പത്തനംതിട്ട: കേരളത്തിന്റെ നൊമ്പരമായി മാറിയ പത്തു മാസം പ്രായമുള്ള കുഞ്ഞ് മാലാഖ ആലിൻ ഷെറിൻ എബ്രഹാമിന് നാട് വിങ്ങുന്ന ഹൃദയത്തോടെ യാത്രാമൊഴിയേകുന്നു. മസ്തിഷ്ക മരണം സംഭവിച്ചതിനെത്തുടർന്ന് അവയവദാനത്തിലൂടെ നാല് കുരുന്നുകൾക്ക് പുതുജീവൻ നൽകിയ ആലിന്റെ ഭൗതികദേഹം മല്ലപ്പള്ളി നെടുങ്ങാടപ്പള്ളിയിലെ വീട്ടിൽ പൊതുദർശനത്തിന് വെച്ചിരിക്കുകയാണ്. സംസ്ഥാനത്തെ ഏറ്റവും പ്രായം കുറഞ്ഞ അവയവദാതാവെന്ന ചരിത്രം കുറിച്ചാണ് ആലിൻ മടങ്ങുന്നത്.
ഫെബ്രുവരി അഞ്ചിന് കോട്ടയം പള്ളത്ത് വെച്ചുണ്ടായ ദാരുണമായ വാഹനാപകടത്തിലാണ് അരുൺ എബ്രഹാമിന്റേയും ഷെറിന്റേയും ഏകമകളായ ആലിന് ഗുരുതരമായി പരിക്കേറ്റത്. കൊച്ചിയിലെ സ്വകാര്യ ആശുപത്രിയിൽ ചികിത്സയിലിരിക്കെ മസ്തിഷ്ക മരണം സ്ഥിരീകരിക്കുകയായിരുന്നു. മകളുടെ വിയോഗത്തിന്റെ തീരാവേദനയിലും മറ്റുള്ളവർക്ക് ജീവൻ നൽകാനായി അവയവങ്ങൾ ദാനം ചെയ്യാൻ തയ്യാറായ മാതാപിതാക്കളുടെ തീരുമാനം കേരളം മുഴുവൻ ആദരവോടെയാണ് ഏറ്റെടുക്കുന്നത്.
ആലിന്റെ വൃക്കകൾ, ഹൃദയ വാൽവ്, കരൾ, നേത്രപടലങ്ങൾ എന്നിവയാണ് ദാനം ചെയ്തത്. ഇതിൽ കരൾ സ്വീകരിച്ചത് തിരുവനന്തപുരം കിംസ് ആശുപത്രിയിൽ ചികിത്സയിലുള്ള ആറു മാസം മാത്രം പ്രായമുള്ള കുരുന്നാണ്. ഇതോടെ മരണാനന്തര അവയവദാനത്തിലൂടെ കരൾ സ്വീകരിക്കുന്ന സംസ്ഥാനത്തെ ഏറ്റവും പ്രായം കുറഞ്ഞ കുട്ടിയായി ഈ ആറുമാസക്കാരൻ മാറി. ആലിന്റെ രണ്ട് വൃക്കകളും തിരുവനന്തപുരം മെഡിക്കൽ കോളേജിലെ പത്തു വയസ്സുകാരിയിലേക്കാണ് മാറ്റിവെച്ചത്.
ഇന്ന് ഉച്ചയ്ക്ക് രണ്ട് മണി വരെ വീട്ടിൽ പൊതുദർശനം തുടരും. മന്ത്രിമാർ ഉൾപ്പെടെ സാമൂഹിക-രാഷ്ട്രീയ രംഗത്തെ പ്രമുഖർ ആലിന് അന്തിമോപചാരമർപ്പിക്കാൻ വീട്ടിലെത്തുന്നുണ്ട്. മൂന്ന് മണിയോടെ വിലാപയാത്രയായി നെടുങ്ങാടപ്പള്ളി സെന്റ് തോമസ് സിഎസ്ഐ പള്ളിയിലേക്ക് കൊണ്ടുപോകുന്ന ഭൗതികദേഹം, നാല് മണിയോടെ ഔദ്യോഗിക ബഹുമതികളോടെ സംസ്കരിക്കും. കുഞ്ഞു മാലാഖയുടെ ത്യാഗത്തിന് ആദരസൂചകമായി പോലീസിന്റെ ഗാർഡ് ഓഫ് ഓണറോടെയായിരിക്കും സംസ്കാര ചടങ്ങുകൾ നടക്കുക.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Kerala bids farewell with tears; Nation pays last respects to Alin Sherin Abraham, a role model through organ donation
