വിനിപെഗ്: ആഗോള വിപണിയിൽ സ്വർണവില റെക്കോർഡുകൾ ഭേദിച്ച് മുന്നേറുന്നതോടെ വിനിപെഗിലുള്ള ജ്വല്ലറികളിലും കോയിൻ സെന്ററുകളിലും ഉപഭോക്താക്കളുടെ വൻ തിരക്ക്. കഴിഞ്ഞ ആറുമാസമായി സ്വർണവിലയിൽ വലിയ വർധനവാണ് രേഖപ്പെടുത്തുന്നത്. ഇതോടെ, വില വർധനയുടെ ആനുകൂല്യം മുതലെടുത്ത് കൈവശമുള്ള സ്വർണം വിൽക്കാനും സുരക്ഷിത നിക്ഷേപമെന്ന നിലയിൽ പുതിയത് വാങ്ങാനുമായി എത്തുന്നവരുടെ എണ്ണം മുൻപത്തേക്കാൾ ഇരട്ടിയായി വർധിച്ചു.
കഴിഞ്ഞ ഒക്ടോബറിൽ ട്രോയ് ഔൺസിന് 4,000 ഡോളർ കടന്ന സ്വർണവില നിലവിൽ 4,600 ഡോളറിന് അടുത്താണ്. ജനുവരിയിൽ മാത്രം അഞ്ച് ശതമാനത്തോളം വില വർധിച്ചു. ഇതോടെ വിനിപെഗിലെ ഗോൾഡൻ ഹാൻഡ് ജ്വല്ലറി അടക്കമുള്ള സ്ഥാപനങ്ങളിൽ പഴയ സ്വർണം വിൽക്കാനും പണയം വെക്കാനുമായി എത്തുന്നവരുടെ നീണ്ട നിരയാണ് ദൃശ്യമാകുന്നത്. സ്വർണത്തിന് പുറമെ വെള്ളി നാണയങ്ങൾക്കും ആഭരണങ്ങൾക്കും വിപണിയിൽ ഡിമാൻഡ് വർധിച്ചിട്ടുണ്ട്.
വില കുതിച്ചുയരുന്നത് വ്യാപാരികൾക്കും പുതിയ വെല്ലുവിളികൾ ഉയർത്തുന്നുണ്ട്. സ്റ്റോക്ക് എടുക്കുന്നതിനായുള്ള ചെലവ് വർധിച്ചതോടെ ഉപഭോക്താക്കൾക്ക് താങ്ങാനാവുന്ന വിലയിൽ ഉൽപ്പന്നങ്ങൾ എത്തിക്കാൻ വ്യാപാരികൾ ബദൽ മാർഗങ്ങൾ തേടുകയാണ്. ‘യെല്ലോ സിൽവർ’ ആഭരണങ്ങൾ, പ്രത്യേക ഡിസൈനുകൾ, ക്ലിയറൻസ് സെയിലുകൾ എന്നിവയിലൂടെ വിപണി നിലനിർത്താനാണ് ജ്വല്ലറി ഉടമകൾ ശ്രമിക്കുന്നത്. പലരും പഴയ ആഭരണങ്ങൾ ഉരുക്കി പുതിയവ നിർമ്മിക്കുന്നതിനും താൽപ്പര്യപ്പെടുന്നുണ്ടെന്ന് ഗോൾഡൻ ഹാൻഡ് ജ്വല്ലറി സഹഉടമ പോൾ സൂർലെജ് പറഞ്ഞു.
ആഗോളതലത്തിലെ രാഷ്ട്രീയ പ്രതിസന്ധികളും കറൻസി വിപണിയിലെ ചാഞ്ചാട്ടവുമാണ് സ്വർണവില ഉയരാൻ പ്രധാന കാരണമായി വിദഗ്ധർ ചൂണ്ടിക്കാട്ടുന്നത്. പല രാജ്യങ്ങളും തങ്ങളുടെ പക്കലുള്ള അമേരിക്കൻ ഡോളർ നിക്ഷേപം കുറച്ച്, പകരം സ്വർണം വാങ്ങി സൂക്ഷിക്കാൻ തുടങ്ങിയത് വില ഉയരാൻ കാരണമായിട്ടുണ്ട്. നിക്ഷേപമെന്ന നിലയിൽ സ്വർണം വാങ്ങുന്നവരുടെ എണ്ണത്തിലും വലിയ വർധനവുണ്ടായിട്ടുണ്ടെന്ന് ഗേറ്റ്വെസ്റ്റ് കോയിൻ ലിമിറ്റഡ് വൈസ് പ്രസിഡന്റ് ജാസ്മിൻ അലൻ വ്യക്തമാക്കി. തിരക്ക് വർധിച്ചതിനെ തുടർന്ന് കൂടുതൽ ജീവനക്കാരെ നിയമിച്ചും കമ്പ്യൂട്ടർ സംവിധാനങ്ങൾ പരിഷ്കരിച്ചുമാണ് പല സ്ഥാപനങ്ങളും ഇപ്പോൾ പ്രവർത്തിക്കുന്നത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Record jump in gold prices: Customers flock to jewelry stores in Winnipeg
