വാൻകൂവർ: വാൻകൂവർ പൊലീസ് ഉദ്യോഗസ്ഥരുടെ മർദനത്തെത്തുടർന്ന് യുവാവ് കൊല്ലപ്പെട്ട കേസിൽ നിർണ്ണായകമായ പൊതുഅന്വേഷണം ഇന്ന് (തിങ്കളാഴ്ച) ആരംഭിക്കുന്നു. 2015-ൽ കൊല്ലപ്പെട്ട മൈൽസ് ഗ്രേയുടെ (33) കുടുംബത്തിന് കേസ് നടത്തുന്നതിനായി സർക്കാർ തലത്തിൽ നിയമസഹായം ഉറപ്പാക്കണമെന്ന് കുടുംബത്തിന്റെ അഭിഭാഷകൻ ഇയാൻ ഡൊണാൾഡ്സൺ ആവശ്യപ്പെട്ടു. കേസിന്റെ വാദം ആരംഭിക്കുന്നതിന് മുന്നോടിയായി മാധ്യമങ്ങളോട് സംസാരിക്കുകയായിരുന്നു അദ്ദേഹം.
ഏഴ് പൊലീസ് ഉദ്യോഗസ്ഥർ പ്രതികളായിട്ടുള്ള കേസിൽ ഇവർക്കും വാൻകൂവർ പൊലീസ് ഡിപ്പാർട്ട്മെന്റിനും (VPD) നിയമോപദേശം തേടുന്നതിനായി വലിയ തോതിൽ സർക്കാർ ഫണ്ട് അനുവദിക്കുന്നുണ്ട്. എന്നാൽ കൊല്ലപ്പെട്ട മൈൽസ് ഗ്രേയുടെ മാതാവ് മാർജി ഗ്രേയ്ക്ക് അത്തരത്തിലുള്ള യാതൊരു സാമ്പത്തിക പിന്തുണയും ലഭിക്കുന്നില്ലെന്ന് ഡൊണാൾഡ്സൺ ചൂണ്ടിക്കാട്ടി. കുടുംബം ദാനധർമ്മങ്ങളെയും സൗജന്യ സേവനങ്ങളെയും ആശ്രയിക്കേണ്ടി വരുന്നത് സംവിധാനത്തിന്റെ പോരായ്മയാണെന്നും അദ്ദേഹം പറഞ്ഞു.
2015 ഓഗസ്റ്റിൽ ബി.സി.യിലെ ബേൺബിയിൽ വച്ചാണ് മൈൽസ് ഗ്രേ കൊല്ലപ്പെടുന്നത്. പൊലീസ് ഉദ്യോഗസ്ഥരുമായുണ്ടായ ഏറ്റുമുട്ടലിനിടയിൽ ഗ്രേയ്ക്ക് ക്രൂരമായ മർദനമേൽക്കുകയും തുടർന്ന് മരണം സംഭവിക്കുകയുമായിരുന്നു. 2023-ൽ നടന്ന കൊറോണർ അന്വേഷണത്തിൽ ഗ്രേയുടെ മരണം ‘ഹോമിസൈഡ്’ അഥവാ കൊലപാതകമാണെന്ന് ജൂറി കണ്ടെത്തിയിരുന്നു. എന്നാൽ പിന്നീട് നടന്ന ബാഹ്യ അന്വേഷണങ്ങളിൽ ഉദ്യോഗസ്ഥർ കുറ്റക്കാരല്ലെന്ന കണ്ടെത്തലുണ്ടായത് വലിയ പ്രതിഷേധങ്ങൾക്ക് വഴിവെച്ചു.
ബ്രിട്ടീഷ് കൊളംബിയ സുപ്രീം കോടതിയിലെ ജഡ്ജി എലിസബത്ത് ആർണോൾഡ്-ബെയ്ലിയാണ് പൊതുവാദം കേൾക്കുന്നത്. പൊലീസ് ഉദ്യോഗസ്ഥർ അനാവശ്യമായി ബലം പ്രയോഗിച്ചിട്ടുണ്ടോ എന്നും രേഖകൾ തയ്യാറാക്കുന്നതിൽ വീഴ്ച വരുത്തിയിട്ടുണ്ടോ എന്നും കോടതി പരിശോധിക്കും. മാർജി ഗ്രേ, പത്തോളജിസ്റ്റ്, പാരാമെഡിക്കൽ ജീവനക്കാർ തുടങ്ങി നിരവധി പേരെ വരും ദിവസങ്ങളിൽ സാക്ഷികളായി വിസ്തരിക്കും. പത്ത് വർഷം നീണ്ട നിയമപോരാട്ടത്തിൽ ഈ അന്വേഷണം നിർണ്ണായകമാകുമെന്നാണ് കുടുംബം പ്രതീക്ഷിക്കുന്നത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Gray's family seeks justice after 10 years; Seven officials named in indictment; Crucial investigation
