പി.ആർ ചെറുതായി പാളി; ഗോവിന്ദൻ മാഷ് വെട്ടിലായെന്നു സോഷ്യൽ മീഡിയ

കോഴിക്കോട്: സി.പി.ഐ.എം സംസ്ഥാന സെക്രട്ടറി എം.വി. ഗോവിന്ദന് വഴിയിൽ വെച്ച് പെൻഷൻ തുക കൈമാറിയ സംഭവം മുൻകൂട്ടി തയ്യാറാക്കിയ നാടകമാണെന്ന വെളിപ്പെടുത്തലുമായി വയോധികൻ തന്നെ രംഗത്തെത്തി. കോഴിക്കോട് ബാലുശ്ശേരിയിൽ നടന്ന വികസന മുന്നേറ്റ ജാഥയ്ക്കിടെ നടന്ന ഈ സംഭവം വെറും ‘പി.ആർ. സ്റ്റണ്ട്’ ആണെന്ന് പണം നൽകിയ മൊയ്തീൻ മാധ്യമങ്ങളോട് പറഞ്ഞു. താൻ സ്വമനസ്സാലെ പോയി പണം നൽകിയതല്ലെന്നും, ചിലർ തന്നെ നിർബന്ധിച്ച് വേദിയിലേക്ക് കൊണ്ടുപോയി പണം നൽകിച്ച് വീഡിയോ എടുപ്പിക്കുകയായിരുന്നുവെന്നുമാണ് അദ്ദേഹത്തിന്റെ വെളിപ്പെടുത്തൽ.

കഴിഞ്ഞ തിങ്കളാഴ്ച ബാലുശ്ശേരിയിൽ വെച്ചാണ് വിവാദത്തിനസ്പദമായ സംഭവം നടന്നത്. മൊയ്തീൻ തന്റെ പോക്കറ്റിൽ നിന്ന് 2000 രൂപ എടുത്ത് എം.വി. ഗോവിന്ദന് നൽകുന്നതും, ഇത് പെൻഷൻ പണമാണെന്നും സർക്കാർ തുടരണമെന്നും പറയുന്ന ദൃശ്യങ്ങൾ ഇടതുപക്ഷ ഹാൻഡിലുകൾ വ്യാപകമായി പ്രചരിപ്പിച്ചിരുന്നു. പണം വാങ്ങിയ ഗോവിന്ദൻ അത് സ്നേഹപൂർവ്വം മൊയ്തീന്റെ പോക്കറ്റിൽ തന്നെ തിരികെ ഇട്ടു നൽകുന്നതും വീഡിയോയിൽ ഉണ്ടായിരുന്നു. എന്നാൽ, ഈ 2000 രൂപ തന്റെ പണമല്ലെന്നും വീഡിയോ എടുക്കാൻ വേണ്ടി നേതാക്കൾ തന്റെ കയ്യിൽ തന്നതാണെന്നും മൊയ്തീൻ ഇപ്പോൾ വ്യക്തമാക്കി.

“ആ പണം എന്റേതല്ല, പണം എന്റെ കയ്യിൽ തന്ന് ഫോട്ടോ എടുപ്പിച്ചതാണ്. ഗോവിന്ദൻ മാസ്റ്റർക്ക് പണം നൽകിയാൽ അദ്ദേഹം അത് ഉടൻ തന്നെ തിരികെ തരുമെന്ന് നേതാക്കൾ നേരത്തെ പറഞ്ഞിരുന്നു. അങ്ങനെയാണ് ഞാൻ പണം നൽകിയത്. ഞാൻ മനസ്സറിഞ്ഞ് കൊടുത്തതല്ല, വേദിയിൽ കയറ്റാൻ വേണ്ടി ചെയ്ത പണിയാണിത്,” മൊയ്തീൻ മാധ്യമങ്ങളോട് പറഞ്ഞു. ഇതോടെ, സർക്കാരിന്റെ ജനപ്രീതി തെളിയിക്കാൻ പാർട്ടി നടത്തിയ ശ്രമം വലിയ തിരിച്ചടിയായി മാറിയിരിക്കുകയാണ്.

സംഭവം പുറത്തുവന്നതോടെ കനത്ത പരിഹാസവുമായി പ്രതിപക്ഷം രംഗത്തെത്തി. സി.പി.ഐ.എമ്മിന്റെ ‘പി.ആർ. തിരക്കഥ’ പൊളിഞ്ഞെന്നും ജനങ്ങളെ വിഡ്ഢികളാക്കാനുള്ള ശ്രമമാണ് ഇവിടെ നടന്നതെന്നും കോൺഗ്രസ് നേതാക്കൾ ആരോപിച്ചു. ക്ഷേമ പെൻഷൻ വിതരണം മുടങ്ങിയിരിക്കുന്ന സാഹചര്യത്തിൽ ഇത്തരം വ്യാജ ദൃശ്യങ്ങൾ നിർമ്മിച്ച് ജനങ്ങളെ തെറ്റിദ്ധരിപ്പിക്കാനാണ് സർക്കാർ ശ്രമിക്കുന്നതെന്ന് സൈബർ ഇടങ്ങളിലും വ്യാപകമായ വിമർശനം ഉയരുന്നുണ്ട്.

അതേസമയം, പ്രതിപക്ഷം ക്ഷേമ പെൻഷനെ അവഹേളിക്കുകയാണെന്ന് മന്ത്രി മുഹമ്മദ് റിയാസ് പ്രതികരിച്ചു. ഇടതുപക്ഷം അധികാരത്തിൽ വന്നപ്പോഴാണ് പെൻഷൻ തുക വർദ്ധിപ്പിച്ചതെന്ന യാഥാർത്ഥ്യം മറച്ചുപിടിക്കാനാണ് ഇത്തരം വിവാദങ്ങൾ ഉണ്ടാക്കുന്നതെന്ന് അദ്ദേഹം പറഞ്ഞു. എന്നാൽ, വയോധികന്റെ നേരിട്ടുള്ള വെളിപ്പെടുത്തൽ സോഷ്യൽ മീഡിയയിലടക്കം പാർട്ടിയെ വലിയ തോതിൽ പ്രതിരോധത്തിലാക്കിയിരിക്കുകയാണ്.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt

PR slightly failed; Social media says Govindan Mash got cut