തിരുവനന്തപുരം: നിയമസഭാ തെരഞ്ഞെടുപ്പ് ഒരുക്കങ്ങൾ സജീവമാകുന്നതിനിടെ പ്രതിപക്ഷ നേതാവ് രാഹുൽ ഗാന്ധി ഇന്ന് കേരളത്തിലെത്തും. രണ്ടു ഘട്ടങ്ങളിലായി നിശ്ചയിച്ചിട്ടുള്ള സന്ദർശനത്തിന്റെ ആദ്യ ഘട്ടമാണ് ഇന്നും നാളെയുമായി നടക്കുന്നത്. സന്ദർശന വേളയിൽ പ്രധാനമായും കണ്ണൂർ, വയനാട് ജില്ലകളിലെ വിവിധ പരിപാടികളിൽ അദ്ദേഹം പങ്കെടുക്കും. രണ്ടാം ഘട്ട സന്ദർശനത്തിനായി മാർച്ച് ആറ്, ഏഴ് തീയതികളിൽ അദ്ദേഹം വീണ്ടും കേരളത്തിലെത്തുമെന്ന് കോൺഗ്രസ് നേതൃത്വം അറിയിച്ചു.
ഫെബ്രുവരി 26-ന് കണ്ണൂരിൽ വെച്ച് കർഷകരുമായി രാഹുൽ ഗാന്ധി ആശയവിനിമയം നടത്തും. കർഷകർ നേരിടുന്ന പ്രശ്നങ്ങളും കാർഷിക മേഖലയിലെ പ്രതിസന്ധികളും അദ്ദേഹം നേരിട്ട് ചോദിച്ചറിയും. തുടർന്ന് വയനാട്ടിൽ കോൺഗ്രസ് നിർമ്മിക്കുന്ന ഭവന പദ്ധതിയുടെ ശിലാസ്ഥാപന കർമ്മം അദ്ദേഹം നിർവ്വഹിക്കും. ഇതിന് പുറമെ യുഡിഎഫ് ഘടകകക്ഷി നേതാക്കളുമായി അദ്ദേഹം കൂടിക്കാഴ്ച നടത്തും. നിലവിലെ രാഷ്ട്രീയ സാഹചര്യങ്ങളും തെരഞ്ഞെടുപ്പ് ഒരുക്കങ്ങളും ഈ ചർച്ചകളിൽ പ്രധാന വിഷയമാകും.
മാർച്ച് ആറിന് നടക്കുന്ന രണ്ടാം ഘട്ട സന്ദർശനത്തിന്റെ ഭാഗമായി പ്രതിപക്ഷ നേതാവ് വി.ഡി. സതീശൻ നയിക്കുന്ന യാത്രയുടെ സമാപന സമ്മേളനത്തിൽ പങ്കെടുക്കാൻ രാഹുൽ ഗാന്ധി കൊല്ലത്തെത്തും. തുടർന്ന് ശിവഗിരി മഠത്തിൽ നടക്കുന്ന പ്രത്യേക പരിപാടിയിലും അദ്ദേഹം പങ്കുചേരും. തെരഞ്ഞെടുപ്പ് പ്രഖ്യാപനത്തിന് മുന്നോടിയായി രാഹുൽ ഗാന്ധിയുടെ സാന്നിധ്യം യുഡിഎഫ് ക്യാമ്പുകൾക്ക് ആവേശം പകരുമെന്നാണ് വിലയിരുത്തൽ.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Assembly election campaign: Rahul Gandhi will arrive in Kerala today; will lay the foundation stone for the Wayanad housing project!
