ടൊറന്റോ: കഴിഞ്ഞ ഡിസംബർ മാസത്തിൽ കാനഡ സന്ദർശിച്ച അമേരിക്കൻ സഞ്ചാരികളുടെ എണ്ണത്തിൽ ഗണ്യമായ കുറവുണ്ടായതായി സ്റ്റാറ്റിസ്റ്റിക്സ് കാനഡയുടെ ഏറ്റവും പുതിയ റിപ്പോർട്ട്. 2024 ഡിസംബറിനെ അപേക്ഷിച്ച് 2025 ഡിസംബറിൽ അമേരിക്കയിൽ നിന്നുള്ള സഞ്ചാരികളുടെ എണ്ണത്തിൽ 7.5 ശതമാനം ഇടിവാണ് രേഖപ്പെടുത്തിയത്. ആകെ 16 ലക്ഷം അമേരിക്കൻ സന്ദർശകരാണ് ഈ കാലയളവിൽ കാനഡയിലെത്തിയത്. കാർ മാർഗ്ഗം അതിർത്തി കടന്നെത്തിയവരുടെ എണ്ണത്തിലും 7.5 ശതമാനം കുറവുണ്ടായിട്ടുണ്ട്, ഇതിൽ പകുതിയോളം പേരും ഒരേ ദിവസം തന്നെ മടങ്ങിയവരാണ്.
അമേരിക്കയിൽ നിന്നുള്ള വരവ് കുറഞ്ഞെങ്കിലും മറ്റ് വിദേശ രാജ്യങ്ങളിൽ നിന്നുള്ള സഞ്ചാരികളുടെ എണ്ണത്തിൽ 14.1 ശതമാനം വർധനവുണ്ടായത് ശ്രദ്ധേയമാണ്. ഏകദേശം അഞ്ച് ലക്ഷത്തിലധികം വിദേശ സഞ്ചാരികളാണ് ഈ കാലയളവിൽ കാനഡ സന്ദർശിച്ചത്, ഇതിൽ ഭൂരിഭാഗം പേരും വിമാനമാർഗ്ഗമാണ് എത്തിയത്. യുണൈറ്റഡ് കിംഗ്ഡം, ഫ്രാൻസ്, മെക്സിക്കോ എന്നീ രാജ്യങ്ങളിൽ നിന്നുള്ളവരാണ് വിദേശ സന്ദർശകരിൽ മുന്നിലുള്ളത്. മൊത്തം വിദേശ സഞ്ചാരികളുടെ 31.3 ശതമാനവും ഈ മൂന്ന് രാജ്യങ്ങളിൽ നിന്നുള്ളവരാണ്.
അതേസമയം, കാനഡക്കാരുടെ വിദേശ യാത്രകളിലും വലിയ മാറ്റങ്ങൾ പ്രകടമാണ്. കഴിഞ്ഞ വർഷത്തെ അപേക്ഷിച്ച് കാനഡയിൽ നിന്നുള്ളവരുടെ വിദേശ യാത്രകൾ 15 ശതമാനം കുറഞ്ഞ് 35 ലക്ഷത്തിലെത്തി. അമേരിക്കയിലേക്കുള്ള കാർ യാത്രകളിൽ 30.2 ശതമാനവും വിമാന യാത്രകളിൽ 11 ശതമാനവും കുറവുണ്ടായി. എന്നാൽ അമേരിക്ക ഒഴികെയുള്ള മറ്റ് വിദേശ രാജ്യങ്ങളിലേക്ക് കാനഡക്കാർ നടത്തിയ വിമാന യാത്രകളിൽ 13.3 ശതമാനം വർധനവുണ്ടായിട്ടുണ്ട്. മൊത്തത്തിൽ നോക്കിയാൽ, 2024-നെ അപേക്ഷിച്ച് 2025-ൽ കാനഡയിലേക്കുള്ള അന്താരാഷ്ട്ര യാത്രക്കാരുടെ എണ്ണത്തിൽ 10.9 ശതമാനത്തിന്റെ കുറവാണ് രേഖപ്പെടുത്തിയിരിക്കുന്നത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Was American tourism to Canada higher or lower last December?
