ബംഗളൂരു: കോൺഫിഡന്റ് ഗ്രൂപ്പ് ചെയർമാൻ ഡോ. റോയ് സി. ജെ.യുടെ നിര്യാണത്തെത്തുടർന്ന് കമ്പനിയുമായി ബന്ധപ്പെട്ട് പ്രചരിക്കുന്ന വാർത്തകൾ അടിസ്ഥാനരഹിതമാണെന്ന് മാനേജിങ് ഡയറക്ടർ ടി. എ. ജോസഫ്. ചെയർമാന്റെ വിയോഗവുമായി ബന്ധപ്പെട്ട പോലീസ് നടപടിക്രമങ്ങൾക്കായി താൻ നിലവിൽ ബംഗളൂരുവിൽ തുടരുകയാണെന്നും, അതിനാലാണ് മുൻപ് നിശ്ചയിച്ച വാർത്താസമ്മേളനം മാറ്റിവെക്കേണ്ടി വന്നതെന്നും അദ്ദേഹം വ്യക്തമാക്കി. ഡോ. റോയ് സി. ജെ.യുടെ മരണം കമ്പനിക്കും അദ്ദേഹത്തെ സ്നേഹിക്കുന്നവർക്കും വലിയ നഷ്ടമാണെന്നും മികച്ചൊരു പ്രചോദകനെയാണ് നഷ്ടമായതെന്നും അദ്ദേഹം അനുസ്മരിച്ചു.
ചെയർമാന്റെ മരണത്തിന് പിന്നാലെ നിക്ഷേപകർക്കിടയിൽ ആശങ്കയുണ്ടാക്കാൻ ചിലർ ശ്രമിക്കുന്നത് ശ്രദ്ധയിൽപ്പെട്ടിട്ടുണ്ടെന്നും എന്നാൽ ആരും ഭയപ്പെടേണ്ട സാഹചര്യമില്ലെന്നും മാനേജിങ് ഡയറക്ടർ ഉറപ്പുനൽകി. ബംഗളൂരുവിൽ കമ്പനി പ്രധാനമായും ‘മാസ്റ്റർ ഡെവലപ്പർ’ എന്ന നിലയിലാണ് പ്രവർത്തിക്കുന്നത്. അതിനാൽ അവിടെ നിർമ്മാണ സംബന്ധമായ വലിയ ബാധ്യതകൾ കമ്പനിക്കില്ല. കേരളത്തിലെ പ്രവർത്തനങ്ങൾ കഴിഞ്ഞ 15 വർഷമായി എം.ഡി എന്ന നിലയിൽ താനാണ് നേരിട്ട് നിയന്ത്രിക്കുന്നത്. മുൻപത്തെപ്പോലെ തന്നെ കേരളത്തിലെ എല്ലാ പദ്ധതികളും ശക്തമായി മുന്നോട്ട് പോകുമെന്നും അദ്ദേഹം അറിയിച്ചു.
സോഷ്യൽ മീഡിയയിലൂടെയും യൂട്യൂബ് ചാനലുകളിലൂടെയും കമ്പനിക്കെതിരെ തെറ്റായ വിവരങ്ങൾ പ്രചരിപ്പിക്കുന്നത് നിഗൂഢ ലക്ഷ്യങ്ങളോടെയാണെന്ന് ടി. എ. ജോസഫ് പറഞ്ഞു. ഇ.ഡി, സി.ബി.ഐ, ഇൻകം ടാക്സ് തുടങ്ങിയ ഏജൻസികളുടെ അന്വേഷണം നടക്കുന്നുണ്ടെന്ന വാർത്തകൾ അദ്ദേഹം പൂർണ്ണമായും തള്ളി. ഇത്തരം പ്രചാരണങ്ങൾക്ക് തെളിവുണ്ടെങ്കിൽ ഓഫീസിലെത്താൻ അദ്ദേഹം വെല്ലുവിളിച്ചു. കമ്പനിയിൽ കള്ളപ്പണമോ അനധികൃത ഇടപാടുകളോ ഇല്ലെന്നും ഒരു ഉപഭോക്താവിനെ പോലും തങ്ങൾ വഞ്ചിച്ചിട്ടില്ലെന്നും അദ്ദേഹം കൂട്ടിച്ചേർത്തു. വിയോഗത്തിന്റെ വേദനയിലുള്ള കുടുംബത്തെ കൂടുതൽ വേദനിപ്പിക്കുന്ന രീതിയിലുള്ള പ്രചാരണങ്ങളിൽ നിന്ന് പിന്തിരിയണമെന്നും അദ്ദേഹം അഭ്യർത്ഥിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Confident Group will continue uninterrupted; Don't believe fake news: Managing Director T. A. Joseph responds
