ദില്ലി: റിപ്പബ്ലിക് ദിനത്തോടനുബന്ധിച്ച് പ്രഖ്യാപിച്ച രാഷ്ട്രപതിയുടെ പോലീസ് മെഡലുകളിൽ മലയാളികൾക്ക് അഭിമാന നേട്ടം. ദില്ലി പോലീസിലെ സ്പെഷ്യൽ സെൽ സബ് ഇൻസ്പെക്ടറായ കോഴിക്കോട് സ്വദേശി ആർ.എസ്. ഷിബു ധീരതയ്ക്കുള്ള രാഷ്ട്രപതിയുടെ മെഡലിന് അർഹനായി. ഹിസ്ബുൾ മുജാഹിദീൻ ഭീകരൻ ജാവേദ് മട്ടുവിനെ ഏറ്റുമുട്ടലിനൊടുവിൽ സാഹസികമായി പിടികൂടിയ ടീമിലെ പ്രധാന അംഗമായിരുന്നു ഇദ്ദേഹം. പോലീസ് സേവനത്തിന് പുറമെ അറിയപ്പെടുന്ന ഒരു നാടക പ്രവർത്തകൻ കൂടിയാണ് ഷിബു.
കേരള പോലീസിൽ നിന്ന് എസ്.പി. ഷാനവാസ് അബ്ദുൾ സാഹിബ് വിശിഷ്ട സേവനത്തിനുള്ള മെഡലിന് അർഹനായി. ഇതോടൊപ്പം കേരള ഫയർ സർവീസിൽ നിന്ന് എം. രാജേന്ദ്രനാഥും വിശിഷ്ട സേവനത്തിനുള്ള മെഡൽ കരസ്ഥമാക്കി. ആഭ്യന്തര മന്ത്രാലയത്തിലെ ജോയിന്റ് ഡയറക്ടർമാരായ ഐ.ബി. റാണി, കെ.വി. ശ്രീജേഷ് എന്നിവരും ഈ വിഭാഗത്തിലെ മെഡൽ പട്ടികയിൽ ഇടംപിടിച്ച മലയാളികളാണ്. മികച്ച സേവനമികവും അർപ്പണബോധവുമാണ് ഇവരെ പുരസ്കാരത്തിന് അർഹരാക്കിയത്.
സ്തുത്യർഹ സേവനത്തിനുള്ള മെഡലിന് കേരളത്തിൽ നിന്ന് പത്ത് പോലീസ് ഉദ്യോഗസ്ഥരാണ് അർഹരായത്. എ.എസ്.പി. എ.പി. ചന്ദ്രൻ, ഡി.എസ്.പി.മാരായ കെ.ഇ. പ്രേമചന്ദ്രൻ, ഉണ്ണികൃഷ്ണൻ വെളുതേടൻ, ടി. അനിൽകുമാർ, ജോസ് മത്തായി, എ.സി.പി.മാരായ ടി. അഷ്റഫ്, സി. പ്രേമാനന്ദ കൃഷ്ണൻ, സി.എസ്.പി. മനോജ് വടക്കേവീട്ടിൽ, എസ്.ഐ.മാരായ ടി. സന്തോഷ്കുമാർ, പ്രമോദ് ദാസ് എന്നിവരാണ് ഈ നേട്ടം കൈവരിച്ചത്. ക്രമസമാധാന പാലനത്തിലും കുറ്റാന്വേഷണത്തിലും ഇവർ നടത്തിയ ഇടപെടലുകൾ പരിഗണിച്ചാണ് പുരസ്കാരം.
കേരള ഫയർഫോഴ്സിൽ നിന്നും ജയിൽ വകുപ്പിൽ നിന്നുമായി ഏഴ് ഉദ്യോഗസ്ഥർ സ്തുത്യർഹ സേവന മെഡലുകൾ സ്വന്തമാക്കി. ഫയർഫോഴ്സിൽ നിന്ന് എ.എസ്. ജോഗി, കെ.എ. ജാഫർഖാൻ, വി.എൻ. വേണുഗോപാൽ എന്നിവരും ജയിൽ വകുപ്പിൽ നിന്ന് ടി.വി. രാമചന്ദ്രൻ, എസ്. മുഹമ്മദ് ഹുസൈൻ, കെ. സതീഷ് ബാബു, എ. രാജേഷ് കുമാർ എന്നിവരും പുരസ്കാര നിറവിലായി. ഭീകരവിരുദ്ധ പോരാട്ടത്തിലും സുരക്ഷാ സേവനങ്ങളിലും മികച്ച പ്രകടനം കാഴ്ചവെക്കുന്നവർക്കായി കേന്ദ്ര ആഭ്യന്തര മന്ത്രാലയമാണ് ഈ മെഡലുകൾ പ്രഖ്യാപിക്കുന്നത്.
കാനഡയിലെ ഏറ്റവും പുതിയ വാർത്തകൾക്കായി:
President’s Medal of Bravery to Malayali officer R.S. Shibu; Distinguished Service Medal to S.P. Shanavas from Kerala
