വിന്നിപെഗ്: സെന്റ് ജെയിംസ് അസിനിബോയ സ്കൂൾ ഡിവിഷനിൽ ഡ്രൈവർമാരുടെ കുറവ് മൂലം സ്കൂൾ ബസ് സർവീസുകൾ കൂട്ടത്തോടെ റദ്ദാക്കുന്നു. അപ്രതീക്ഷിതമായുണ്ടായ ഈ പ്രതിസന്ധിയിൽ രക്ഷിതാക്കൾക്കുണ്ടായ ബുദ്ധിമുട്ടിൽ സ്കൂൾ അധികൃതർ ഔദ്യോഗികമായി മാപ്പപേക്ഷിച്ചു. ഞങ്ങൾ നിശ്ചയിച്ചിട്ടുള്ള നിലവാരത്തിലുള്ള സേവനം നൽകാൻ നിലവിൽ സാധിക്കുന്നില്ലെന്നും, കുടുംബങ്ങൾക്കുണ്ടായ അനിശ്ചിതത്വത്തിനും ബുദ്ധിമുട്ടുകൾക്കും ഡിവിഷന് വേണ്ടി ആത്മാർത്ഥമായി മാപ്പപേക്ഷിക്കുന്നുവെന്നും സൂപ്പർഇന്റൻഡന്റ് ജെന്നസ് മോഫറ്റ് രക്ഷിതാക്കൾക്ക് അയച്ച കത്തിൽ വ്യക്തമാക്കി.
സ്കൂൾ ഡിവിഷന് സ്വന്തമായി ചെറിയൊരു ബസ് ശൃംഖല ഉണ്ടെങ്കിലും ഭൂരിഭാഗം സർവീസുകളും നടത്തുന്നത് ഒരു സ്വകാര്യ ഏജൻസിയാണ്. ഈ ഏജൻസിയിൽ ഡ്രൈവർമാരുടെ വലിയ കുറവ് അനുഭവപ്പെടുന്നതാണ് സർവീസുകൾ മുടങ്ങാൻ പ്രധാന കാരണം. പലപ്പോഴും അവസാന നിമിഷമാണ് ബസ് റദ്ദാക്കിയ വിവരം രക്ഷിതാക്കൾ അറിയുന്നത്. ഇതോടെ കൊച്ചു കുട്ടികളുമായി പൊതുഗതാഗതത്തെ ആശ്രയിക്കേണ്ടി വരുന്നത് വലിയ സമയനഷ്ടത്തിനും ബുദ്ധിമുട്ടിനും കാരണമാകുന്നുവെന്ന് രക്ഷിതാക്കൾ പരാതിപ്പെടുന്നു.
നിലവിലെ പ്രതിസന്ധി പരിഹരിക്കാൻ ഡ്രൈവർമാരുടെ എണ്ണം വർദ്ധിപ്പിക്കുന്നതിനായി സ്വകാര്യ ഏജൻസിയുമായി ചേർന്ന് ഡിവിഷൻ ശ്രമിക്കുന്നുണ്ട്. കൂടാതെ നഗരത്തിലെ മറ്റ് കരാർ ഏജൻസികളിൽ നിന്ന് ഡ്രൈവർമാരുടെ സഹായം തേടുകയും കൂടുതൽ റിലീഫ് ഡ്രൈവർമാരെ നിയമിക്കുകയും ചെയ്തിട്ടുണ്ട്. ഇതിനുപുറമെ സ്കൂൾ ഡിവിഷന്റെ സ്വന്തം ബസ് ശൃംഖലയിലേക്ക് കൂടുതൽ വാഹനങ്ങൾ ചേർക്കുന്ന കാര്യവും അധികൃതരുടെ പരിഗണനയിലുണ്ട്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Driver shortages cause school bus cancellations, prompting apology to parents
