ഒട്ടാവ : കാനഡയിൽ നിന്ന് അമേരിക്കയിലേക്ക് ആളുകളെ കടത്തിയ കേസിൽ 22 വയസ്സുള്ള ശിവം ലു എന്ന ഇന്ത്യൻ യുവാവിനെതിരെ യുഎസ് ഫെഡറൽ ഗ്രാൻഡ് ജൂറി കുറ്റം ചുമത്തി. കാനഡ അതിർത്തി കടന്ന് ന്യൂയോർക്കിലെ ക്ലിന്റൺ കൗണ്ടിയിലേക്ക് നിയമവിരുദ്ധമായി എത്തിയ 12 പേരെ കടത്തിയെന്നാണ് ഇയാൾക്കെതിരെയുള്ള ആരോപണം. 2025 ജനുവരി മുതൽ ജൂൺ വരെയുള്ള മാസങ്ങളിൽ മനുഷ്യക്കടത്ത് സംഘത്തെ ഇയാൾ നിയന്ത്രിക്കുകയും ഏകോപിപ്പിക്കുകയും ചെയ്തതായി യുഎസ് നീതിന്യായ വകുപ്പ് വ്യക്തമാക്കി.
2025 ജനുവരി 26-ന് അതിർത്തിക്ക് സമീപം സംശയാസ്പദമായ സാഹചര്യത്തിൽ കണ്ട രണ്ട് വാഹനങ്ങളെ യുഎസ് ബോർഡർ പട്രോൾ ഉദ്യോഗസ്ഥർ തടയാൻ ശ്രമിച്ചിരുന്നു. എന്നാൽ നിർത്താതെ പോയ വാഹനങ്ങളെ ഉദ്യോഗസ്ഥർ പിന്തുടരുകയും തുടർന്ന് ന്യൂയോർക്കിലെ മൂവേഴ്സിൽ വെച്ച് പിടികൂടുകയും ചെയ്തു. പരിശോധനയിൽ രണ്ട് വാഹനങ്ങളിലുമായി രേഖകളില്ലാത്ത 12 പേരെ കണ്ടെത്തി. പ്രതിയുമായി ബന്ധപ്പെട്ട വാട്ട്സ്ആപ്പ് സന്ദേശങ്ങൾ പരിശോധിച്ചപ്പോഴാണ് മനുഷ്യക്കടത്തിൽ ഇയാളുടെ പങ്കിനെക്കുറിച്ചുള്ള വിവരങ്ങൾ ലഭിച്ചതെന്ന് അധികൃതർ അറിയിച്ചു.
നിയമവിരുദ്ധമായി വിദേശികളെ യുഎസിലേക്ക് എത്തിക്കാൻ ഗൂഢാലോചന നടത്തിയതിനും സാമ്പത്തിക ലാഭത്തിനായി മനുഷ്യക്കടത്ത് നടത്തിയതിനും ഉൾപ്പെടെ അഞ്ച് കുറ്റങ്ങളാണ് ഇയാൾക്കെതിരെ ചുമത്തിയിരിക്കുന്നത്. ഇതിൽ മനുഷ്യക്കടത്തുമായി ബന്ധപ്പെട്ട നാല് കുറ്റങ്ങൾ തെളിയിക്കപ്പെട്ടാൽ ചുരുങ്ങിയത് അഞ്ച് വർഷം മുതൽ പരമാവധി 15 വർഷം വരെ തടവുശിക്ഷ ലഭിക്കാമെന്ന് നീതിന്യായ വകുപ്പ് വ്യക്തമാക്കി. കഴിഞ്ഞ ജൂണിൽ മനുഷ്യക്കടത്തിനായുള്ള ഗൂഢാലോചന കുറ്റം ചുമത്തിയാണ് ഇയാൾക്കെതിരെ ആദ്യമായി പരാതി നൽകിയത്.
അന്വേഷണം പുരോഗമിക്കുകയാണെന്നും കുറ്റകൃത്യത്തിൽ ഉൾപ്പെട്ട മറ്റുള്ളവർക്കായി തിരച്ചിൽ തുടരുകയാണെന്നും അധികൃതർ അറിയിച്ചു. വിദേശികളെ അനധികൃതമായി രാജ്യത്തേക്ക് കടത്തുന്നത് തടയാൻ അതിർത്തികളിൽ നിരീക്ഷണം ശക്തമാക്കിയതായും യുഎസ് അധികൃതർ വ്യക്തമാക്കി.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
Human trafficking at Canada-US border; 22-year-old Indian citizen arrested in US
