മുംബൈ: പ്രശസ്ത ബോളിവുഡ് സംവിധായകൻ രോഹിത് ഷെട്ടിയുടെ മുംബൈ ജൂഹുവിലെ വീടിന് മുൻപിൽ ശനിയാഴ്ച രാത്രി വെടിവെയ്പ്പുണ്ടായി. ബൈക്കിലെത്തിയ സംഘമാണ് അക്രമം നടത്തിയതെന്നാണ് പ്രാഥമിക നിഗമനം. വസതിക്ക് നേരെ നാല് തവണ വെടിയുതിർത്തതായും എന്നാൽ സംഭവത്തിൽ ആർക്കും പരിക്കേറ്റിട്ടില്ലെന്നും പോലീസ് സ്ഥിരീകരിച്ചു. ‘സിങ്കം’ ഉൾപ്പെടെയുള്ള ഹിറ്റ് ചിത്രങ്ങളുടെ സംവിധായകനായ രോഹിത് ഷെട്ടിക്ക് നേരെയുണ്ടായ ഈ ആക്രമണം ബോളിവുഡ് സിനിമാ ലോകത്തെ ഞെട്ടിച്ചിട്ടുണ്ട്.
വെടിവെയ്പ്പ് നടന്ന ഉടൻ തന്നെ സിറ്റി പോലീസ്, ക്രൈംബ്രാഞ്ച്, ഫോറൻസിക് സംഘം എന്നിവർ സ്ഥലത്തെത്തി പരിശോധന നടത്തി. പ്രതികളെ പിടികൂടാൻ നഗരത്തിലുടനീളം സുരക്ഷയും പരിശോധനയും കർശനമാക്കിയതായി മുംബൈ പോലീസ് കമ്മീഷണർ അറിയിച്ചു. മുതിർന്ന ഉദ്യോഗസ്ഥരുടെ മേൽനോട്ടത്തിലാണ് നിലവിൽ അന്വേഷണം പുരോഗമിക്കുന്നത്. ആക്രമണത്തിന് പിന്നിൽ അന്താരാഷ്ട്ര ഗുണ്ടാ സംഘങ്ങൾക്ക് പങ്കുണ്ടോ എന്ന കാര്യം പോലീസ് ഗൗരവമായി പരിശോധിക്കുന്നുണ്ട്.
സംഭവസ്ഥലത്തുനിന്നും വെടിയുണ്ടകളുടെ അവശിഷ്ടങ്ങൾ ഫോറൻസിക് സംഘം ശേഖരിച്ചിട്ടുണ്ട്. പ്രദേശത്തെ സിസിടിവി ദൃശ്യങ്ങൾ കേന്ദ്രീകരിച്ച് അക്രമികളെ കണ്ടെത്താനുള്ള ശ്രമത്തിലാണ് പോലീസ്. സംവിധായകന്റെ വീടിന് മുൻപിൽ കനത്ത പോലീസ് സുരക്ഷയാണ് ഇപ്പോൾ ഏർപ്പെടുത്തിയിരിക്കുന്നത്. കഴിഞ്ഞ കുറച്ചു കാലമായി ബോളിവുഡ് പ്രമുഖർക്ക് നേരെ നടക്കുന്ന ഭീഷണിപ്പെടുത്തലുകളുടെയും ആക്രമണങ്ങളുടെയും പശ്ചാത്തലത്തിൽ അതീവ ജാഗ്രതയിലാണ് സുരക്ഷാ ഏജൻസികൾ.
അന്വേഷണവുമായി ബന്ധപ്പെട്ട് കൂടുതൽ വിവരങ്ങൾ ലഭ്യമാകാനുണ്ടെന്നും പ്രതികളെക്കുറിച്ച് നിർണ്ണായക സൂചനകൾ ലഭിച്ചിട്ടുണ്ടെന്നും പോലീസ് വൃത്തങ്ങൾ സൂചിപ്പിച്ചു. സംഭവത്തിൽ സിനിമാ രംഗത്തെ പ്രമുഖർ ഉൾപ്പെടെയുള്ളവർ ആശങ്ക രേഖപ്പെടുത്തിയിട്ടുണ്ട്. ബോളിവുഡ് താരങ്ങൾക്കും സംവിധായകർക്കും നേരെയുള്ള ഗുണ്ടാ സംഘങ്ങളുടെ നീക്കമാണോ ഇതെന്ന് പോലീസ് പരിശോധിച്ചുവരികയാണ്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
Shooting in front of Bollywood director Rohit Shetty’s house; Crime Branch begins investigation
