ഒട്ടാവ: പാനീയ വിപണിയിലെ ഉപഭോക്താക്കളുടെ താൽപ്പര്യങ്ങളിൽ ഉണ്ടായ വലിയ മാറ്റത്തെത്തുടർന്ന് ഫ്രോസൺ ജ്യൂസ് കോൺസെൻട്രേറ്റ് ഉൽപ്പന്നങ്ങൾ വിപണിയിൽ നിന്ന് പിൻവലിക്കാൻ തീരുമാനിച്ചതായി പ്രമുഖ കമ്പനികൾ. ആഗോള പാനീയ ഭീമനായ കോക്കക്കോളയുടെ ഉടമസ്ഥതയിലുള്ള മിനിറ്റ് മെയ്ഡ്, വരും മാസങ്ങളിൽ കാനഡയിലെയും അമേരിക്കയിലെയും തങ്ങളുടെ ഫ്രോസൺ ജ്യൂസ് വിഭാഗം പൂർണ്ണമായും നിർത്തലാക്കുമെന്നാണ് കമ്പനികൾ അറിയിച്ചിരിക്കുന്നത്.
ഏപ്രിൽ മാസത്തോടെ മിനിറ്റ് മെയ്ഡിന്റെ ഓറഞ്ച് ജ്യൂസ്, ലെമണേഡ്, ഫ്രൂട്ടോപിയ, ഫൈവ് അലൈവ് തുടങ്ങിയ കാൻഡ് ജ്യൂസുകൾ വിപണിയിൽ ലഭ്യമാകില്ല. കഴിഞ്ഞ വർഷം തന്നെ കാനഡയിലെ മറ്റൊരു പ്രമുഖ ജ്യൂസ് നിർമ്മാതാക്കളായ ലാസോണ്ട് (Lassonde) ഈ മേഖലയിൽ നിന്ന് പിന്മാറിയിരുന്നു. ഇതോടെ പതിറ്റാണ്ടുകളായി വിപണിയിലുണ്ടായിരുന്ന ഫ്രോസൺ കോൺസെൻട്രേറ്റ് വിഭാഗത്തിന് കാനഡയിൽ അന്ത്യമാകുകയാണ്.
വിപണിയിൽ ആവശ്യക്കാർ കുറഞ്ഞതാണ് കമ്പനികളുടെ പിന്മാറ്റത്തിന് പ്രധാന കാരണം. നിലവിൽ കാനഡയിൽ വിറ്റഴിക്കപ്പെടുന്ന ജ്യൂസുകളിൽ വെറും 7 ശതമാനം മാത്രമാണ് ഫ്രോസൺ കോൺസെൻട്രേറ്റ് രൂപത്തിലുള്ളത്. ലാഭക്ഷമത ഏറ്റവും കുറഞ്ഞ ഈ വിഭാഗത്തേക്കാൾ ഉപഭോക്താക്കൾ ഇപ്പോൾ താൽപ്പര്യം പ്രകടിപ്പിക്കുന്നത് വെള്ളം, കുറഞ്ഞ പഞ്ചസാരയുള്ള പാനീയങ്ങൾ, ആരോഗ്യഗുണങ്ങളുള്ള കൊംബുച, പ്രീബയോട്ടിക് സോഡകൾ എന്നിവയോടാണെന്ന് വിപണി വിദഗ്ധർ വിലയിരുത്തുന്നു.
ന്യൂഫൗണ്ട്ലാൻഡിലെ പാരമ്പരാഗത ക്രിസ്മസ് വിഭവമായ ‘സ്ലഷ്’ പോലുള്ളവ തയ്യാറാക്കാൻ ഫ്രോസൺ ജ്യൂസ് ഉപയോഗിച്ചിരുന്നവർക്ക് ഈ തീരുമാനം നിരാശയുണ്ടാക്കുന്നുണ്ട്. എങ്കിലും വലിയ കമ്പനികൾ ഒഴിയുന്നതോടെ പ്രാദേശികമായ ചെറുകിട കമ്പനികൾക്ക് ഈ മേഖലയിൽ പുതിയ അവസരങ്ങൾ ലഭിക്കുമെന്ന് വ്യാപാര സംഘടനകൾ പ്രത്യാശ പ്രകടിപ്പിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Slush lovers disappointed; Frozen juice concentrates are being withdrawn from the market
