ഹാലിഫാക്സ്: നോവ സ്കോഷയിൽ കനത്ത മഞ്ഞുവീഴ്ച തുടരുമ്പോൾ, തെരുവിൽ കഴിയുന്നവർക്ക് പ്രതീക്ഷയുടെ വെളിച്ചമായി മാറുകയാണ് ‘സോൾസ് ഹാർബർ റെസ്ക്യൂ മിഷൻ’ (Souls Harbour Rescue Mission). അതിശൈത്യത്തിൽ നിന്ന് രക്ഷതേടി എത്തുന്നവർക്കായി ഈ പുരുഷ അഭയകേന്ദ്രം തങ്ങളുടെ ശേഷി 33-ൽ നിന്നും 44 കിടക്കകളായി ഉയർത്തി.
കൊടും തണുപ്പിൽ ടെന്റുകളിലും തെരുവുകളിലും കഴിയുന്നവർക്ക് ഈ കേന്ദ്രം വെറുമൊരു താത്കാലിക ഇടമല്ല, മറിച്ച് ജീവൻ രക്ഷിക്കുന്ന സുരക്ഷിത താവളം കൂടിയാണ്. “ഇങ്ങനെയൊരിടം ഇല്ലായിരുന്നെങ്കിൽ ഞങ്ങൾ തണുത്തു മരവിച്ചു മരിച്ചുപോയേനെ” എന്നാണ് ഇവിടെ അഭയം പ്രാപിച്ച കോളിൻ ഹെൻഡേഴ്സൺ എന്ന വ്യക്തി തന്റെ അനുഭവം പങ്കുവെച്ചത്. കൊടുങ്കാറ്റ് മുന്നറിയിപ്പ് വന്നതോടെ സഹായം അഭ്യർത്ഥിച്ചുള്ള ഫോൺ കോളുകളുടെ പ്രവാഹമാണെന്നും എല്ലാവരെയും സുരക്ഷിതരായി താമസിപ്പിക്കാനാണ് തങ്ങൾ ശ്രമിക്കുന്നതെന്നും ഷെൽട്ടർ അധികൃതർ പറഞ്ഞു.
നിലവിലെ കണക്കനുസരിച്ച് ഹാലിഫാക്സിൽ മാത്രം ഏകദേശം 1,150-ഓളം ആളുകൾ ഭവനരഹിതരായി തെരുവുകളിൽ കഴിയുന്നുണ്ട്. ശൈത്യം കടുക്കുന്ന സാഹചര്യത്തിൽ നഗരസഭയും സന്നദ്ധ സംഘടനകളും ചേർന്ന് കൂടുതൽ പേരെ സുരക്ഷിത കേന്ദ്രങ്ങളിലേക്ക് മാറ്റാനുള്ള ശ്രമത്തിലാണ്. വരും ദിവസങ്ങളിൽ കൂടുതൽ കിടക്കകൾ ഒരുക്കി പ്രവർത്തനം വിപുലീകരിക്കാനാണ് സോൾസ് ഹാർബർ ലക്ഷ്യമിടുന്നത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Shelter provides a safe home as Nova Scotia cleans up from storm
