ഒന്റാരിയോ: ടിമ്മിൻസിലുള്ള ഫെയർവേ വില്ലേജ് മൊബൈൽ ഹോം പാർക്കിലെ എഴുപതോളം താമസക്കാരെ ഖനന കമ്പനിയായ ഡിസ്കവറി സിൽവർ ഒഴിപ്പിക്കുന്നു. ജനുവരി 16-നാണ് താമസക്കാർക്ക് ഒഴിപ്പിക്കൽ നോട്ടീസ് ലഭിച്ചത്. 2028 ജനുവരി 31-നകം പ്രദേശം പൂർണ്ണമായും ഒഴിയണമെന്നാണ് കമ്പനിയുടെ നിർദ്ദേശം. കഠിനമായ ശൈത്യകാലത്ത് ലഭിച്ച ഈ നോട്ടീസ് താമസക്കാരെ കടുത്ത ആശങ്കയിലാഴ്ത്തിയിരിക്കുകയാണ്.
മേഖലയിൽ തൊഴിലവസരങ്ങളും നിക്ഷേപങ്ങളും വർദ്ധിപ്പിക്കുന്നതിന്റെ ഭാഗമായി ഫെയർവേ വില്ലേജ് പ്രദേശം പാർപ്പിട ഇതര ആവശ്യങ്ങൾക്കായി ഉപയോഗിക്കാനാണ് തങ്ങളുടെ തീരുമാനമെന്ന് ഡിസ്കവറി സിൽവർ പ്രസ്താവനയിലൂടെ അറിയിച്ചു. ഇതിനായി രണ്ട് വർഷത്തെ സമയം താമസക്കാർക്ക് നൽകിയിട്ടുണ്ടെന്നും കമ്പനി വ്യക്തമാക്കി. താമസക്കാർക്ക് സാമ്പത്തിക സഹായം നൽകുമെന്നും മൊബൈൽ ഹോമുകൾ കമ്പനി നേരിട്ട് വാങ്ങാൻ തയ്യാറാണെന്നും ഇവർ അറിയിച്ചു. കൂടാതെ, മറ്റ് താമസസൗകര്യങ്ങൾ കണ്ടെത്താൻ സഹായം നൽകുമെന്നും കമ്പനി കൂട്ടിച്ചേർത്തു.
എന്നാൽ കമ്പനിയുടെ വാഗ്ദാനങ്ങൾ അപര്യാപ്തമാണെന്ന് പ്രദേശവാസിയായ അലക്സിസ് ഹോഡ്സൺ-ടർപിൻ ആരോപിച്ചു. വീടുകൾ ഒഴിയുന്നതിനായി കമ്പനി വാഗ്ദാനം ചെയ്ത 10,000 ഡോളർ നിലവിലെ സാഹചര്യത്തിൽ ഒന്നിനും തികയില്ലെന്ന് ഇവർ ചൂണ്ടിക്കാട്ടി. മൂന്നാം കക്ഷി മൂല്യനിർണ്ണയത്തിലൂടെ വീടുകൾ വാങ്ങാനുള്ള കമ്പനിയുടെ നീക്കം വീടിന്റെ യഥാർത്ഥ വില കുറയ്ക്കാൻ ഇടയാക്കുമെന്നും ഇവർ ആശങ്ക പ്രകടിപ്പിച്ചു. ഏകദേശം 39 വർഷമായി താൻ ഈ പാർക്കിൽ താമസിക്കുകയാണെന്നും പെട്ടെന്നുള്ള ഈ മാറ്റം ഉൾക്കൊള്ളാൻ പ്രയാസമാണെന്നും ഇവർ പറഞ്ഞു.
പാർക്കിൽ താമസിക്കുന്ന മുതിർന്ന പൗരന്മാരുടെയും യുവകുടുംബങ്ങളുടെയും സാഹചര്യം ഖനന കമ്പനി പരിഗണിക്കുന്നില്ലെന്ന് താമസക്കാർ പരാതിപ്പെട്ടു. നിലവിലെ താമസസ്ഥലത്തുനിന്ന് വീടുകൾ സുരക്ഷിതമായി മാറ്റുന്നതിനോ അല്ലെങ്കിൽ ഉചിതമായ വില നൽകി അവ വാങ്ങുന്നതിനോ കമ്പനി തയ്യാറാകണമെന്നാണ് ഇവരുടെ ആവശ്യം. ശൈത്യകാലം കഴിഞ്ഞാൽ മാത്രമേ വീടുകൾ മാറ്റുന്നതിനെക്കുറിച്ച് പ്രായോഗികമായി ആലോചിക്കാൻ സാധിക്കൂ എന്നും താമസക്കാർ വ്യക്തമാക്കി.
കാനഡയിലെ ഏറ്റവും പുതിയ വാർത്തകൾക്കായി:
https://chat.whatsapp.com/Ghtm5bIjsVN8SItyDlaj3Q?mode=wwt
Discovery Silver issues eviction notices to 70 residents as Timmins housing complex moves to accommodate mining development
