ഷാർലറ്റ്ടൗൺ: പ്രിൻസ് എഡ്വേർഡ് ഐലൻഡിലെ പുതിയ അധ്യയന വർഷത്തിലേക്കുള്ള കിന്റർഗാർട്ടൻ പ്രവേശന നടപടികൾ പുരോഗമിക്കുമ്പോഴും, അധ്യാപക ക്ഷാമവും ക്ലാസ് മുറികളുടെ ക്രമീകരണവും അധികൃതർക്ക് വെല്ലുവിളിയാകുന്നു. ഡിസംബറിൽ ആരംഭിച്ച രജിസ്ട്രേഷൻ നടപടികളോട് മികച്ച പ്രതികരണമാണ് ലഭിക്കുന്നതെങ്കിലും, അവസാന നിമിഷം എത്തുന്ന അപേക്ഷകൾ സ്കൂൾ ഭരണനിർവ്വഹണത്തെ പ്രതിസന്ധിയിലാക്കുമെന്ന് പി.ഇ.ഐ പബ്ലിക് സ്കൂൾ ബ്രാഞ്ച് എച്ച്.ആർ ഡയറക്ടർ ഷോൺ ബ്രിൻസൺ അറിയിച്ചു. രക്ഷിതാക്കൾ കൃത്യസമയത്ത് കുട്ടികളെ രജിസ്റ്റർ ചെയ്യാത്തത് വരും മാസങ്ങളിലെ ആസൂത്രണത്തെ ബാധിക്കുമെന്ന ആശങ്കയിലാണ് അധികൃതർ.
ഇംഗ്ലീഷ്, ഫ്രഞ്ച് സ്കൂൾ ബോർഡുകൾക്ക് കീഴിലുള്ള കിന്റർഗാർട്ടൻ ക്ലാസുകളിൽ ഒരു ബാച്ചിൽ പരമാവധി 18 കുട്ടികളെ മാത്രമേ പ്രവേശിപ്പിക്കുകയുള്ളൂ. സെപ്റ്റംബറിൽ ആരംഭിക്കുന്ന അധ്യയന വർഷത്തിന് മുന്നോടിയായി മതിയായ അധ്യാപകരെയും അനുബന്ധ സൗകര്യങ്ങളെയും ഉറപ്പാക്കാൻ കൃത്യമായ കണക്കുകൾ ആവശ്യമാണ്. നിലവിൽ ഫ്രഞ്ച് ഭാഷാ സ്കൂളുകളിൽ അധ്യാപകക്ഷാമം നേരിടുന്നതിനാൽ, വൈകിയുള്ള രജിസ്ട്രേഷൻ അവിടെ കൂടുതൽ സങ്കീർണ്ണതകൾ സൃഷ്ടിക്കുന്നുണ്ട്.
വസന്തകാലത്തിന് മുൻപായി പരമാവധി കുട്ടികളെ എൻറോൾ ചെയ്യിപ്പിക്കാനാണ് വിദ്യാഭ്യാസ വകുപ്പിന്റെ നീക്കം. കുട്ടികൾക്കും രക്ഷിതാക്കൾക്കും പുതിയ സ്കൂൾ അന്തരീക്ഷവുമായി പൊരുത്തപ്പെടാൻ ആവശ്യമായ തയ്യാറെടുപ്പുകൾക്ക് നേരത്തെയുള്ള രജിസ്ട്രേഷൻ സഹായിക്കുമെന്ന് അസോസിയേഷൻ ഓഫ് ഫ്രഞ്ച് ലാംഗ്വേജ് ഏർലി ചൈൽഡ്ഹുഡ് സെന്റർ എക്സിക്യൂട്ടീവ് ഡയറക്ടർ കാത്ലീൻ കൂച്ചർ വ്യക്തമാക്കി. പി.എസ്.ബി (PSB) വെബ്സൈറ്റ് വഴി രജിസ്ട്രേഷൻ നടപടികളും പ്രധാന തീയതികളും ലഭ്യമാണ്. കുട്ടികളുടെ സുഗമമായ സ്കൂൾ പ്രവേശനത്തിനായി രക്ഷിതാക്കൾ ഒട്ടും വൈകാതെ അപേക്ഷകൾ സമർപ്പിക്കണമെന്ന് അധികൃതർ ആവർത്തിച്ച് ആവശ്യപ്പെട്ടു.
Don’t procrastinate anymore’: P.E.I. parents urged to register kids for kindergarten early
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
