മുംബൈ: തിരക്കുപിടിച്ച മുംബൈ നഗരം ഇപ്പോൾ ഒരു സ്വപ്നലോകം പോലെ മനോഹരമാണ്. കെട്ടിടസമുച്ചയങ്ങൾക്കും ട്രാഫിക് ബ്ലോക്കുകൾക്കും ഇടയിലൂടെ കടന്നുപോകുന്ന ഈസ്റ്റേൺ എക്സ്പ്രസ് ഹൈവേയിൽ ഇപ്പോൾ വസന്തത്തിന്റെ വരവാണ്. ജപ്പാനിലെ വിഖ്യാതമായ ചെറി ബ്ലോസം കാഴ്ചകളെ അനുസ്മിരിപ്പിക്കും വിധം ഹൈവേയുടെ ഇരുവശങ്ങളിലും പിങ്ക് പൂക്കൾ വിരിഞ്ഞുനിൽക്കുന്നത് സോഷ്യൽ മീഡിയയിൽ ഇതിനോടകം തരംഗമായിക്കഴിഞ്ഞു. വിഖ്രോളി മുതൽ ഘാട്കോപ്പർ വരെയുള്ള ഭാഗങ്ങളിലൂടെയുള്ള യാത്ര ഇപ്പോൾ വിദേശരാജ്യങ്ങളിലെ ഏതോ മനോഹര വീഥികളിലൂടെയുള്ള യാത്രയ്ക്ക് തുല്യമാണ്.
കാഴ്ചയിൽ ചെറി ബ്ലോസം ആണെന്ന് തോന്നുമെങ്കിലും ഇവ ‘തബേബുയ ഹെറ്ററോഫില്ല’ അഥവാ ‘പിങ്ക് ട്രംപെറ്റ്’ മരങ്ങളാണ്. മധ്യ-ദക്ഷിണ അമേരിക്കൻ സ്വദേശിയായ ഈ മരങ്ങൾ മുംബൈയിലെ കഠിനമായ ചൂടിനെയും പുകയെയും അതിജീവിക്കാൻ പ്രാപ്തിയുള്ളവയാണ്. വസന്തമെത്തുന്നതോടെ ഇലകൾ പൂർണ്ണമായും പൊഴിക്കുകയും പകരം ചില്ലകളിൽ നിറയെ പിങ്ക് പൂക്കൾ വിരിയുകയും ചെയ്യുന്നത് ഇവയുടെ പ്രത്യേകതയാണ്.
വായുവിലെ വിഷാംശമുള്ള കണികകളെ ആഗിരണം ചെയ്യാനും നഗരത്തിലെ ശബ്ദമലിനീകരണം കുറയ്ക്കാനും ഈ മരങ്ങൾ സഹായിക്കുന്നുണ്ടെന്ന് ബൃഹൻമുംബൈ മുൻസിപ്പൽ കോർപ്പറേഷൻ അധികൃതർ വ്യക്തമാക്കുന്നു. എന്നാൽ ഈ കാഴ്ചയുടെ ഭംഗിക്കപ്പുറം ചില പാരിസ്ഥിതിക വശങ്ങളും ചർച്ചയാകുന്നുണ്ട്. 2026 ഫെബ്രുവരിയിലെ കണക്കുകൾ പ്രകാരം മുംബൈയിലെ വായുനിലവാരം അതീവ ഗുരുതരമായ അവസ്ഥയിലൂടെയാണ് കടന്നുപോകുന്നത്.
ഈ സാഹചര്യത്തിൽ പിങ്ക് ട്രംപെറ്റുകൾ നൽകുന്ന ആശ്വാസം വലുതാണെങ്കിലും, ഇവ നമ്മുടെ നാട്ടിലെ തനത് വൃക്ഷങ്ങളല്ലാത്തതിനാൽ പക്ഷികൾക്കും പ്രാണികൾക്കും സ്വാഭാവികമായ ആവാസവ്യവസ്ഥ ഒരുക്കാൻ സാധിക്കുന്നില്ലെന്ന് പരിസ്ഥിതി പ്രവർത്തകർ ചൂണ്ടിക്കാട്ടുന്നു. എങ്കിലും, മലിനീകരണത്തിന്റെ പുകമറകൾക്കിടയിൽ മുംബൈ നഗരത്തിന് പ്രത്യാശയുടെ പ്രതീകമായി ഈ പിങ്ക് വസന്തം പൂത്തുനിൽക്കുകയാണ്.
mumbai-residents-experience-pink-flowers-cherry-blossoms-japan-flowers-highway-trees-resilience-climate-change
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
