ന്യൂഫൗണ്ട്ലാൻഡ് : ന്യൂഫൗണ്ട്ലാൻഡ് ആൻഡ് ലാബ്രഡോറിൽ നടപ്പിലാക്കാൻ ഉദ്ദേശിക്കുന്ന ലിക്വിഫൈഡ് നാച്ചുറൽ ഗ്യാസ് (LNG) പദ്ധതിയെച്ചൊല്ലി പുതിയ വിവാദം പുകയുന്നു. ദക്ഷിണ കൊറിയൻ കപ്പൽ നിർമ്മാണ കമ്പനിയായ ഹാൻവ ഓഷ്യനും ഫെർമ്യൂസ് എനർജിയും പദ്ധതിക്കായി കൈകോർത്തെങ്കിലും, പദ്ധതിയുടെ കേന്ദ്രമായ ഫെർമ്യൂസ് നഗരത്തിലെ മേയർ പറയുന്നത് തന്നെ ആരും വിവരം അറിയിച്ചിട്ടില്ലെന്നാണ്.
ഏകദേശം 20 ബില്യൺ ഡോളർ ചിലവ് പ്രതീക്ഷിക്കുന്ന ഈ വമ്പൻ പദ്ധതിയെക്കുറിച്ച് കമ്പനികൾ പത്രക്കുറിപ്പുകൾ ഇറക്കുകയും സർക്കാർ മന്ത്രിമാരുമായി കൂടിക്കാഴ്ച നടത്തുകയും ചെയ്തു. എന്നാൽ പ്രാദേശിക ഭരണകൂടമായ ഫെർമ്യൂസ് ടൗൺ കൗൺസിലിനെ പൂർണ്ണമായും അവഗണിച്ചുവെന്നാണ് മേയർ ജെറോം കെന്നിയുടെ പരാതി. “പത്രക്കുറിപ്പിലൂടെയാണ് ഞങ്ങൾ വിവരം അറിഞ്ഞത്, ഇതുവരെ കമ്പനികൾ ഞങ്ങളെ ബന്ധപ്പെട്ടിട്ടില്ല” എന്ന് അദ്ദേഹം വ്യക്തമാക്കി.
സമുദ്രാന്തർ ഭാഗത്തെ പ്രകൃതിവാതക ശേഖരം ഉപയോഗപ്പെടുത്തുക എന്നതാണ് ഫെർമ്യൂസ് എനർജിയുടെ ലക്ഷ്യം. എന്നാൽ നോർവീജിയൻ കമ്പനിയായ ഇക്വിനോർ (Equinor) പ്രദേശത്ത് പുതിയ ഓയിൽ പ്രോജക്ട് തുടങ്ങുമോ എന്നതിനെ ആശ്രയിച്ചായിരിക്കും എൽഎൻജി പദ്ധതിയുടെ ഭാവി. പദ്ധതി പ്രാഥമിക ഘട്ടത്തിൽ മാത്രമായതിനാലാണ് മേയറുമായി സംസാരിക്കാൻ വൈകുന്നതെന്നാണ് കമ്പനി സിഇഒ സ്വപൻ കതാരിയയുടെ വിശദീകരണം.
അതേസമയം, 1992-ലെ കോഡ് മത്സ്യബന്ധന നിരോധനത്തിന് ശേഷം കാര്യമായ വ്യവസായങ്ങളൊന്നുമില്ലാത്ത ഫെർമ്യൂസ് നഗരത്തിന് പുതിയ വികസനങ്ങൾ ആവശ്യമാണെന്ന് മേയർ സമ്മതിക്കുന്നു. എങ്കിലും, തങ്ങളുടെ നഗരത്തിൽ തുടങ്ങുന്ന ഒരു വലിയ പദ്ധതിയേക്കുറിച്ച് ആ നഗരത്തിലെ ജനങ്ങളെയും ഭരണാധികാരികളെയും മുൻകൂട്ടി അറിയിക്കാത്തതിലുള്ള അമർഷത്തിലാണ് അദ്ദേഹം.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
Companies trumpet rural Newfoundland LNG plans, but mayor says nobody’s talked to him
