രായപ്പെടുന്നു. സങ്കീർണ്ണമായ നിയമവശങ്ങളെക്കുറിച്ചുള്ള ചോദ്യങ്ങൾക്ക് കൃത്യമായ മറുപടി നൽകാതെ ഉദ്യോഗസ്ഥരുടെ സഹായം തേടുന്നത് മന്ത്രിയുടെ പദവിക്ക് ചേർന്നതല്ലെന്ന് പ്രതിപക്ഷം കുറ്റപ്പെടുത്തി. താൽക്കാലിക താമസക്കാരുടെ എണ്ണം പകുതിയിലധികം കുറയ്ക്കാനുള്ള സർക്കാരിന്റെ പുതിയ നയം നടപ്പിലാക്കുന്നതിനിടെയാണ് മന്ത്രിക്കെതിരെ ആഭ്യന്തരമായി പോലും സമ്മർദ്ദം മുറുകുന്നത്. എന്നാൽ, കുടിയേറ്റം നിയന്ത്രിക്കുന്നതിലും സമ്പദ്വ്യവസ്ഥ ശക്തമാക്കുന്നതിലും മന്ത്രി നിർണ്ണായക പങ്കുവഹിക്കുന്നുണ്ടെന്നാണ് പ്രധാനമന്ത്രി മാർക്ക് കാർണിയുടെ ഓഫീസ് വ്യക്തമാക്കുന്നത്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/KdmCA708iUa8aT1Ocx1qs1?mode=gi_t
Lina Diab fails to live up to expectations; Canada's immigration minister faces strong criticism
