ഒന്റാരിയോയിൽ ജീവിതച്ചെലവ് വർധിക്കുന്നു; വിരമിക്കൽ ജീവിതം പ്രതിസന്ധിയിലെന്ന് റിപ്പോർട്ട്

ഒന്റാരിയോ: വർധിച്ചുവരുന്ന ജീവിതച്ചെലവ് ഒന്റാരിയോയിലെ മുതിർന്ന പൗരന്മാരുടെ വിരമിക്കൽ പദ്ധതികളെയും സാമ്പത്തിക ഭദ്രതയെയും കാര്യമായി ബാധിക്കുന്നതായി റിപ്പോർട്ട്. മികച്ച സമ്പാദ്യവും സ്വന്തമായി വീടുമുള്ളവർ പോലും ദൈനംദിന ചെലവുകൾക്കായി കടുത്ത നിയന്ത്രണങ്ങൾ ഏർപ്പെടുത്താൻ നിർബന്ധിതരാകുന്ന സാഹചര്യമാണുള്ളതെന്ന് റിപ്പോർട്ടുകളിൽ പറയുന്നു. 2026-ൽ ഒന്റാരിയോ നിവാസികളിൽ 66 ശതമാനം പേരും തങ്ങൾ ആഗ്രഹിക്കുന്ന രീതിയിൽ വിരമിക്കൽ കാലം ആസ്വദിക്കാനാവുമെന്ന് പ്രതീക്ഷിക്കുമ്പോഴും, 36 ശതമാനം പേർ ബില്ലുകൾ അടയ്ക്കാൻ കഴിയാത്ത അവസ്ഥ മാനസികാരോഗ്യത്തെ ബാധിക്കുന്നതായി വെളിപ്പെടുത്തി.

കിഴക്കൻ ഒന്റാരിയോയിൽ താമസിക്കുന്ന 69-കാരനായ ഡേവ് സ്കോട്ടിന്റെ അനുഭവം ഈ പ്രതിസന്ധിയുടെ ആഴം വ്യക്തമാക്കുന്നു. കടബാധ്യതകളില്ലാത്ത വീടും പ്രതിമാസം 5,000 ഡോളർ വരുമാനവും ഉണ്ടായിരുന്നിട്ടും, വിരമിക്കൽ കാലത്തെ വരുമാനം ജീവിതച്ചെലവിനൊപ്പമെത്തുന്നില്ലെന്ന് അദ്ദേഹം പറഞ്ഞു. സാമ്പത്തിക സുരക്ഷിതത്വത്തിനായി നിക്ഷേപങ്ങളിൽ മാറ്റം വരുത്തിയതോടെ വരുമാനം കുറഞ്ഞതായും, ഇറച്ചി ഉൾപ്പെടെയുള്ള അവശ്യസാധനങ്ങൾ വാങ്ങുന്നതിൽ പോലും നിയന്ത്രണം ഏർപ്പെടുത്തിയതായും സ്കോട്ട് വ്യക്തമാക്കി. തങ്ങളെപ്പോലെയുള്ള ഇടത്തരക്കാർ സമ്പന്നർക്കും ദരിദ്രർക്കും ഇടയിൽ കുടുങ്ങിക്കിടക്കുകയാണെന്ന് അദ്ദേഹം കൂട്ടിച്ചേർത്തു.

ഹാമിൽട്ടണിൽ താമസിക്കുന്ന 56-കാരിയായ കരോൾ ജോൺസൺ നേരിടുന്ന വെല്ലുവിളികളും സമാനമാണ്. ഭർത്താവിന് രോഗബാധയേറ്റതിനെത്തുടർന്ന് കുടുംബത്തിന്റെ ഏക വരുമാന സ്രോതസ്സായ ഇവർ, വാടകവീട്ടിൽ നിന്നും സ്വന്തം വീട്ടിലേക്ക് മാറിയത് കടുത്ത സാമ്പത്തിക ബാധ്യതയുണ്ടാക്കിയതായി വെളിപ്പെടുത്തി. ക്രെഡിറ്റ് കാർഡ് കടങ്ങളും നിത്യച്ചെലവുകളും നിയന്ത്രിക്കാൻ ഭക്ഷണത്തിന്റെ അളവ് കുറയ്ക്കേണ്ടി വരുന്നുണ്ടെന്നും ഫുഡ് ബാങ്കുകളെ ആശ്രയിക്കുന്നതിനെക്കുറിച്ച് ആലോചിക്കുകയാണെന്നും കരോൾ പറഞ്ഞു. 2024 ഏപ്രിലിനും 2025 മാർച്ചിനുമിടയിൽ ഒന്റാറിയോയിൽ പത്ത് ലക്ഷത്തിലധികം പേർ ഫുഡ് ബാങ്കുകളെ ആശ്രയിച്ചതായി ‘ഫീഡ് ഒന്റാരിയോ’യുടെ കണക്കുകൾ വ്യക്തമാക്കുന്നു.

പ്രായം എന്നതിലുപരി പണപ്പെരുപ്പത്തിൽ നിന്ന് നേട്ടമുണ്ടാക്കാൻ സാധിച്ചോ എന്നതാണ് നിലവിലെ സാമ്പത്തിക ഭദ്രത നിശ്ചയിക്കുന്നതെന്ന് ലൈസൻസുള്ള ഇൻസോൾവൻസി ട്രസ്റ്റി ഡഗ് ഹോയ്സ് നിരീക്ഷിച്ചു. 45-നും 55-നും ഇടയിൽ പ്രായമുള്ളവരാണ് നിലവിൽ ഏറ്റവും കൂടുതൽ സാമ്പത്തിക സമ്മർദ്ദം അനുഭവിക്കുന്നത്. കനത്ത മോർട്ട്ഗേജ് ബാധ്യതയുള്ള വീടുകൾ വിൽക്കുന്നതോ വാടകയിലേക്ക് മാറുന്നതോ സാമ്പത്തിക സുരക്ഷിതത്വം നൽകിയേക്കാമെന്നും അദ്ദേഹം നിർദ്ദേശിക്കുന്നു. ഭാവി അനിശ്ചിതത്വത്തിലാണെങ്കിലും നിലവിലുള്ള സമ്പാദ്യം സംരക്ഷിച്ചുകൊണ്ട് മുന്നോട്ട് പോകാനാണ് ഡേവ് സ്കോട്ടിനെപ്പോലെയുള്ളവർ തീരുമാനിച്ചിരിക്കുന്നത്.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt

Cost of living in Ontario is rising; retirement living is in crisis, report says