ടൊറന്റോ: കാനഡയുടെ സാമ്പത്തിക വളർച്ചയും തൊഴിൽ മേഖലയിലെ കുറവുകളും പരിഹരിക്കുക ലക്ഷ്യമിട്ട് 2026-ലേക്കുള്ള പുതിയ എക്സ്പ്രസ് എൻട്രി (Express Entry) വിഭാഗങ്ങൾ ഇമിഗ്രേഷൻ മന്ത്രി ലീന മെറ്റ്ലെജ് ദിയാബ് പ്രഖ്യാപിച്ചു. കാനഡയിലെ തൊഴിൽ വിപണിയിൽ അത്യന്താപേക്ഷിതമായ കഴിവുകളുള്ള ഉദ്യോഗാർത്ഥികളെ വേഗത്തിൽ രാജ്യത്തേക്ക് എത്തിക്കുന്നതിനാണ് ഈ പുതിയ മാറ്റങ്ങൾ.
2026-ലെ പുതിയ വിഭാഗങ്ങൾ:
ഈ വർഷം മുതൽ നാല് പുതിയ മേഖലകളിലുള്ളവർക്ക് പ്രത്യേക പരിഗണന ലഭിക്കും. കാനഡയിൽ പ്രവൃത്തിപരിചയമുള്ള വിദേശ ഡോക്ടർമാർക്കായി ഒരു പ്രത്യേക വിഭാഗം തന്നെ രൂപീകരിച്ചിട്ടുണ്ട്. കൂടാതെ, സീനിയർ മാനേജർമാർ, ശാസ്ത്ര ഗവേഷകർ എന്നിവർക്കും ഇനി പ്രത്യേക മുൻഗണന ലഭിക്കും. വിമാനത്തിലെ പൈലറ്റുമാരും മെക്കാനിക്കുകളും ഉൾപ്പെടുന്ന ട്രാൻസ്പോർട്ട് മേഖലയും കനേഡിയൻ സായുധ സേനയിലേക്ക് തിരഞ്ഞെടുക്കപ്പെടുന്ന വിദഗ്ധരായ സൈനിക അപേക്ഷകരും പുതിയ പട്ടികയിലുണ്ട്.
തുടരുന്ന വിഭാഗങ്ങൾ:
കഴിഞ്ഞ വർഷങ്ങളിൽ നിലവിലുണ്ടായിരുന്ന ചില വിഭാഗങ്ങൾ 2026-ലും മാറ്റമില്ലാതെ തുടരും. ഫ്രഞ്ച് ഭാഷാ നൈപുണ്യമുള്ളവർക്കും ആരോഗ്യ മേഖലയിൽ ജോലി ചെയ്യുന്ന നഴ്സുമാർ, ഡെന്റിസ്റ്റുകൾ, ഫാർമസിസ്റ്റുകൾ എന്നിവർക്കും അവസരങ്ങൾ തുടരും. കൂടാതെ Carpenters, പ്ലംബർമാർ തുടങ്ങിയ സാങ്കേതിക മേഖലയിലുള്ളവർക്കും (Trades) മുൻഗണന ലഭിക്കും.
അപേക്ഷകർക്കുള്ള ഗുണം:
സാധാരണ എക്സ്പ്രസ് എൻട്രി ഡ്രോകളെ അപേക്ഷിച്ച് ഇത്തരം പ്രത്യേക വിഭാഗങ്ങൾ വഴി അപേക്ഷിക്കുന്നവർക്ക് കുറഞ്ഞ സി.ആർ.എസ് (CRS) സ്കോറിൽ തന്നെ സ്ഥിരതാമസത്തിനുള്ള ക്ഷണം (ITA) ലഭിക്കാൻ സാധ്യതയുണ്ട്. നിലവിൽ കാനഡയിൽ താല്ക്കാലിക വിസയിൽ ജോലി ചെയ്യുന്ന ഡോക്ടർമാർക്കും ഗവേഷകർക്കും ഇത് വലിയൊരു ആശ്വാസമാകും. കാനഡയെ ഒരു ആഗോള ഗവേഷണ-നൈപുണ്യ ഹബ്ബാക്കി മാറ്റാനാണ് സർക്കാർ ലക്ഷ്യമിടുന്നതെന്ന് മന്ത്രി അറിയിച്ചു. വരും ദിവസങ്ങളിൽ തന്നെ ഈ പുതിയ വിഭാഗങ്ങൾക്കായുള്ള ആദ്യ നറുക്കെടുപ്പുകൾ നടക്കുമെന്നാണ് പ്രതീക്ഷിക്കുന്നത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Immigration Minister Announces New Express Entry Categories For 2026
