ബജറ്റിൽ കനിയണം; ഒന്റാരിയോയിലെ വിദ്യാഭ്യാസ സ്ഥാപനങ്ങളെ രക്ഷിക്കാൻ കോടികളുടെ പാക്കേജ് ആവശ്യപ്പെട്ട് സർവകലാശാലകൾ

ടൊറൻ്റോ: ഒന്റാരിയോയിലെ ഉന്നതവിദ്യാഭ്യാസ മേഖല കടുത്ത സാമ്പത്തിക തകർച്ച നേരിടുന്നതായി റിപ്പോർട്ടുകൾ. നിലവിലെ സാമ്പത്തിക പ്രതിസന്ധി മറികടക്കാൻ പ്രീമിയർ ഡഗ് ഫോർഡിൻ്റെ നേതൃത്വത്തിലുള്ള സർക്കാരിനോട് കോടിക്കണക്കിന് ഡോളറിൻ്റെ അടിയന്തര സഹായം ആവശ്യപ്പെട്ടിരിക്കുകയാണ് പ്രവിശ്യയിലെ സർവകലാശാലകളും കോളേജുകളും. വരാനിരിക്കുന്ന പ്രവിശ്യാ ബജറ്റിൽ ഉന്നതവിദ്യാഭ്യാസത്തിനായി വൻതോതിൽ തുക വകയിരുത്തണമെന്നാണ് ഇവരുടെ പ്രധാന ആവശ്യം. വർഷങ്ങളായി തുടരുന്ന ട്യൂഷൻ ഫീസ് മരവിപ്പിക്കലും അന്താരാഷ്ട്ര വിദ്യാർത്ഥികളുടെ എണ്ണത്തിൽ ഫെഡറൽ സർക്കാർ കൊണ്ടുവന്ന നിയന്ത്രണങ്ങളും തങ്ങളെ തകർച്ചയുടെ വക്കിലെത്തിച്ചുവെന്ന് വിദ്യാഭ്യാസ സ്ഥാപനങ്ങൾ വ്യക്തമാക്കുന്നു.

തകർച്ചയുടെ വക്കിലെന്ന് കോളേജുകൾ; 1.5 ബില്യൺ ഡോളറിൻ്റെ പാക്കേജ് വേണം

പ്രവർത്തന ചെലവുകൾ കുത്തനെ ഉയർന്ന സാഹചര്യത്തിൽ അടുത്ത സാമ്പത്തിക വർഷത്തേക്ക് മാത്രം 1.2 ബില്യൺ ഡോളറിൻ്റെ അധിക ധനസഹായമാണ് സർവകലാശാലകളുടെ കൗൺസിൽ (Council of Ontario Universities) ആവശ്യപ്പെട്ടിരിക്കുന്നത്. കോളേജ് മേഖലയാകട്ടെ 1.5 ബില്യൺ ഡോളറിൻ്റെ സഹായ പാക്കേജാണ് പ്രതീക്ഷിക്കുന്നത്. 2028-ഓടെ സർവകലാശാലാ മേഖലയിൽ മാത്രം 1.3 ബില്യൺ ഡോളറിൻ്റെ ബജറ്റ് കമ്മിയുണ്ടാകുമെന്നാണ് നിലവിലെ കണക്കുകൾ സൂചിപ്പിക്കുന്നത്. മതിയായ സാമ്പത്തിക സഹായം ലഭിച്ചില്ലെങ്കിൽ നൂറുകണക്കിന് കോഴ്സുകൾ നിർത്തലാക്കേണ്ടി വരുമെന്നും ജീവനക്കാരെ വെട്ടിക്കുറയ്ക്കേണ്ടി വരുമെന്നും സ്ഥാപനങ്ങൾ മുന്നറിയിപ്പ് നൽകുന്നു.

വിദേശ വിദ്യാർത്ഥികളുടെ കുറവും കടുത്ത നിബന്ധനകളും വിനയായി

കാനഡയിൽ വിദേശ വിദ്യാർത്ഥികൾക്ക് ഏർപ്പെടുത്തിയ പുതിയ നിയന്ത്രണങ്ങൾ ഒന്റാരിയോയിലെ വിദ്യാഭ്യാസ സ്ഥാപനങ്ങളുടെ വരുമാനത്തെ സാരമായി ബാധിച്ചിട്ടുണ്ട്. വിദേശ വിദ്യാർത്ഥികളിൽ നിന്നുള്ള വരുമാനത്തിൽ 2027-28 ഓടെ 4.2 ബില്യൺ ഡോളറിൻ്റെ കുറവുണ്ടാകുമെന്നാണ് കണക്കാക്കുന്നത്. ഇതോടെ ലേബർ മാർക്കറ്റിന് ആവശ്യമായ വിദഗ്ധ തൊഴിലാളികളെ വാർത്തെടുക്കുന്നതിൽ വലിയ തടസ്സം നേരിടുമെന്ന് കോളേജുകൾ ചൂണ്ടിക്കാട്ടുന്നു. എന്നാൽ കഴിഞ്ഞ രണ്ട് വർഷത്തിനിടെ പ്രവർത്തന ഫണ്ടിൽ 12 ശതമാനം വർദ്ധനവ് വരുത്തിയിട്ടുണ്ടെന്നും വിദ്യാഭ്യാസ നിലവാരവും തൊഴിൽ നൈപുണ്യവും ഉറപ്പാക്കുന്ന പുതിയ ഫണ്ടിംഗ് രീതികൾ പരിഗണനയിലാണെന്നും സർക്കാർ വക്താക്കൾ പ്രതികരിച്ചു.

two-key-ontario-sectors-ask-ford-government-for-funding-boost

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82