ഒട്ടാവ: അമേരിക്കയുമായുള്ള കാനഡയുടെ അമിതമായ സാമ്പത്തിക ബന്ധം വരുംകാലങ്ങളിൽ വലിയ അപകടസാധ്യതകൾക്ക് വഴിവെച്ചേക്കാമെന്ന് സാമ്പത്തിക വിദഗ്ധരുടെ മുന്നറിയിപ്പ്. നയപരമായ മാറ്റങ്ങളും വ്യാപാര തീരുമാനങ്ങളും കാനഡയുടെ കയറ്റുമതി, നിക്ഷേപം, വിനോദസഞ്ചാര മേഖലകളെ പ്രതികൂലമായി ബാധിക്കാൻ സാധ്യതയുണ്ടെന്നാണ് അന്താരാഷ്ട്ര നയ വിദഗ്ധരുടെ വിലയിരുത്തൽ. ഒരു നൂറ്റാണ്ടിലേറെയായി തുടരുന്ന ഈ വാണിജ്യ ബന്ധം ഇപ്പോൾ വലിയൊരു മാറ്റത്തിന്റെ ഘട്ടത്തിലാണെന്ന് റിപ്പോർട്ടുകൾ സൂചിപ്പിക്കുന്നു.
കാനഡയുടെ ഊർജ്ജം, വാഹന നിർമ്മാണം തുടങ്ങിയ പ്രധാന മേഖലകൾ പൂർണ്ണമായും അമേരിക്കൻ വിപണിയെയാണ് ആശ്രയിക്കുന്നത്. സ്റ്റാറ്റിസ്റ്റിക്സ് കാനഡയുടെ കണക്കുകൾ പ്രകാരം പ്രതിദിനം 3.6 ബില്യൺ ഡോളറിന്റെ ഇടപാടുകളാണ് അതിർത്തി വഴി നടക്കുന്നത്. എന്നാൽ അമേരിക്കൻ നയങ്ങൾ കൂടുതൽ ആഭ്യന്തര കേന്ദ്രീകൃതമാകുന്ന സാഹചര്യത്തിൽ, ഈ അമിത ആശ്രയം തിരിച്ചടിയാകുമെന്ന് കാൽഗറി സർവകലാശാലയിലെ ഡയറക്ടർ കാർലോ ഡേഡ് ചൂണ്ടിക്കാട്ടി. വാഹന നിർമ്മാണത്തിനാവശ്യമായ ഭാഗങ്ങൾ പലതവണ അതിർത്തി കടന്നുപോകുന്ന രീതിയിലുള്ള വിതരണ ശൃംഖലയാണ് നിലവിലുള്ളത്. ഇത് മാറ്റുക എന്നത് പ്രായോഗികമായി ഏറെ പ്രയാസകരമാണെന്ന് സി.ഐ.ബി.സി ക്യാപിറ്റൽ മാർക്കറ്റ്സിലെ ആൻഡ്രൂ ഗ്രാന്തം നിരീക്ഷിക്കുന്നു.
വ്യാപാരത്തിൽ മാത്രമല്ല, നിക്ഷേപ രംഗത്തും വിനോദസഞ്ചാരത്തിലും കാനഡ വലിയ വെല്ലുവിളി നേരിടുന്നുണ്ട്. രാജ്യത്തെ ഖനന-നിർമ്മാണ മേഖലകളിലെ നിക്ഷേപത്തിന്റെ 68 ശതമാനവും അമേരിക്കയിൽ നിന്നുള്ളതാണ്. വിനോദസഞ്ചാര മേഖലയിലെ സന്ദർശകരിൽ 70 ശതമാനവും അമേരിക്കക്കാരായതിനാൽ അവരുടെ എണ്ണത്തിലുണ്ടാകുന്ന കുറവ് പ്രാദേശിക വരുമാനത്തെ സാരമായി ബാധിക്കുന്നു. ഈ സാഹചര്യത്തിൽ യൂറോപ്യൻ, ഏഷ്യൻ വിപണികളിലേക്ക് വ്യാപാരം വ്യാപിപ്പിക്കാനും പുതിയ നിക്ഷേപ പങ്കാളികളെ കണ്ടെത്താനുമുള്ള തീവ്ര ശ്രമത്തിലാണ് കനേഡിയൻ സർക്കാർ.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=gi_t
US dependence poses challenge to Canada's economy; experts urge caution
