എഡ്മന്റൺ: ആൽബർട്ടയിൽ വാഹന മോഷണം റെക്കോർഡ് വേഗതയിൽ വർധിക്കുന്നതായി റിപ്പോർട്ട്. ഇൻഷുറൻസ് ബ്യൂറോ ഓഫ് കാനഡ പുറത്തുവിട്ട ഏറ്റവും പുതിയ കണക്കുകൾ പ്രകാരം എഡ്മന്റണും കാൽഗറിയും ഇപ്പോൾ വാഹന മോഷണത്തിന്റെ പ്രധാന കേന്ദ്രങ്ങളായി മാറിയിരിക്കുകയാണ്. മോഷണം വർധിച്ചതോടെ ഇൻഷുറൻസ് ക്ലെയിം ഇനത്തിൽ കമ്പനികൾക്ക് നൽകേണ്ടി വരുന്ന തുകയിൽ വൻ വർധനവാണ് ഉണ്ടായിരിക്കുന്നത്. കഴിഞ്ഞ കുറച്ചു വർഷങ്ങൾക്കിടെ എഡ്മന്റണിൽ 85 ശതമാനവും കാൽഗറിയിൽ 73 ശതമാനവും വർധനവാണ് ക്ലെയിം ചെലവുകളിൽ രേഖപ്പെടുത്തിയത്. ഇത് സാധാരണക്കാരായ വാഹനുടമകളുടെ ഇൻഷുറൻസ് പ്രീമിയം തുകയെ ബാധിക്കുമെന്ന ആശങ്ക ശക്തമാണ്.
വാഹന മോഷണവുമായി ബന്ധപ്പെട്ട നിയമനടപടികൾക്കുള്ള വൻ ചിലവും സംഘടിത കുറ്റവാളി സംഘങ്ങളുടെ സജീവ സാന്നിധ്യവുമാണ് ഈ പ്രതിസന്ധിക്ക് പ്രധാന കാരണമായി ചൂണ്ടിക്കാണിക്കപ്പെടുന്നത്. ആൽബർട്ട സർക്കാർ കൊണ്ടുവന്ന പുതിയ കെയർ-ഫസ്റ്റ് ഇൻഷുറൻസ് സംവിധാനം പകുതി ആശ്വാസം നൽകുമെങ്കിലും പ്രശ്നത്തിന് പൂർണ്ണ പരിഹാരമാകില്ലെന്ന് ഐബിസി വൈസ് പ്രസിഡന്റ് ആരോൺ സതർലാൻഡ് പറഞ്ഞു. മോഷണം തടയാൻ പ്രത്യേക പോലീസ് സംഘത്തെ നിയോഗിക്കണമെന്നും നിയമങ്ങൾ കൂടുതൽ കർക്കശമാക്കണമെന്നും ബ്യൂറോ സർക്കാരിനോട് ശുപാർശ ചെയ്തു. കാനഡയിൽ വിൽക്കുന്ന വാഹനങ്ങളുടെ സുരക്ഷാ സംവിധാനങ്ങൾ പരിഷ്കരിക്കാൻ ഫെഡറൽ ഗവൺമെന്റ് പുതിയ ചട്ടങ്ങൾ കൊണ്ടുവരുന്നത് പ്രതീക്ഷ നൽകുന്നുണ്ടെങ്കിലും നിലവിലെ സാഹചര്യത്തിൽ വാഹനുടമകൾ അതീവ ജാഗ്രത പാലിക്കണമെന്ന് അധികൃതർ മുന്നറിയിപ്പ് നൽകുന്നു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Auto theft claims surge in Alberta’s cities: IBC report
