തിരുവനന്തപുരം: നിയമസഭാ തിരഞ്ഞെടുപ്പിന് മുന്നോടിയായി കേരള രാഷ്ട്രീയത്തിൽ അപ്രതീക്ഷിത നീക്കം. സാബു എം. ജേക്കബിന്റെ നേതൃത്വത്തിലുള്ള ട്വന്റി 20 പാർട്ടി എൻഡിഎ മുന്നണിയിൽ ചേർന്നു. ബിജെപി സംസ്ഥാന അധ്യക്ഷൻ രാജീവ് ചന്ദ്രശേഖറും സാബു ജേക്കബും നടത്തിയ നിർണായക കൂടിക്കാഴ്ചയ്ക്ക് പിന്നാലെയാണ് മുന്നണി പ്രവേശനത്തിൽ ഔദ്യോഗിക പ്രഖ്യാപനമുണ്ടായത്. ട്വന്റി ട്വന്റി എൻഡിഎയുടെ ഭാഗമായതിൽ വലിയ സന്തോഷമെന്ന് ബിജെപി സംസ്ഥാന അധ്യക്ഷൻ രാജീവ് ചന്ദ്രശേഖർ പറഞ്ഞു. വെള്ളിയാഴ്ച തിരുവനന്തപുരത്ത് പ്രധാനമന്ത്രി നരേന്ദ്ര മോദി പങ്കെടുക്കുന്ന പരിപാടിയിൽ ഔദ്യോഗിക പ്രഖ്യാപനമുണ്ടാകും. ജനങ്ങളുടെ പ്രശ്നങ്ങൾ പരിഹരിക്കുന്ന വികസനം കൊണ്ടുവരുന്ന പാർട്ടിയാണ് ട്വന്റി ട്വന്റിയെന്നും രാജീവ് ചന്ദ്രശേഖർ പറഞ്ഞു. ട്വന്റി ട്വന്റി മുന്നണി പ്രവേശനത്തിനു പിന്നാലെ തിരുവനന്തപുരത്ത് വാർത്താ സമ്മേളനത്തിൽ സംസാരിക്കുകയായിരുന്നു അദ്ദേഹം.
ഇതാദ്യമായാണ് രൂപീകരണത്തിന് ശേഷം ട്വന്റി 20 ഒരു പ്രധാന രാഷ്ട്രീയ മുന്നണിയുടെ ഭാഗമാകുന്നത്. കിഴക്കമ്പലം മോഡൽ വികസനം ഉയർത്തിപ്പിടിച്ച് തദ്ദേശ ഭരണത്തിലും നിയമസഭാ തിരഞ്ഞെടുപ്പിലും വലിയ വോട്ട് വിഹിതം പിടിച്ചടക്കിയ ട്വന്റി 20-യുടെ എൻഡിഎ പ്രവേശം വരാനിരിക്കുന്ന തിരഞ്ഞെടുപ്പുകളിൽ വലിയ ചലനങ്ങൾ സൃഷ്ടിക്കുമെന്നാണ് വിലയിരുത്തൽ. ബിജെപിയെ സംബന്ധിച്ചിടത്തോളം കേരളത്തിൽ ക്രിസ്ത്യൻ വോട്ടുകൾ സ്വാധീനിക്കാനും വികസന രാഷ്ട്രീയത്തെക്കുറിച്ച് സംസാരിക്കാനും ഈ സഖ്യം വലിയ മുതൽക്കൂട്ടാകും.
കാനഡയിലെ ഏറ്റവും പുതിയ വാർത്തകൾക്കായി:
https://chat.whatsapp.com/Ghtm5bIjsVN8SItyDlaj3Q?mode=wwt
Twenty20 Joins NDA: A New Political Chapter Begins in Kerala
