ന്യൂഡൽഹി: ഇന്ത്യയിൽ നിന്നുള്ള ഉൽപ്പന്നങ്ങളുടെ ഇറക്കുമതി താരിഫ് 18 ശതമാനമായി കുറയ്ക്കാനുള്ള അമേരിക്കൻ തീരുമാനത്തിന് പിന്നാലെ ട്രംപിനോട് നന്ദി പറഞ്ഞ് പ്രധാനമന്ത്രി നരേന്ദ്ര മോദി. ടെലിഫോൺ സംഭാഷണത്തിലൂടെയാണ് അദ്ദേഹം അമേരിക്കൻ പ്രസിഡന്റിനോട് നന്ദി രേഖപ്പെടുത്തിയത്.
ഇന്ത്യൻ ഉൽപ്പാദന മേഖലയ്ക്കും കയറ്റുമതിക്കും വലിയ ഉത്തേജനം നൽകുന്ന നീക്കമാണിതെന്ന് പ്രധാനമന്ത്രി വ്യക്തമാക്കി. 140 കോടി ജനങ്ങളുടെ പ്രതിനിധിയായി ട്രംപിന്റെ ഈ തീരുമാനത്തെ സ്വാഗതം ചെയ്യുന്നതായും, വരും കാലങ്ങളിൽ ഇരുരാജ്യങ്ങളും തമ്മിലുള്ള സാമ്പത്തിക ബന്ധം കൂടുതൽ കരുത്താർജ്ജിക്കുമെന്നും അദ്ദേഹം പറഞ്ഞു. ലോകത്തിലെ ഏറ്റവും വലിയ രണ്ട് ജനാധിപത്യ രാജ്യങ്ങൾ തമ്മിലുള്ള ഈ സഹകരണം ആഗോള വിപണിയിൽ വലിയ അവസരങ്ങൾ തുറക്കുമെന്നാണ് കേന്ദ്ര സർക്കാരിന്റെ വിലയിരുത്തൽ.
ആഗോള സമാധാനത്തിനും സ്ഥിരതയ്ക്കും വേണ്ടി ഡൊണാൾഡ് ട്രംപ് നടത്തുന്ന നീക്കങ്ങളെ ഇന്ത്യ പൂർണ്ണമായി പിന്തുണയ്ക്കുമെന്ന് പ്രധാനമന്ത്രി ഉറപ്പുനൽകി. ട്രംപിന്റെ നേതൃത്വത്തെ പ്രശംസിച്ച അദ്ദേഹം, പുതിയ തീരുമാനങ്ങൾ ഇരുരാജ്യങ്ങളിലെയും പൗരന്മാർക്ക് ഗുണകരമാകുമെന്ന് ചൂണ്ടിക്കാട്ടി. ഇന്ത്യ-യുഎസ് പങ്കാളിത്തം പുതിയ ഉയരങ്ങളിലേക്ക് എത്തിക്കാൻ ട്രംപുമായി ചേർന്ന് പ്രവർത്തിക്കുമെന്നും അദ്ദേഹം കൂട്ടിച്ചേർത്തു.
അമേരിക്കൻ വിപണിയിൽ ഇന്ത്യൻ ഉൽപ്പന്നങ്ങൾക്ക് കുറഞ്ഞ നിരക്കിൽ പ്രവേശനം ലഭിക്കുന്നത് രാജ്യത്തെ ചെറുകിട-വൻകിട വ്യവസായങ്ങൾക്ക് ഒരുപോലെ ഗുണകരമാകും. കഴിഞ്ഞ ദിവസമാണ് ചൈന ഉൾപ്പെടെയുള്ള രാജ്യങ്ങൾക്കുമേൽ താരിഫ് വർദ്ധിപ്പിച്ചപ്പോൾ ഇന്ത്യക്കുള്ള താരിഫ് കുറയ്ക്കാൻ അമേരിക്കൻ ഭരണകൂടം തീരുമാനിച്ചത്. ഈ പശ്ചാത്തലത്തിൽ ഇരു നേതാക്കളും തമ്മിലുള്ള സംഭാഷണം അതീവ പ്രാധാന്യത്തോടെയാണ് സാമ്പത്തിക വിദഗ്ധർ നോക്കിക്കാണുന്നത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
US reduces import tariffs on Indian products by 18%; Modi thanks Trump for decision
