സഡ്ബറി: സഡ്ബറിയിലെ 2SLGBTQIA+ വിഭാഗത്തിന്റെ സുരക്ഷയ്ക്കും വൈവിധ്യത്തിനും തുല്യതയ്ക്കുമായി പ്രവർത്തിക്കുന്ന ‘സഡ്ബറി ക്വീർസ് യുണൈറ്റഡ് എറൗണ്ട് ഡൈവേഴ്സിറ്റി’ (SQUAD) എന്ന സംഘടനയ്ക്ക് കേന്ദ്ര സാമ്പത്തിക സഹായം പ്രഖ്യാപിച്ചു. 2,50,000 ഡോളറിലധികം തുക സംഘടനയ്ക്ക് ലഭ്യമാക്കുമെന്ന് സഡ്ബറി എം.പി വിവിയൻ ലാപോയിന്റ് ബുധനാഴ്ച അറിയിച്ചു. ക്വീർ സമൂഹം നേരിടുന്ന പരിമിതികൾ പരിഹരിക്കുന്നതിനും സാമൂഹിക പങ്കാളിത്തം ഉറപ്പാക്കുന്നതിനും, വിദ്യാഭ്യാസം, പിന്തുണ എന്നിവ ഉറപ്പാക്കുന്നതിനും ഈ ഫണ്ട് വിനിയോഗിക്കുമെന്ന് അധികൃതർ വ്യക്തമാക്കി.
കനേഡിയൻ മൂല്യങ്ങളായ ബഹുമാനം, ജനാധിപത്യം, ഉൾക്കൊള്ളൽ എന്നിവയാണ് സംഘടനയുടെ പ്രവർത്തനങ്ങളിൽ പ്രതിഫലിക്കുന്നതെന്ന് വിവിയൻ ലാപോയിന്റ് പറഞ്ഞു. ബോധവൽക്കരണം, പിന്തുണ, വിദ്യാഭ്യാസം തുടങ്ങിയ പ്രവർത്തനങ്ങൾ വിപുലീകരിക്കാൻ ഈ ഫണ്ടിങ് സഹായകമാകുമെന്നും അവർ കൂട്ടിച്ചേർത്തു. ഡൗൺടൗണിലെ ഡർഹാം സ്ട്രീറ്റിൽ കഴിഞ്ഞ ഓഗസ്റ്റിൽ സംഘടന ഒരു സുരക്ഷിത ഇടം ആരംഭിച്ചിരുന്നു. വർക്ക്ഷോപ്പുകൾ വഴി കൂടുതൽ ധാരണയും ഉൾക്കൊള്ളലും വളർത്താനാണ് നിലവിൽ പദ്ധതിയിടുന്നത്.
ക്വീർ സമൂഹത്തിനിടയിലെ ആത്മഹത്യാ നിരക്ക് ഉയർന്നതാണെന്നും ഏകാന്തതയും ഒറ്റപ്പെടലും ശാരീരികവും മാനസികവുമായ ആരോഗ്യത്തെ ഗുരുതരമായി ബാധിക്കുമെന്നും സംഘടനയിലെ സോഷ്യൽ വർക്കർ പോൾ പസാനൻ ചൂണ്ടിക്കാട്ടി. ഏകാന്തത പ്രതിദിനം 15 സിഗരറ്റുകൾ വലിക്കുന്നതിന് തുല്യമായ ആഘാതമാണ് ആരോഗ്യത്തിലുണ്ടാക്കുന്നത്. മാനസിക സമ്മർദ്ദങ്ങൾക്കൊപ്പം ശാരീരിക ആരോഗ്യത്തെയും ഇത് ബാധിക്കുന്നുണ്ടെന്ന് അദ്ദേഹം വ്യക്തമാക്കി. ഇത്തരം വെല്ലുവിളികളെ നേരിടാൻ പുതിയ സാമ്പത്തിക സഹായം കരുത്താകുമെന്ന് സംഘടന വിലയിരുത്തുന്നു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Central funding for Sudbury’s queer community; SQUAD to reduce barriers
