വിഴിഞ്ഞം തുറമുഖത്തിന്റെ ചരിത്ര കുതിപ്പിന് ഇന്ന് തുടക്കം; രണ്ടാം ഘട്ട നിർമ്മാണം മുഖ്യമന്ത്രി പിണറായി വിജയൻ ഉദ്ഘാടനം ചെയ്യും

തിരുവനന്തപുരം: രാജ്യത്തെ ഏറ്റവും വലിയ ട്രാൻസ്ഷിപ്പ്മെന്റ് ഹബ്ബായി മാറാനൊരുങ്ങുന്ന വിഴിഞ്ഞം അന്താരാഷ്ട്ര തുറമുഖത്തിന്റെ രണ്ടാംഘട്ട നിർമ്മാണ പ്രവർത്തനങ്ങൾക്ക് ഇന്ന് ഔദ്യോഗിക തുടക്കമാകും. വൈകിട്ട് നാല് മണിക്ക് തുറമുഖ കവാടത്തിൽ നടക്കുന്ന ചടങ്ങിൽ മുഖ്യമന്ത്രി പിണറായി വിജയൻ നിർമ്മാണ ഉദ്ഘാടനം നിർവ്വഹിക്കും. കേന്ദ്ര ഷിപ്പിംഗ് മന്ത്രി സർബാനന്ദ സോനോവാൾ മുഖ്യാതിഥിയാകുന്ന ചടങ്ങിൽ സംസ്ഥാന തുറമുഖ വകുപ്പ് മന്ത്രി വി.എൻ വാസവൻ അധ്യക്ഷത വഹിക്കും. ചടങ്ങിനോടനുബന്ധിച്ച് എക്സിം (കയറ്റുമതി-ഇറക്കുമതി) കാർഗോ സേവനങ്ങളുടെയും ദേശീയപാത ബൈപാസിലേക്ക് നിർമ്മിച്ച പുതിയ പോർട്ട് റോഡിന്റെയും ഉദ്ഘാടനവും നടക്കും.

ഏകദേശം 10,000 കോടി രൂപ ചെലവ് വരുന്ന ബൃഹത്തായ വികസന പദ്ധതികളാണ് രണ്ടാം ഘട്ടത്തിൽ ഉൾപ്പെടുത്തിയിരിക്കുന്നത്. 2028-ഓടെ നിർമ്മാണം പൂർത്തിയാക്കി തുറമുഖം പൂർണ്ണ സജ്ജമാക്കാനാണ് സർക്കാർ ലക്ഷ്യമിടുന്നത്. ഈ ഘട്ടത്തിൽ റെയിൽവേ യാർഡ്, മൾട്ടി പർപ്പസ് ബെർത്ത്, ലിക്വിഡ് ടെർമിനൽ, ടാങ്ക് ഫാം എന്നിവയുടെ നിർമ്മാണം പൂർത്തിയാകും. നിലവിലുള്ള ബെർത്തിന്റെ നീളം 800 മീറ്ററിൽ നിന്ന് 2000 മീറ്ററായും, പുലിമുട്ടിന്റെ (Breakwater) നീളം 3 കിലോമീറ്ററിൽ നിന്ന് 4 കിലോമീറ്ററായും വർദ്ധിപ്പിക്കും. അധികമായി ഭൂമി ഏറ്റെടുക്കാതെ 55 ഹെക്ടർ കടൽ നികത്തിയാണ് ഈ വികസനം സാധ്യമാക്കുന്നത്.

വാണിജ്യാടിസ്ഥാനത്തിൽ പ്രവർത്തനം തുടങ്ങി ചുരുങ്ങിയ കാലയളവിനുള്ളിൽ തന്നെ വിഴിഞ്ഞം ലോക ഭൂപടത്തിൽ ശ്രദ്ധിക്കപ്പെട്ടു കഴിഞ്ഞു. ഇതുവരെ 710 കപ്പലുകളിൽ നിന്നായി 15.19 ലക്ഷം കണ്ടെയ്‌നറുകളാണ് (TEUs) ഇവിടെ കൈകാര്യം ചെയ്തത്. 2025 ഡിസംബറിൽ മാത്രം 1.21 ലക്ഷം കണ്ടെയ്‌നറുകൾ കൈകാര്യം ചെയ്ത് തുറമുഖം റെക്കോർഡ് നേട്ടം കൈവരിച്ചിരുന്നു. എം.എസ്.സി ഐറിന പോലുള്ള ലോകത്തിലെ ഏറ്റവും വലിയ കണ്ടെയ്‌നർ കപ്പലുകളെ നങ്കൂരമിടാൻ സഹായിച്ച 18 മീറ്റർ സ്വാഭാവിക ആഴം വിഴിഞ്ഞത്തിന്റെ വലിയ പ്രത്യേകതയാണ്.

രണ്ടാം ഘട്ടം പൂർത്തിയാകുന്നതോടെ വിഴിഞ്ഞം തുറമുഖത്തിന്റെ ശേഷി അഞ്ചിരട്ടിയായി വർദ്ധിക്കും. നിലവിലെ 1.5 മില്യൺ ടിഇയു വാർഷിക ശേഷി 2028-ഓടെ 5 മില്യൺ ടിഇയു ആയി ഉയരുമെന്നാണ് പ്രതീക്ഷിക്കുന്നത്. ഇതോടെ ലോജിസ്റ്റിക്സ്, സപ്ലൈ ചെയിൻ മാനേജ്‌മെന്റ് മേഖലകളിൽ ഏകദേശം 5 ലക്ഷത്തോളം പുതിയ തൊഴിലവസരങ്ങൾ സൃഷ്ടിക്കപ്പെടും. ഇതിനകം തന്നെ സംസ്ഥാന സർക്കാരിന് 106 കോടി രൂപയുടെ നികുതി വരുമാനം നേടിക്കൊടുത്ത വിഴിഞ്ഞം, രണ്ടാം ഘട്ടത്തോടെ കേരളത്തിന്റെ സാമ്പത്തിക നട്ടെല്ലായി മാറുമെന്നാണ് വിലയിരുത്തപ്പെടുന്നത്.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82

Vizhinjam Port’s historic leap begins today; Chief Minister Pinarayi Vijayan will inaugurate the second phase of construction