ഒട്ടാവ: മെക്സിക്കോയിലെ വിവിധ നഗരങ്ങളിൽ സുരക്ഷാസേനയും സായുധ സംഘങ്ങളും തമ്മിൽ ഏറ്റുമുട്ടൽ രൂക്ഷമായ പശ്ചാത്തലത്തിൽ പ്യൂർട്ടോ വല്ലാർട്ട ഉൾപ്പെടെയുള്ള പ്രദേശങ്ങളിലേക്ക് യാത്രാ മുന്നറിയിപ്പ് പുറപ്പെടുവിച്ച് കാനഡ. പ്രമുഖ ടൂറിസ്റ്റ് കേന്ദ്രമായ ജാലിസ്കോ സംസ്ഥാനത്ത് അക്രമസംഭവങ്ങൾ പടരുന്ന സാഹചര്യത്തിൽ കനേഡിയൻ വിമാനക്കമ്പനികൾ സർവീസുകൾ റദ്ദാക്കുകയും വിനോദസഞ്ചാരികളോട് സുരക്ഷിത സ്ഥാനങ്ങളിൽ തുടരാൻ നിർദേശിക്കുകയും ചെയ്തു.
ഞായറാഴ്ച പുലർച്ചെ മെക്സിക്കൻ ഫെഡറൽ സേന നടത്തിയ പ്രത്യേക തിരച്ചിലിനെത്തുടർന്നാണ് സംഘർഷങ്ങൾ ആരംഭിച്ചത്. പ്രമുഖ കുറ്റവാളി സംഘമായ ജാലിസ്കോ ന്യൂ ജനറേഷൻ കാർട്ടലിന്റെ (CJNG) തലവൻ കൊല്ലപ്പെട്ടെന്ന വാർത്തകൾക്ക് പിന്നാലെ പ്രക്ഷോഭകാരികൾ വാഹനങ്ങൾ കത്തിക്കുകയും റോഡുകൾ ഉപരോധിക്കുകയും ചെയ്തു. പ്യൂർട്ടോ വല്ലാർട്ട നഗരത്തിൽ ടാക്സി, റൈഡ് ഷെയറിംഗ് സേവനങ്ങൾ പൂർണ്ണമായും നിലച്ചു. നഗരത്തിന്റെ വിവിധ ഭാഗങ്ങളിൽ പുകപടലങ്ങൾ ഉയർന്നതായും സ്ഫോടന ശബ്ദങ്ങൾ കേട്ടതായും പ്രദേശത്തുള്ള വിദേശ വിനോദസഞ്ചാരികൾ അറിയിച്ചു.
സാഹചര്യം വഷളായതിനെത്തുടർന്ന് എയർ കാനഡ, വെസ്റ്റ്ജെറ്റ് തുടങ്ങിയ വിമാനക്കമ്പനികൾ പ്യൂർട്ടോ വല്ലാർട്ടയിലേക്കുള്ള സർവീസുകൾ നിർത്തിവെച്ചു. നിലവിൽ അവിടെയുള്ള കനേഡിയൻ പൗരന്മാർ പ്രാദേശിക അധികാരികളുടെ നിർദേശങ്ങൾ കർശനമായി പാലിക്കണമെന്നും അനാവശ്യ യാത്രകൾ ഒഴിവാക്കണമെന്നും ഗ്ലോബൽ അഫയേഴ്സ് കാനഡ അറിയിച്ചു. സ്ഥിതിഗതികൾ നിരീക്ഷിച്ചു വരികയാണെന്നും വിമാനത്താവളങ്ങളുടെ പ്രവർത്തനം പുനരാരംഭിക്കുന്ന കാര്യത്തിൽ ഉടൻ തീരുമാനമുണ്ടാകുമെന്നും അധികൃതർ വ്യക്തമാക്കി.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/KdmCA708iUa8aT1Ocx1qs1?mode=gi_t
Civil unrest in Mexico: Canada imposes travel ban on Puerto Vallarta
