റജീന: സസ്കാച്ചവാൻ പ്രവിശ്യയിലേക്ക് കുടിയേറാൻ ആഗ്രഹിക്കുന്നവർക്ക് സുപ്രധാന അറിയിപ്പ്. സസ്കാച്ചവാൻ ഇമിഗ്രന്റ് നോമിനി പ്രോഗ്രാമിന് (SINP) കീഴിൽ നിശ്ചയിച്ചിട്ടുള്ള മൂന്ന് പ്രധാന തൊഴിൽ മേഖലകളിലെ ആദ്യഘട്ട അപേക്ഷാ പരിധി (Cap) പൂർത്തിയായി. Accommodation and Food Services, റീട്ടെയിൽ വ്യാപാരം (Retail Trade), ട്രക്കിംഗ് (Trucking) എന്നീ മേഖലകളിലാണ് നിലവിൽ അപേക്ഷകൾ സ്വീകരിക്കുന്നത് നിർത്തിവെച്ചത്.
ജനുവരി 13-ന് ആരംഭിച്ച ഈ വർഷത്തെ ആദ്യ അപേക്ഷാ ഘട്ടത്തിൽ റെസ്റ്റോറന്റ്, റീട്ടെയിൽ മേഖലകൾ വെറും ഒരു ദിവസം കൊണ്ട് തന്നെ നിശ്ചിത എണ്ണത്തിൽ എത്തിയിരുന്നു. ജനുവരി 20-ഓടെ ട്രക്കിംഗ് മേഖലയിലെ ഒഴിവുകളും പൂർണ്ണമായി. ഈ മൂന്ന് മേഖലകളിലുമായി ആകെ 300 അപേക്ഷകളാണ് ഈ ഘട്ടത്തിൽ പ്രവിശ്യ സ്വീകരിച്ചത്. ഇതിൽ 180 എണ്ണം ഭക്ഷണ-താമസ മേഖലയിലും, 60 വീതം അപേക്ഷകൾ റീട്ടെയിൽ, ട്രക്കിംഗ് മേഖലകളിലുമാണ്.
ഈ വർഷം സസ്കാച്ചവാന് ആകെ 4,761 നോമിനേഷൻ ഒഴിവുകളാണ് ഫെഡറൽ സർക്കാർ അനുവദിച്ചിരിക്കുന്നത്. ഇതിൽ 25 ശതമാനം ഇത്തരം നിയന്ത്രിത മേഖലകളിലെ തൊഴിലാളികൾക്കായി നീക്കിവെച്ചിട്ടുള്ളതാണ്. നിലവിൽ ആദ്യ ഘട്ടം അവസാനിച്ചെങ്കിലും ആശങ്കപ്പെടേണ്ടതില്ലെന്ന് അധികൃതർ അറിയിച്ചു. അടുത്ത അപേക്ഷാ ഘട്ടം മാർച്ച് 2-ന് ആരംഭിക്കും. തുടർന്ന് മെയ്, ജൂലൈ, സെപ്റ്റംബർ, നവംബർ മാസങ്ങളിലും പുതിയ അപേക്ഷകൾ സമർപ്പിക്കാൻ അവസരമുണ്ടാകും.
ഈ പദ്ധതി പ്രകാരം അപേക്ഷിക്കാൻ ഉദ്യോഗാർത്ഥികൾക്ക് കുറഞ്ഞത് ആറുമാസമോ അതിൽ കുറവോ കാലാവധിയുള്ള വർക്ക് പെർമിറ്റ് ഉണ്ടായിരിക്കണം. കൂടാതെ തൊഴിലുടമയിൽ നിന്നുള്ള സാധുവായ ജോബ് അപ്രൂവൽ ലെറ്ററും (JAL) നിർബന്ധമാണ്. നിശ്ചിത സമയപരിധിക്ക് പുറത്ത് സമർപ്പിക്കുന്ന അപേക്ഷകൾ പരിഗണിക്കുന്നതല്ലെന്നും അധികൃതർ വ്യക്തമാക്കിയിട്ടുണ്ട്. ഈ വർഷം ലഭിക്കുന്ന എല്ലാ അപേക്ഷകളും ഈ വർഷം തന്നെ നടപടികൾ പൂർത്തിയാക്കി നോമിനേഷൻ നൽകാനാണ് പ്രവിശ്യയുടെ തീരുമാനം.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Saskatchewan hits cap for worker nominations in three sectors
