വിദ്വേഷത്തിന്റെ ‘സ്റ്റോറി’കൾക്ക് കേരളത്തിൽ സ്ഥാനമില്ല; ‘കേരള സ്റ്റോറി’ രണ്ടാം ഭാഗത്തിനെതിരെ മുഖ്യമന്ത്രി

കേരളത്തിന്റെ മതേതര പാരമ്പര്യത്തെ അവഹേളിക്കാനും സമൂഹത്തിൽ വിദ്വേഷം വിതയ്ക്കാനും ലക്ഷ്യമിട്ട് നിർമ്മിക്കപ്പെട്ട ‘ദി കേരള സ്റ്റോറി’ എന്ന ചിത്രത്തിന്റെ രണ്ടാം ഭാഗത്തിനെതിരെ മുഖ്യമന്ത്രി പിണറായി വിജയൻ രൂക്ഷവിമർശനം ഉന്നയിച്ചു. നട്ടാൽ കുരുക്കാത്ത നുണകളും കേരളവിരുദ്ധ പ്രചാരണവും കുത്തിനിറച്ച ഒന്നാം ഭാഗം വർഗീയ ലക്ഷ്യത്തോടെയുള്ളതാണെന്ന് ജനങ്ങൾ തിരിച്ചറിഞ്ഞതാണെന്ന് അദ്ദേഹം പറഞ്ഞു. സാഹോദര്യവും മതേതരത്വവും ഉയർത്തിപ്പിടിക്കുന്ന കേരളത്തിന്റെ മാതൃകയെ ഭയപ്പെടുന്നവരാണ് ഇത്തരം വിദ്വേഷ പ്രചാരണങ്ങൾക്ക് പിന്നിലെന്നും അദ്ദേഹം ഫേസ്ബുക്കിൽ കുറിച്ചു.

സംഘപരിവാർ കേന്ദ്രങ്ങളാണ് ഈ വ്യാജ നിർമ്മിതിയെ ഏറ്റെടുത്ത് പ്രചരിപ്പിക്കുന്നത്. പരസ്പര സമ്മതത്തോടെ നടക്കുന്ന വിവാഹങ്ങളെപ്പോലും വർഗീയതയുടെയും നിർബന്ധിത മതപരിവർത്തനത്തിന്റെയും നിറം നൽകി തെറ്റായി വ്യാഖ്യാനിക്കുകയാണ് ഇവർ ചെയ്യുന്നത്. വർഗീയ കലാപങ്ങളില്ലാത്ത, എല്ലാ മതവിശ്വാസികളും പരസ്പര ബഹുമാനത്തോടെ കഴിയുന്ന കേരളത്തെ ശത്രുതയോടെ കാണുന്ന ശക്തികളാണ് നമ്മുടെ നാടിന്റെ സമാധാനത്തിൽ വിഷം കലക്കാൻ ശ്രമിക്കുന്നതെന്ന് മുഖ്യമന്ത്രി ആഞ്ഞടിച്ചു.

രാജ്യത്തെ ചലച്ചിത്ര നയങ്ങളിലെ ഇരട്ടത്താപ്പിനെയും മുഖ്യമന്ത്രി ചോദ്യം ചെയ്തു. ‘ബീഫ്’ എന്ന പേരിട്ടതുകൊണ്ട് മാത്രം ഒരു ചിത്രത്തിന് പ്രദർശനാനുമതി നിഷേധിച്ച സാഹചര്യമുണ്ടായിരുന്നു. എന്നാൽ സമൂഹത്തിൽ ഭിന്നതയും വിദ്വേഷവും പടർത്താൻ നിർമ്മിക്കപ്പെട്ട ഇത്തരം ‘വിഷസൃഷ്ടികൾക്ക്’ എങ്ങനെ പ്രദർശനാനുമതി ലഭിക്കുന്നു എന്നത് ആശ്ചര്യകരമാണെന്ന് അദ്ദേഹം പറഞ്ഞു. സെൻസർ ബോർഡിന്റെ ഇത്തരം നടപടികളിലെ വിവേചനത്തെ അദ്ദേഹം കുറിപ്പിൽ ചൂണ്ടിക്കാട്ടി.

സുസ്ഥിര വികസന സൂചികകളിൽ മുൻപന്തിയിൽ നിൽക്കുന്നതും ക്രമസമാധാന പാലനത്തിൽ മാതൃകയുമായ കേരളത്തെ ഭീകരവാദത്തിന്റെ കേന്ദ്രമായി ചിത്രീകരിക്കാൻ നടത്തുന്ന ശ്രമങ്ങളെ ഒറ്റക്കെട്ടായി തള്ളിക്കളയണമെന്ന് മുഖ്യമന്ത്രി ആവശ്യപ്പെട്ടു. കേരളത്തിന്റെ മതേതര അടിത്തറ ഇത്തരം വ്യാജപ്രചാരണങ്ങൾ കൊണ്ട് തകരില്ലെന്ന് തെളിയിക്കാനുള്ള ഉത്തരവാദിത്തം ഓരോ പൗരനുമുണ്ടെന്നും അദ്ദേഹം ഓർമ്മിപ്പിച്ചു.

വിദ്വേഷ പ്രചാരണങ്ങളെ തള്ളിക്കളയുന്നതിനൊപ്പം വസ്തുതകളെയും സാഹോദര്യത്തിന്റെ മൂല്യങ്ങളെയും മുറുകെ പിടിക്കണമെന്നും അദ്ദേഹം ആഹ്വാനം ചെയ്തു. “കേരളം നമ്മുടെ അഭിമാനമാണ്, നുണകൾക്കെതിരെ സത്യം ജയിക്കണം” എന്ന സന്ദേശത്തോടെയാണ് മുഖ്യമന്ത്രി തന്റെ കുറിപ്പ് അവസാനിപ്പിച്ചത്. വരാനിരിക്കുന്ന സിനിമയുടെ റിലീസിന് മുന്നോടിയായി വലിയ രാഷ്ട്രീയ ചർച്ചകൾക്കാണ് മുഖ്യമന്ത്രിയുടെ പ്രതികരണം വഴിതുറന്നിരിക്കുന്നത്.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt

‘Stories’ of hate have no place in Kerala; CM opposes ‘Kerala Story’ part 2