നാട്ടിലെ വീടോ വസ്തുവോ വിൽക്കാൻ ആഗ്രഹിക്കുന്ന പ്രവാസികൾക്ക് ഏറെ ആശ്വാസം നൽകുന്ന പ്രഖ്യാപനവുമായി കേന്ദ്ര ബജറ്റ്. ഇനി മുതൽ വസ്തു വിൽക്കുമ്പോൾ മുൻകൂർ നികുതി (TDS) അടയ്ക്കുന്നതിനായി സങ്കീർണ്ണമായ ‘ടാൻ’ (TAN – ടാക്സ് ഡിഡക്ഷൻ അക്കൗണ്ട് നമ്പർ) എടുക്കേണ്ടതില്ല. പകരം പാൻ (PAN) കാർഡ് ഉപയോഗിച്ച് തന്നെ ഈ നടപടികൾ പൂർത്തിയാക്കാം.
നിലവിൽ പ്രവാസികളിൽ നിന്നും വസ്തു വാങ്ങുന്നവർ ടിഡിഎസ് അടയ്ക്കുന്നതിനായി ടാൻ നമ്പർ എടുക്കണമെന്നത് നിർബന്ധമായിരുന്നു. ഈ നമ്പർ ലഭിക്കാനുള്ള കാലതാമസവും ബുദ്ധിമുട്ടും കാരണം പലപ്പോഴും പ്രവാസികളുടെ വസ്തു ഇടപാടുകൾ നീണ്ടുപോകുകയോ മുടങ്ങുകയോ ചെയ്യുന്ന സാഹചര്യം പതിവായിരുന്നു. എന്നാൽ പുതിയ ബജറ്റ് നിർദ്ദേശപ്രകാരം, വസ്തു വാങ്ങുന്ന ഇന്ത്യൻ പൗരന്റെ പാൻ കാർഡ് അടിസ്ഥാനമാക്കിയുള്ള ചെല്ലാൻ ഉപയോഗിച്ച് തന്നെ ടിഡിഎസ് ഇടപാടുകൾ നടത്താൻ സാധിക്കും.
പ്രവാസികളെ സംബന്ധിച്ചിടത്തോളം വലിയൊരു തലവേദനയാണ് ഇതിലൂടെ ഒഴിവാകുന്നത്. വസ്തു വിൽപ്പനയുമായി ബന്ധപ്പെട്ട ആദായനികുതി നടപടികൾ കൂടുതൽ ലളിതമാകുന്നതോടെ പ്രവാസികൾക്ക് നാട്ടിലെ നിക്ഷേപങ്ങളും ഇടപാടുകളും വേഗത്തിൽ കൈകാര്യം ചെയ്യാൻ സാധിക്കും.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Relief for expatriates: No more need for 'TAN' to sell property in the country; Budget announcement
