തിരുവന്തപുരം: കേരളത്തിന്റെ അടിസ്ഥാന സൗകര്യ വികസന മേഖലയിൽ വിപ്ലവകരമായ മാറ്റങ്ങൾ ലക്ഷ്യമിടുന്ന വൻകിട പദ്ധതികൾ 2026-27 സംസ്ഥാന ബജറ്റിൽ ധനമന്ത്രി കെ.എൻ. ബാലഗോപാൽ പ്രഖ്യാപിച്ചു. ഗതാഗതം, വ്യവസായം, സാങ്കേതികവിദ്യ എന്നീ മേഖലകളിൽ അന്താരാഷ്ട്ര നിലവാരത്തിലുള്ള വികസനമാണ് സർക്കാർ ലക്ഷ്യമിടുന്നത്. ഇതിൽ ഏറ്റവും പ്രധാനപ്പെട്ടത് ഡൽഹി-മീററ്റ് മാതൃകയിൽ തിരുവനന്തപുരം മുതൽ കാസർഗോഡ് വരെ നീളുന്ന ‘റീജിയണൽ റാപ്പിഡ് ട്രാൻസിറ്റ് സിസ്റ്റം’ (RRTS) ആണ്. നാല് ഘട്ടങ്ങളിലായി പൂർത്തിയാക്കുന്ന ഈ അതിവേഗ റെയിൽപ്പാതയുടെ ആദ്യഘട്ടത്തിനായി (തിരുവനന്തപുരം-തൃശൂർ) 100 കോടി രൂപ അനുവദിച്ചു.
റോഡ് വികസനത്തിന് ബജറ്റിൽ മുന്തിയ പരിഗണനയാണ് നൽകിയിരിക്കുന്നത്. തിരുവനന്തപുരം മുതൽ അങ്കമാലി വരെയുള്ള എം.സി റോഡ് 24 മീറ്റർ വീതിയിൽ നാലുവരിപ്പാതയായി വികസിപ്പിക്കുന്നതിന്റെ ഒന്നാം ഘട്ടത്തിനായി കിഫ്ബി വഴി 5,217 കോടി രൂപ നീക്കിവെച്ചു. മലയോര മേഖലയുടെ വികസനത്തിനായി 2,134.5 കോടി രൂപ ചെലവിൽ നിർമ്മിക്കുന്ന 8.73 കിലോമീറ്റർ നീളമുള്ള വയനാട് തുരങ്കപാതയുടെ നിർമ്മാണം ആരംഭിച്ചു. കൂടാതെ, കട്ടപ്പന മുതൽ തേനി വരെയുള്ള യാത്രാദൂരം കുറയ്ക്കാൻ സഹായിക്കുന്ന പുതിയ തുരങ്കപാതയുടെ സാധ്യതാ പഠനത്തിനായി 10 കോടി രൂപയും വകയിരുത്തിയിട്ടുണ്ട്.
വിഴിഞ്ഞം അന്താരാഷ്ട്ര തുറമുഖത്തിന്റെ സാധ്യതകൾ പ്രയോജനപ്പെടുത്താൻ വിപുലമായ പദ്ധതികളാണ് സർക്കാർ ആവിഷ്കരിച്ചിരിക്കുന്നത്. തുറമുഖത്തിന്റെ രണ്ടാം ഘട്ട വികസനത്തിന് പുറമെ, വിഴിഞ്ഞം മുതൽ ചവറ വഴി കൊച്ചി വരെ ബന്ധിപ്പിക്കുന്ന ‘റെയർ എർത്ത് കോറിഡോർ’ സ്ഥാപിക്കും. 42,000 കോടി രൂപയുടെ നിക്ഷേപവും 50,000 തൊഴിലവസരങ്ങളും ഈ കോറിഡോറിലൂടെ സർക്കാർ പ്രതീക്ഷിക്കുന്നു. കൊച്ചി-പാലക്കാട് ഹൈടെക് വ്യവസായ ഇടനാഴിക്കും കൊച്ചിയിലെ പെട്രോ കെമിക്കൽ പാർക്കിനും ബജറ്റ് കരുത്തുപകരുന്നു. പെട്രോ കെമിക്കൽ പാർക്ക് 2026-27 സാമ്പത്തിക വർഷത്തിൽ കമ്മീഷൻ ചെയ്യും.
ഐ.ടി മേഖലയിൽ കേരളത്തെ ആഗോള ഹബ്ബാക്കി മാറ്റാൻ കൊച്ചി ഇൻഫോപാർക്കിൽ 300 ഏക്കറിൽ ‘സൈബർ വാലി’ വികസിപ്പിക്കും. ആർട്ടിഫിഷ്യൽ ഇന്റലിജൻസ്, ഐ.ടി മേഖലകളിൽ വലിയ മുന്നേറ്റം ലക്ഷ്യമിടുന്ന ഈ പദ്ധതിക്കായി 30 കോടി രൂപ അനുവദിച്ചു. കൂടാതെ, ഗ്രാഫീൻ മേഖലയിലെ ഗവേഷണങ്ങൾക്കായി ഇന്ത്യ ഇന്നൊവേഷൻ സെന്റർ ഫോർ ഗ്രാഫീൻ (IICG) പദ്ധതിക്കും ബജറ്റിൽ പ്രത്യേക വിഹിതം മാറ്റിയിട്ടുണ്ട്. തീരദേശ പാതയുടെയും മലയോര പാതയുടെയും നിർമ്മാണത്തിനായി യഥാക്രമം 2,730 കോടി, 1,657 കോടി രൂപ വീതവും അനുവദിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
Major projects to change the face of Kerala; High-speed rail and industrial corridors in the 2026-27 state budget
