ലോറൻസ് ബിഷ്‌ണോയ് സംഘം ഇന്ത്യക്ക് വേണ്ടി പ്രവർത്തിക്കുന്നു? കനേഡിയൻ പോലീസിന്റെ റിപ്പോർട്ട് ഇങ്ങനെ

ഒട്ടാവ/ന്യൂഡൽഹി: ഇന്ത്യയും കാനഡയും തമ്മിലുള്ള നയതന്ത്ര ബന്ധം സാധാരണ നിലയിലേക്ക് മടങ്ങിവരുന്നതിനിടെ, വീണ്ടും പ്രകോപനപരമായ റിപ്പോർട്ടുമായി കനേഡിയൻ പോലീസ്. ഇന്ത്യയിൽ ജയിലിൽ കഴിയുന്ന ലോറൻസ് ബിഷ്‌ണോയി സംഘം ഇന്ത്യൻ സർക്കാരിന് വേണ്ടിയാണ് കാനഡയിൽ പ്രവർത്തിക്കുന്നതെന്ന് റോയൽ കനേഡിയൻ മൗണ്ടഡ് പോലീസ് (RCMP) ആരോപിച്ചു. വാൻകൂവർ ആസ്ഥാനമായുള്ള കനേഡിയൻ മാധ്യമമാണ് അതീവ രഹസ്യമായ ഈ ഇന്റലിജൻസ് റിപ്പോർട്ട് പുറത്തുവിട്ടത്.

കാനഡയിൽ ഒരു ‘ഭീകര സംഘടന’യായി മുദ്രകുത്തപ്പെട്ട ബിഷ്‌ണോയ് സംഘം, ഇന്ത്യൻ ഗവൺമെന്റുമായി അടുത്ത ബന്ധം പുലർത്തുന്നുണ്ടെന്ന് മൂന്ന് പേജുള്ള ഈ റിപ്പോർട്ടിൽ ആറ് തവണയാണ് ആവർത്തിച്ചു പറയുന്നത്. കൊലപാതകങ്ങൾ, മയക്കുമരുന്ന് കടത്ത്, പണം തട്ടൽ, കള്ളപ്പണം വെളുപ്പിക്കൽ തുടങ്ങിയ ഗുരുതരമായ കുറ്റകൃത്യങ്ങളിൽ ഈ സംഘം ഏർപ്പെടുന്നുണ്ടെന്നും റിപ്പോർട്ട് വ്യക്തമാക്കുന്നു. എന്നാൽ ഇവരുടെ പ്രധാന ലക്ഷ്യം രാഷ്ട്രീയമോ മതപരമോ അല്ലെന്നും മറിച്ച് സാമ്പത്തിക ലാഭം മാത്രമാണെന്നും പോലീസ് പറയുന്നു.

ബ്രിട്ടീഷ് കൊളംബിയ പ്രീമിയർ ഡേവിഡ് എബി വ്യാപാര ചർച്ചകൾക്കായി ഇന്ത്യ സന്ദർശിക്കുന്ന അതേ ദിവസം തന്നെയാണ് ഈ റിപ്പോർട്ട് പുറത്തുവന്നത് എന്നത് ശ്രദ്ധേയമാണ്. പ്രശസ്ത ഹാസ്യനടൻ കപിൽ ശർമ്മയുടെ സറേയിലുള്ള കഫേയ്ക്ക് നേരെയുണ്ടായ ആക്രമണത്തിന് പിന്നിലും ബിഷ്‌ണോയ് സംഘമാണെന്ന് റിപ്പോർട്ട് സൂചിപ്പിക്കുന്നു.

ഇന്ത്യയുടെ നിലപാടും പട്‌നായിക്കിന്റെ മറുപടിയും:

കാനഡ ഉന്നയിക്കുന്ന ആരോപണങ്ങൾ തെളിവുകളുടെ പിൻബലമില്ലാത്തതാണെന്ന് ഇന്ത്യ ആവർത്തിച്ചു വ്യക്തമാക്കി. കാനഡയിലെ ഇന്ത്യൻ ഹൈക്കമ്മീഷണർ ദിനേഷ് പട്‌നായിക് ഇതിനെതിരെ ശക്തമായി പ്രതികരിച്ചു. “ആരോപണങ്ങൾ ഉന്നയിക്കാൻ എളുപ്പമാണ്. കഴിഞ്ഞ 40 വർഷമായി കാനഡയിലെ ഭീകരവാദത്തെക്കുറിച്ച് ഇന്ത്യ സംസാരിക്കുന്നു, പക്ഷേ ഇതുവരെ ആരെങ്കിലും ശിക്ഷിക്കപ്പെട്ടോ?” എന്ന് അദ്ദേഹം ചോദിച്ചു.

കാനഡയിലെ സുരക്ഷാ വീഴ്ചകളെ മറച്ചുവെക്കാൻ ഇന്ത്യൻ സർക്കാരിനെ പ്രതിക്കൂട്ടിലാക്കാനാണ് ഒട്ടാവ ശ്രമിക്കുന്നതെന്ന സൂചനയാണ് ഇന്ത്യ നൽകുന്നത്. ബിഷ്‌ണോയ് സംഘത്തെപ്പോലുള്ള ക്രിമിനൽ ശക്തികൾ എങ്ങനെ കാനഡയിൽ വേരുറപ്പിച്ചു എന്നതിനും എന്തുകൊണ്ട് അവർക്കെതിരെ നേരത്തെ നടപടിയെടുത്തില്ല എന്നതിനും കാനഡയ്ക്ക് മറുപടിയില്ല. പത്ത് മാസത്തെ ഇടവേളയ്ക്ക് ശേഷം ഇരുരാജ്യങ്ങളും അംബാസഡർമാരെ നിയമിച്ചുകൊണ്ട് ബന്ധം പുതുക്കാൻ ശ്രമിക്കുന്നതിനിടെ പുറത്തുവന്ന ഈ റിപ്പോർട്ട്, വരും ദിവസങ്ങളിൽ വീണ്ടും വലിയ തർക്കങ്ങൾക്ക് വഴിമാറാൻ സാധ്യതയുണ്ട്.

Canadian police link Bishnoi gang’s activities in Canada to Indian govt