ഒന്റാരിയോ: കഴിഞ്ഞ ആഴ്ച പ്രഖ്യാപിച്ച ചൈനയുമായുള്ള വ്യാപാര കരാർ പ്രാദേശിക കാർഷിക മേഖലയ്ക്ക് ഗുണകരമാകുമെന്ന് നിപ്പിസിംഗ്-ടിമിസ്കാമിംഗ് എംപി പോളിൻ റോഷ്ഫോർട്ട് അറിയിച്ചു. മാർച്ച് ഒന്നിനുള്ളിൽ കനേഡിയൻ കനോലയുടെ താരിഫ് 15 ശതമാനമായി ചൈന കുറയ്ക്കുമെന്ന് പ്രതീക്ഷിക്കുന്നതായി അവർ വ്യക്തമാക്കി. നിലവിൽ ഏകദേശം 85 ശതമാനത്തോളം വരുന്ന നികുതി ഭാരമാണ് ഇതോടെ ലഘൂകരിക്കപ്പെടുന്നത്. പ്രധാനമന്ത്രി മാർക്ക് കാർണിയുടെ നേതൃത്വത്തിലുള്ള കനേഡിയൻ പ്രതിനിധി സംഘം ബീജിംഗിൽ നടത്തിയ ചർച്ചയിലൂടെയാണ് തന്ത്രപരമായ ഈ പങ്കാളിത്തം ഉറപ്പാക്കിയത്.
കനോല ഉത്പാദനം തങ്ങളുടെ മേഖലയിലെ കൃഷിയുടെ അവിഭാജ്യ ഘടകമാണെന്നും താരിഫ് കുറയ്ക്കുന്നത് കർഷകരുടെ സാമ്പത്തിക സുസ്ഥിരത ഉറപ്പാക്കുമെന്നും ടിമിസ്കാമിംഗ് ഫെഡറേഷൻ ഓഫ് അഗ്രികൾച്ചർ പ്രസിഡന്റ് നോം കോച്ച് അറിയിച്ചു. കനേഡിയൻ ഉത്പാദകർക്ക് ചൈന എന്നത് 400 കോടി ഡോളറിന്റെ വലിയ വിപണിയാണ്. ഉത്പാദന ചിലവ് വർധിക്കുകയും വിപണിയിൽ വിലയിൽ ഏറ്റക്കുറച്ചിലുകൾ ഉണ്ടാവുകയും ചെയ്യുന്ന സാഹചര്യത്തിൽ പുതിയ വാർത്ത വിപണിയിൽ സ്ഥിരത ഉറപ്പാക്കുമെന്ന് കോ-ഓപ്പറേറ്റീവ് റീജിയണൽ ഡി നിപ്പിസിംഗ് സഡ്ബറി ജനറൽ മാനേജർ ഡെനിസ് കാസ്റ്റോങ്ഗെ വ്യക്തമാക്കി.
കനോലയ്ക്ക് പുറമെ പോർക്ക്, സീഫുഡ് ഉത്പന്നങ്ങളുടെ വ്യാപാരത്തിനും ഈ കരാർ വഴിതുറക്കുമെന്ന് ഒന്റാരിയോ കനോല ഗ്രോവേഴ്സ് കമ്മിറ്റി അംഗം ടെറി ഫിലിപ്സ് പ്രത്യാശ പ്രകടിപ്പിച്ചു. ചൈനീസ് ഇലക്ട്രിക് വാഹനങ്ങൾക്ക് വിപണി തുറന്നു നൽകിയതിലൂടെ കനോല കർഷകർക്ക് ആവശ്യമായ ഇളവുകൾ നേടിയെടുക്കാൻ സാധിച്ചുവെന്നും അദ്ദേഹം കൂട്ടിച്ചേർത്തു. ഒന്റാറിയോയിൽ ഏറ്റവും കൂടുതൽ കനോല കൃഷി ചെയ്യുന്ന വടക്കൻ മേഖലകളിൽ ഇത് വലിയ മാറ്റമുണ്ടാക്കുമെന്നാണ് വിലയിരുത്തൽ.
അതേസമയം, കരാറിനെതിരെ ഒന്റാറിയോ പ്രവിശ്യാ ഭരണകൂടം കടുത്ത വിയോജിപ്പ് രേഖപ്പെടുത്തി. ചൈനയുമായുള്ള ഈ വ്യാപാര കരാർ വലിയ തെറ്റാണെന്ന് ഒന്റാറിയോ സാമ്പത്തിക വികസന മന്ത്രി വിക് ഫെഡെലി ആരോപിച്ചു. ഒന്റാരിയോയിലെ കാർ നിർമ്മാതാക്കളെ സഹായിക്കുന്നതിന് പകരം പരിസ്ഥിതി മാനദണ്ഡങ്ങളോ തൊഴിൽ നിയമങ്ങളോ പാലിക്കാതെ നിർമ്മിക്കുന്ന വിലകുറഞ്ഞ ചൈനീസ് ഇലക്ട്രിക് വാഹനങ്ങൾ ഇറക്കുമതി ചെയ്യുന്നത് പ്രാദേശിക വ്യവസായത്തെ തകർക്കുമെന്ന് അദ്ദേഹം കുറ്റപ്പെടുത്തി.
കാനഡയിലെ ഏറ്റവും പുതിയ വാർത്തകൾക്കായി:
https://chat.whatsapp.com/Ghtm5bIjsVN8SItyDlaj3Q?mode=wwt
Relief for canola farmers: Northern Ontario MP welcomes trade deal with China
