മോർഡൻ: ക്രെഡിറ്റ്, ഡെബിറ്റ് കാർഡ് ഇടപാടുകൾക്കുള്ള ഉയർന്ന സർവീസ് ചാർജ് ഒഴിവാക്കുന്നതിനായി മാനിറ്റോബയിലെ മോർഡനിൽ പ്രവർത്തിക്കുന്ന പ്രമുഖ റെസ്റ്റോറന്റ് പൂർണ്ണമായും പണമിടപാടുകളിലേക്ക് (Cash) മാറാൻ ഒരുങ്ങുന്നു. നഗരത്തിലെ ജനപ്രിയ ഭക്ഷണശാലയായ ‘മൊമെന്റ് ഇൻ ടൈം നെയ്ബർഹുഡ് ഗ്രിൽ’ ആണ് പൂർണമായും പണമിടപാടുകളിലേക്ക് മാറാൻ ഒരുങ്ങുന്നത്. റെസ്റ്റോറന്റ് ഉടമ അലക്സ് കാൻസ്കിയാണ് ഈ തീരുമാനം സോഷ്യൽ മീഡിയയിലൂടെ അറിയിച്ചത്.
വർഷം തോറും കാർഡ് കമ്പനികൾക്ക് നൽകേണ്ടി വരുന്ന വൻതുക ലാഭിക്കുക എന്ന ലക്ഷ്യത്തോടെയാണ് ഈ നീക്കമെന്ന് അധികൃതർ പറഞ്ഞു. കഴിഞ്ഞ മൂന്ന് വർഷത്തിനിടെ ഏകദേശം 22,000 ഡോളറിലധികം തുക ഇത്തരം ഫീസുകൾക്കായി മാത്രം ചിലവാക്കേണ്ടി വന്നതായി കാൻസ്കി ചൂണ്ടിക്കാട്ടി. നിലവിൽ ഒരു വർഷം ശരാശരി 7,500 ഡോളറാണ് ഇത്തരത്തിൽ നഷ്ടമാകുന്നത്. ഈ അധികച്ചെലവ് ബിസിനസിന്റെ നിലനിൽപ്പിനെ ബാധിക്കുന്നതിനാലാണ് ജനുവരി 22-ന് സോഷ്യൽ മീഡിയയിലൂടെ റെസ്റ്റോറന്റ് പുതിയ തീരുമാനം പ്രഖ്യാപിച്ചത്.
മാറ്റത്തോടുള്ള ഉപഭോക്താക്കളുടെ പ്രതികരണം സമ്മിശ്രമാണ്. പണം നൽകാൻ എടിഎമ്മുകളെ ആശ്രയിക്കാൻ തയ്യാറാണെന്ന് ഒരു വിഭാഗം ഉപഭോക്താക്കൾ അറിയിച്ചപ്പോൾ, കൈവശം കാർഡ് മാത്രം കരുതുന്നവർ ഈ തീരുമാനത്തിൽ ആശങ്ക പ്രകടിപ്പിച്ചിട്ടുണ്ട്. നിലവിൽ മാറ്റത്തിന്റെ ആദ്യഘട്ടമെന്ന നിലയിൽ കാർഡുകൾ സ്വീകരിക്കുന്നുണ്ടെങ്കിലും, വരും ദിവസങ്ങളിൽ പൂർണ്ണമായും പണമിടപാടുകളിലേക്ക് മാറാനാണ് റെസ്റ്റോറന്റ് ലക്ഷ്യമിടുന്നത്.
ബിസിനസ് രംഗത്തെ ചിലവുകൾ വർധിക്കുന്ന സാഹചര്യത്തിൽ ചെറുകിട സംരംഭകർക്ക് ഇത്തരം തീരുമാനങ്ങൾ എടുക്കേണ്ടി വരുന്നത് സ്വാഭാവികമാണെന്ന് കനേഡിയൻ ഫെഡറേഷൻ ഓഫ് ഇൻഡിപെൻഡന്റ് ബിസിനസ് ഡയറക്ടർ മിഷേൽ ഓഗർ പറഞ്ഞു. ലാഭവിഹിതം നിലനിർത്താൻ ബിസിനസ് ഉടമകൾ ഇത്തരത്തിൽ ചെലവ് കുറഞ്ഞ മാർഗ്ഗങ്ങൾ തേടുന്നത് നിലവിലെ സാമ്പത്തിക സാഹചര്യത്തിൽ അത്ഭുതപ്പെടുത്തുന്നതല്ലെന്നും അവർ കൂട്ടിച്ചേർത്തു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Unable to afford credit card fees; restaurant in Morden now offers 'cash only' service
