ഒട്ടാവ: സഖ്യരാജ്യങ്ങൾക്കിടയിലെ പ്രതിരോധ-സുരക്ഷാ പദ്ധതികൾക്ക് ധനസഹായം നൽകുന്നതിനായി സ്ഥാപിക്കുന്ന അന്താരാഷ്ട്ര ബാങ്കിന്റെ ആസ്ഥാനത്തിനായി ഒട്ടാവയ്ക്ക് പുറമെ മോൺട്രിയൽ, ടൊറന്റോ നഗരങ്ങളും രംഗത്തുണ്ട്. രാജ്യത്തെ ബിഗ് സിറ്റി മേയേഴ്സ് കോൺഫറൻസിനായി ഒട്ടാവയിൽ ഒത്തുകൂടിയ നഗരസഭാ അധ്യക്ഷന്മാർ തങ്ങളുടെ നഗരങ്ങൾക്കായി അവകാശവാദം ഉന്നയിച്ചു. ഏത് നഗരത്തിന്റെ അവകാശവാദമാണ് (Bid) ഫെഡറൽ സർക്കാർ മുന്നോട്ട് വെക്കുക എന്നതിൽ അന്തിമ തീരുമാനം വരാനിരിക്കുന്നതേയുള്ളൂ.
ശക്തമായ പ്രതിരോധ മേഖലയും വിദേശ എംബസികളുടെ സാന്നിധ്യവുമാണ് ഒട്ടാവയുടെ പ്രധാന അവകാശവാദമെന്ന് മേയർ മാർക്ക് സട്ട്ക്ലിഫ് അറിയിച്ചു. ബാങ്ക് ആസ്ഥാനം വരുന്നതോടെ ആയിരക്കണക്കിന് തൊഴിലവസരങ്ങളും ദീർഘകാല നിക്ഷേപവും നഗരത്തിലേക്ക് എത്തുമെന്ന് അദ്ദേഹം പ്രത്യാശ പ്രകടിപ്പിച്ചു.
എന്നാൽ പ്രതിരോധ സാമഗ്രികൾ പൂർണ്ണമായും നിർമ്മിക്കാൻ ശേഷിയുള്ള അപൂർവ്വം നഗരങ്ങളിലൊന്നാണ് മോൺട്രിയലെന്ന് മേയർ സോറയ മാർട്ടിനെസ് ഫെറാഡ അവകാശപ്പെട്ടു. പ്രതിരോധ വ്യവസായത്തിന്റെ ഭാവി കെട്ടിപ്പടുക്കാൻ ഒന്റാരിയോ ആണ് അനുയോജ്യമെന്നാണ് ടൊറന്റോയുടെ നിലപാട്.
ഒട്ടാവയിലെ വർധിച്ചുവരുന്ന പ്രതിരോധ-സാങ്കേതിക വ്യവസായം തങ്ങളുടെ ബിഡിന് കരുത്തേകുമെന്ന് അനുകൂലികൾ വിലയിരുത്തുന്നു. രാജ്യത്തെ ഏറ്റവും വലിയ ബഹിരാകാശ പദ്ധതിയുടെ ഭാഗമായി 200 ഉപഗ്രഹങ്ങൾ വിക്ഷേപിക്കാനൊരുങ്ങുന്ന ടെലിസാറ്റ് (Telesat), റോബോട്ടിക്സ്-ഡ്രോൺ പരിശോധനാ കേന്ദ്രമായ ഏരിയ എക്സ്.ഒ (Area X.O) എന്നിവ ഇതിൽ പ്രധാനമാണ്. 330 പ്രതിരോധ കമ്പനികൾക്ക് പുറമെ ബാങ്ക് ഓഫ് കാനഡ ഉൾപ്പെടെയുള്ള കേന്ദ്ര ധനകാര്യ സ്ഥാപനങ്ങളുടെ സാന്നിധ്യവും ഒട്ടാവയ്ക്ക് അനുകൂല ഘടകങ്ങളായി ഇൻവെസ്റ്റ് ഒട്ടാവ പ്രസിഡന്റ് സോണിയ ഷോറി ചൂണ്ടിക്കാട്ടി.
ലോകത്തിലെ തന്നെ ഇത്തരത്തിലുള്ള ആദ്യത്തെ മൾട്ടി ലാറ്ററൽ ഡിഫൻസ് ബാങ്കാണിത്. നയതന്ത്ര കാര്യാലയങ്ങളും പരമാധികാര ധനകാര്യ സ്ഥാപനങ്ങളും ഒത്തുചേരുന്ന തലസ്ഥാന നഗരങ്ങളിലാണ് ഇത്തരം ബാങ്കുകൾ സാധാരണയായി സ്ഥാപിക്കാറുള്ളതെന്ന് സോണിയ ഷോറി വ്യക്തമാക്കി. സാമ്പത്തിക വളർച്ചയ്ക്കും പൊതുമേഖലയിലെ തൊഴിൽ നഷ്ടം പരിഹരിക്കാനും ബാങ്ക് ആസ്ഥാനം സഹായിക്കുമെന്നാണ് ഒട്ടാവയുടെ വിലയിരുത്തൽ.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
Tug of war for Defence Bank headquarters; Ottawa or Montreal? Canada’s big cities face off
