ബെംഗളൂരു: കോൺഫിഡന്റ് ഗ്രൂപ്പ് സ്ഥാപകൻ ഡോ. സി ജെ റോയിയുടെ നിര്യാണത്തെത്തുടർന്ന് കമ്പനിയുടെ പുതിയ നേതൃത്വത്തെ കുടുംബം പ്രഖ്യാപിച്ചു. റോയിയുടെ മകൻ രോഹിത്, കേരളത്തിലെ പ്രവർത്തനങ്ങളുടെ ചുമതലയുള്ള ടി എ ജോസഫ് എന്നിവർ ചേർന്ന് ഇനി ഗ്രൂപ്പിനെ നയിക്കുമെന്ന് സഹോദരൻ സി ജെ ബാബു അറിയിച്ചു. നിലവിലുള്ള എല്ലാ പ്രോജക്ടുകളും മുൻനിശ്ചയിച്ച പ്രകാരം തന്നെ മുന്നോട്ട് കൊണ്ടുപോകുമെന്നും അദ്ദേഹം വ്യക്തമാക്കി.
ഡോ. സി ജെ റോയിയുടെ സംസ്കാര ചടങ്ങുകൾക്ക് ശേഷം ബെംഗളൂരുവിൽ മാധ്യമങ്ങളോട് സംസാരിക്കുകയായിരുന്നു കുടുംബാംഗങ്ങൾ. റോയിക്ക് സാമ്പത്തിക ബാധ്യതകളോ മറ്റ് കടങ്ങളോ ഉണ്ടായിരുന്നില്ലെന്ന് സി ജെ ബാബു വ്യക്തമാക്കി. മരണവുമായി ബന്ധപ്പെട്ട് കുടുംബത്തിനുള്ള ചില ആശങ്കകൾ പൊലീസിനെ അറിയിച്ചിട്ടുണ്ട്. നിലവിലെ കർണാടക പൊലീസ് അന്വേഷണത്തിൽ തൃപ്തിയുണ്ടെന്നും അദ്ദേഹം കൂട്ടിച്ചേർത്തു.
പിതാവിന്റെ മരണം ഏൽപ്പിച്ച ആഘാതം വാക്കുകൾക്ക് അതീതമാണെന്ന് മകൻ രോഹിത് വ്യക്തമാക്കി. പിതാവ് വലിയൊരു മനുഷ്യനായിരുന്നുവെന്നും അദ്ദേഹം ജീവിച്ചിരുന്നപ്പോൾ മാധ്യമങ്ങൾ നൽകിയ പിന്തുണയ്ക്ക് നന്ദി പറയുന്നതായും രോഹിത് പറഞ്ഞു. ആദായനികുതി ഉദ്യോഗസ്ഥരിൽ നിന്നുള്ള സമ്മർദ്ദത്തെക്കുറിച്ച് പിതാവ് തന്നോട് നേരിട്ട് ഒന്നും പങ്കുവെച്ചിരുന്നില്ലെന്നും വികാരാധീനനായി അദ്ദേഹം വ്യക്തമാക്കി.
ബെംഗളൂരുവിലെ ബന്നാർഘട്ട റോഡിലുള്ള ‘നേച്ചേഴ്സ് ലക്ഷ്വറി കാസ്കേഡിൽ’ ഔദ്യോഗിക ബഹുമതികളോടെയായിരുന്നു സംസ്കാരം. രാവിലെ 10 മണി മുതൽ ഉച്ചയ്ക്ക് 2 മണി വരെ നടന്ന പൊതുദർശനത്തിൽ രാഷ്ട്രീയ, വ്യവസായ, സിനിമാ മേഖലകളിലെ പ്രമുഖരടക്കം ആയിരക്കണക്കിന് ആളുകൾ അന്ത്യാഞ്ജലി അർപ്പിച്ചു.
കർണാടക ഗതാഗത മന്ത്രി രാമലിംഗ റെഡ്ഡി, നിർമ്മാതാവ് ആന്റണി പെരുമ്പാവൂർ, സംവിധായകൻ വി കെ പ്രകാശ് തുടങ്ങിയവർ ചടങ്ങിൽ പങ്കെടുത്തു. കഴിഞ്ഞ വെള്ളിയാഴ്ചയാണ് ഡോ. സി ജെ റോയിയെ ബെംഗളൂരുവിലെ ഓഫീസിൽ മരിച്ച നിലയിൽ കണ്ടെത്തിയത്. റിയൽ എസ്റ്റേറ്റ് മേഖലയിൽ വിപ്ലവകരമായ മാറ്റങ്ങൾ കൊണ്ടുവന്ന അദ്ദേഹം 160-ലധികം പ്രോജക്ടുകൾ പൂർത്തിയാക്കിയിട്ടുണ്ട്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
New leadership for Confident Group; CJ Roy’s successors announced, family takes crucial decision
