കോർണർ ബ്രൂക്ക്: ന്യൂഫൗണ്ട്ലാൻഡ് പ്രവിശ്യയിൽ ഡിസംബർ മാസത്തെ വൈദ്യുതി ബില്ലിലുണ്ടായ അപ്രതീക്ഷിത വർധനവിനെച്ചൊല്ലി ഉപഭോക്താക്കൾക്കിടയിൽ പ്രതിഷേധം പുകയുന്നു. കഴിഞ്ഞ വർഷത്തെ അപേക്ഷിച്ച് വൈദ്യുതി ഉപയോഗം കുറച്ചിട്ടും ബില്ല് തുക കുത്തനെ ഉയർന്നതായാണ് പലരുടെയും പരാതി. നൂറുകണക്കിന് ആളുകളാണ് സാമൂഹിക മാധ്യമങ്ങളിലൂടെ തങ്ങളുടെ പ്രതിഷേധം രേഖപ്പെടുത്തുന്നത്.
കോർണർ ബ്രൂക്ക് നിവാസിയായ സാറാ പാഴ്സൺസ് ഇതിനൊരു ഉദാഹരണമാണ്. കഴിഞ്ഞ വർഷം ഡിസംബറിൽ 640 ഡോളർ ബില്ല് അടച്ചിരുന്ന തനിക്ക് ഇത്തവണ 731 ഡോളറിന്റെ ബില്ലാണ് ലഭിച്ചതെന്ന് അവർ പറയുന്നു. ക്രിസ്മസ് ദീപാലങ്കാരങ്ങൾ ഒഴിവാക്കിയിട്ടും ഗാരേജിലുണ്ടായിരുന്ന രണ്ട് ഫ്രീസറുകൾ മാറ്റിയിട്ടും ബില്ല് തുക ഉയർന്നത് തന്നെ ഞെട്ടിച്ചുവെന്നും സാറാ കൂട്ടിച്ചേർത്തു. സാധാരണക്കാരെയും ഇടത്തരം കുടുംബങ്ങളെയും ഈ വർധനവ് വലിയ സാമ്പത്തിക പ്രതിസന്ധിയിലാക്കിയിരിക്കുകയാണ്.
സംഭവത്തിൽ അസ്വാഭാവികതയുണ്ടെന്ന് പ്രവിശ്യാ കൺസ്യൂമർ അഡ്വക്കേറ്റ് (ഉപഭോക്തൃ വക്താവ്) ഡെന്നിസ് ബ്രൗൺ പ്രതികരിച്ചു. ശൈത്യകാലത്തെ കാലാവസ്ഥാ വ്യതിയാനം കൊണ്ട് മാത്രം വിശദീകരിക്കാൻ കഴിയുന്നതിനേക്കാൾ വലിയ വർധനവാണ് പല ബില്ലുകളിലും കാണുന്നത്. നിലവിൽ ന്യൂഫൗണ്ട്ലാൻഡ് പവർ ഉപയോഗിക്കുന്ന ഓട്ടോമാറ്റിക് മീറ്റർ റീഡിംഗ് സമ്പ്രദായം കാലഹരണപ്പെട്ടതാണെന്നും പകരം സ്മാർട്ട് മീറ്ററുകൾ സ്ഥാപിക്കണമെന്നും അദ്ദേഹം ആവശ്യപ്പെട്ടു.
ഓരോ സമയത്തെയും വൈദ്യുതി ഉപയോഗം കൃത്യമായി നിരീക്ഷിക്കാൻ സ്മാർട്ട് മീറ്ററുകൾ ഉപഭോക്താക്കളെ സഹായിക്കും. എന്നാൽ, നിലവിലെ മീറ്ററുകൾ 99.9 ശതമാനം കൃത്യതയുള്ളതാണെന്നാണ് ന്യൂഫൗണ്ട്ലാൻഡ് പവർ നൽകുന്ന വിശദീകരണം. സാങ്കേതികവും നിയന്ത്രണപരവുമായ കാരണങ്ങളാലാണ് സ്മാർട്ട് മീറ്ററുകളിലേക്ക് മാറാൻ കഴിയാത്തതെന്ന് കമ്പനി വക്താവ് ഗ്ലെൻഡ പവർ അറിയിച്ചു.
ശൈത്യകാലത്ത് താപനില കുറയുന്നതിനാലാണ് ഊർജ്ജ ഉപഭോഗം കൂടുന്നതെന്നും ബില്ലിലെ വ്യതിയാനം കുറയ്ക്കാൻ മാസാവസാനം തുല്യമായ തുക അടയ്ക്കാവുന്ന ‘ഈക്വൽ പേയ്മെന്റ് പ്ലാനിൽ’ അംഗമാകണമെന്നും കമ്പനി നിർദ്ദേശിച്ചു.
ഉപഭോക്താക്കളുടെ പരാതികൾ പരിഹരിക്കാൻ കമ്പനി പ്രത്യേക ഹെൽപ്പ് ലൈൻ ആരംഭിക്കണമെന്നും നിരക്ക് വർധനവിനെക്കുറിച്ച് സ്വതന്ത്രമായ അന്വേഷണം വേണമെന്നും ഡെന്നിസ് ബ്രൗൺ ആവശ്യപ്പെട്ടു.
ഇതുസംബന്ധിച്ച് പബ്ലിക് യൂട്ടിലിറ്റി ബോർഡിന് നൽകിയ കത്തിന് വെള്ളിയാഴ്ചയ്ക്കകം മറുപടി നൽകാൻ അദ്ദേഹം കമ്പനിയോട് ആവശ്യപ്പെട്ടിട്ടുണ്ട്. അന്വേഷണം എത്രയും വേഗം പൂർത്തിയാക്കി ഉപഭോക്താക്കളുടെ ആശങ്കകൾ പരിഹരിക്കുമെന്ന പ്രതീക്ഷയിലാണ് ജനങ്ങൾ.
newfoundland-labrador/newfoundland-power-high-bills
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
