ഫെബ്രുവരി അവസാനത്തോടെ കാനഡ വീണ്ടും തണുപ്പിന്റെ പിടിയിലാകും: മുന്നറിയിപ്പുമായി കാലാവസ്ഥാ നിരീക്ഷകർ

ഒട്ടാവ : കാനഡയുടെ കിഴക്കൻ മേഖലകളിൽ അതിശൈത്യം തുടരുന്നതിനിടെ പടിഞ്ഞാറൻ പ്രവിശ്യകളിൽ താപനില ഉയരുന്നതായി റിപ്പോർട്ട്. കിഴക്കൻ കാനഡയിൽ തണുപ്പ് കഠിനമായി തുടരുമ്പോൾ പടിഞ്ഞാറൻ മേഖലകളിൽ ഈ സീസണിലെ സാധാരണ നിലയേക്കാൾ ഉയർന്ന താപനിലയാണ് രേഖപ്പെടുത്തുന്നതെന്ന് കാലാവസ്ഥാ വിദഗ്ധൻ ഫിലിപ്സ് അറിയിച്ചു. എന്നാൽ ഫെബ്രുവരി അവസാന വാരത്തോടെ രാജ്യമൊട്ടാകെ വീണ്ടും അതിശൈത്യത്തിന്റെ പിടിയിലാകുമെന്നും അദ്ദേഹം വ്യക്തമാക്കി.

എഡ്മന്റണിൽ 6 ഡിഗ്രി സെൽഷ്യസും കാൽഗറിയിൽ 8 ഡിഗ്രി സെൽഷ്യസുമാണ് നിലവിലെ താപനില. ഈ നഗരങ്ങളിൽ രാത്രികാലങ്ങളിൽ താപനില പൂജ്യത്തിന് താഴേക്ക് പോകുമെങ്കിലും വരുംദിവസങ്ങളിൽ വെയിൽ ലഭ്യമാകുമെന്നാണ് പ്രവചനം. വാൻകൂവർ (9 ഡിഗ്രി സെൽഷ്യസ്), വിക്ടോറിയ (7 ഡിഗ്രി സെൽഷ്യസ്), പ്രിൻസ് ജോർജ് (3 ഡിഗ്രി സെൽഷ്യസ്) എന്നിവിടങ്ങളിലും സമാനമായ കാലാവസ്ഥയാണ് തുടരുന്നത്. വരുംദിവസങ്ങളിൽ മഴയ്ക്കും മഞ്ഞുവീഴ്ചയ്ക്കും സാധ്യതയുണ്ടെന്നും റിപ്പോർട്ട് വ്യക്തമാക്കുന്നു.

അറ്റ്‌ലാന്റിക് കാനഡയിലെ സെന്റ് ജോൺസിൽ 10 മുതൽ 20 സെന്റിമീറ്റർ വരെ മഞ്ഞുവീഴ്ചയ്ക്ക് സാധ്യതയുള്ളതിനാൽ പ്രത്യേക കാലാവസ്ഥാ ജാഗ്രതാ നിർദ്ദേശം പുറപ്പെടുവിച്ചു. ഉയർന്ന പ്രദേശങ്ങളിലാകും ശക്തമായ മഞ്ഞുവീഴ്ചയുണ്ടാകുകയെന്നും തീരപ്രദേശങ്ങളിൽ താപനിലയിൽ നേരിയ കുറവുണ്ടാകുമെന്നും എൻവയോൺമെന്റ് കാനഡ അറിയിച്ചു. ഷാർലറ്റ് ടൗൺ (-5 ഡിഗ്രി), ഹാലിഫാക്സ് (-6 ഡിഗ്രി), ഫ്രെഡറിക്ടൺ (-4 ഡിഗ്രി) എന്നിവിടങ്ങളിൽ വാരന്ത്യം വരെ നേരിയ മഞ്ഞുവീഴ്ചയ്ക്ക് സാധ്യതയുണ്ട്.

വടക്കൻ മേഖലയിലെ വൈറ്റ് ഹോഴ്സിൽ മണിക്കൂറിൽ 90 കിലോമീറ്റർ വേഗതയിൽ വീശുന്ന കാറ്റിനെത്തുടർന്ന് ബ്ലിസാർഡ് മുന്നറിയിപ്പ് നൽകി. ഇവിടെ താപനില -35 ഡിഗ്രി സെൽഷ്യസിലേക്ക് താഴാൻ സാധ്യതയുള്ളതിനാൽ ഹൈപ്പോതെർമിയ, ഫ്രോസ്റ്റ് ബൈറ്റ് എന്നിവയ്ക്കെതിരെ ജാഗ്രത പാലിക്കണമെന്ന് നിർദ്ദേശമുണ്ട്. യെല്ലോനൈഫ്, ഇഖാലുയിറ്റ് എന്നിവിടങ്ങളിൽ താപനില -20 ഡിഗ്രി സെൽഷ്യസായി തുടരുകയാണ്.
ഫെബ്രുവരി അവസാനത്തോടെ കിഴക്കൻ കാനഡയിലെ താപനിലയിൽ നേരിയ വർധനവുണ്ടാകുമെങ്കിലും മാസാവസാനം രാജ്യം വീണ്ടും തണുപ്പിലേക്ക് മടങ്ങുമെന്ന് ഫിലിപ്സ് വിലയിരുത്തി.

ശൈത്യകാലം ഇനിയും നീണ്ടുനിൽക്കുമെന്നും അദ്ദേഹം കൂട്ടിച്ചേർത്തു. വഴുക്കലുള്ള റോഡുകൾ മൂലം വീഴ്ചയ്ക്കും പരിക്കുകൾക്കും സാധ്യതയുള്ളതിനാൽ കാൽനടയാത്രക്കാർ ജാഗ്രത പാലിക്കണമെന്നും അധികൃതർ അറിയിച്ചു. മഞ്ഞുവീഴ്ചയെത്തുടർന്ന് നിലവിൽ വിവിധയിടങ്ങളിൽ ഗതാഗത തടസ്സങ്ങളും സ്കൂളുകൾക്ക് അവധിയും പ്രഖ്യാപിച്ചിട്ടുണ്ട്. വരും ദിവസങ്ങളിലെ കാലാവസ്ഥാ മാറ്റങ്ങൾ കൃത്യമായി നിരീക്ഷിച്ചു വരികയാണെന്ന് എൻവയോൺമെന്റ് കാനഡ വ്യക്തമാക്കി.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82

Canada will be in the grip of cold again by the end of February: Meteorologists warn