ഒട്ടാവ: കാനഡയിലേക്ക് കുടിയേറാൻ ആഗ്രഹിക്കുന്നവർക്ക് വലിയൊരു അവസരമൊരുക്കി ന്യൂഫൗണ്ട്ലാൻഡ് ആൻഡ് ലാബ്രഡോർ സർക്കാർ. വിദേശ ഉദ്യോഗാർത്ഥികൾക്കായി ഫെബ്രുവരി 11-ന് പ്രവിശ്യാ സർക്കാർ പ്രത്യേക ഓൺലൈൻ തൊഴിൽമേള സംഘടിപ്പിക്കുന്നു. ജിഎംടി (GMT) സമയം വൈകിട്ട് 6 മുതൽ രാത്രി 10 വരെയാണ് മേള നടക്കുക. കാനഡയിലെ കമ്പനികളുമായി നേരിട്ട് സംസാരിക്കാനും തൊഴിൽ സാധ്യതകൾ കണ്ടെത്താനും ഈ വിർച്വൽ മേളയിലൂടെ സാധിക്കും. താല്പര്യമുള്ളവർക്ക് ഫെബ്രുവരി 11 അർദ്ധരാത്രി വരെ രജിസ്റ്റർ ചെയ്യാം.
മേളയിൽ പങ്കെടുക്കാൻ ആഗ്രഹിക്കുന്നവർ വെബ്സൈറ്റിൽ സ്വന്തം ബയോഡേറ്റ മുൻകൂട്ടി അപ്ലോഡ് ചെയ്യേണ്ടതുണ്ട്. ഇതിലൂടെ കാനഡയിലെ തൊഴിലുടമകൾക്ക് നിങ്ങളുടെ യോഗ്യതകൾ പരിശോധിക്കാൻ സാധിക്കും. ആരോഗ്യമേഖല, നിർമ്മാണം, ടീച്ചിങ്, ഏവിയേഷൻ, ഹോട്ടൽ മാനേജ്മെന്റ് തുടങ്ങിയ മേഖലകളിലുള്ളവർക്ക് വലിയ അവസരമാണുള്ളത്. ഇത് കൂടാതെ കാനഡയിലെ കുടിയേറ്റ നിയമങ്ങളെക്കുറിച്ചും അവിടുത്തെ ജീവിതത്തെക്കുറിച്ചും വിദഗ്ധരോട് നേരിട്ട് ചോദിച്ചറിയാനുള്ള പ്രത്യേക സെഷനുകളും മേളയുടെ ഭാഗമായി നടക്കും.
വെറുമൊരു രജിസ്ട്രേഷൻ കൊണ്ട് മാത്രം വിസയോ വർക്ക് പെർമിറ്റോ ലഭിക്കില്ലെങ്കിലും, നല്ലൊരു ജോലി കണ്ടെത്താൻ ഈ മേള നിങ്ങളെ സഹായിക്കും. നിലവിൽ നിങ്ങളുടെ യോഗ്യതയ്ക്ക് അനുസരിച്ചുള്ള ജോലി കണ്ടെത്താനായില്ലെങ്കിലും ബയോഡേറ്റ അപ്ലോഡ് ചെയ്യുന്നത് ഗുണകരമാണ്. പ്ലാറ്റ്ഫോമിൽ ലഭ്യമാകുന്ന ബയോഡേറ്റകൾ വരും മാസങ്ങളിലും തൊഴിലുടമകൾ പരിശോധിക്കുകയും അനുയോജ്യമായ ഉദ്യോഗാർത്ഥികളെ പിന്നീട് ബന്ധപ്പെടുകയും ചെയ്യും. കാനഡയിൽ സ്ഥിരതാമസത്തിനുള്ള പിഎൻപി (PNP) കുടിയേറ്റ പദ്ധതികൾക്ക് അപേക്ഷിക്കാൻ ഒരു വർഷമെങ്കിലും കാലാവധിയുള്ള തൊഴിൽ വാഗ്ദാനം അത്യാവശ്യമാണ്.
newfoundland-and-labrador-to-connect-foreign-workers-with-employers-in-upcoming-virtual-immigration-fair
