ന്യൂഡൽഹി: ആഗോള പാസ്പോർട്ട് കരുത്ത് അളക്കുന്ന ഹെൻലി പാസ്പോർട്ട് സൂചികയുടെ റാങ്കിങ്ങിൽ ശ്രദ്ധേയമായ പുരോഗതി കൈവരിച്ച് ഇന്ത്യ. 2026-ലെ പുതിയ പട്ടിക പ്രകാരം ഇന്ത്യ 80-ാം സ്ഥാനമാണ് കരസ്ഥമാക്കിയത്. കഴിഞ്ഞ വർഷം 85-ാം സ്ഥാനത്തായിരുന്ന ഇന്ത്യ, അഞ്ച് സ്ഥാനങ്ങൾ മെച്ചപ്പെടുത്തിയാണ് ഈ നേട്ടം കൈവരിച്ചത്. ഇതോടെ ഇന്ത്യൻ പാസ്പോർട്ട് കൈവശമുള്ളവർക്ക് മുൻകൂട്ടി വിസ എടുക്കാതെ തന്നെ ലോകത്തെ 55 രാജ്യങ്ങളിലേക്ക് യാത്ര ചെയ്യാം. വിസയില്ലാതെ നേരിട്ടോ അല്ലെങ്കിൽ അവിടെ എത്തുമ്പോൾ ലഭിക്കുന്ന വിസ (Visa on Arrival) ഉപയോഗിച്ചോ ഈ രാജ്യങ്ങളിലേക്ക് പ്രവേശിക്കാം.
നൈജർ, അൾജീരിയ എന്നീ രാജ്യങ്ങൾക്കൊപ്പമാണ് ഇന്ത്യ 80-ാം സ്ഥാനം പങ്കിടുന്നത്. തായ്ലൻഡ്, മലേഷ്യ, മൗറീഷ്യസ് തുടങ്ങി വിനോദസഞ്ചാരത്തിന് പ്രാധാന്യമുള്ള രാജ്യങ്ങളുൾപ്പെടെയുള്ള 55 ഇടങ്ങളിലേക്കാണ് ഇന്ത്യൻ പൗരന്മാർക്ക് വിസ രഹിത പ്രവേശനം അല്ലെങ്കിൽ വിസ ഓൺ അറൈവൽ സൗകര്യം ലഭ്യമാകുന്നത്. 2024-ൽ ഇന്ത്യ 80-ാം സ്ഥാനത്തായിരുന്നെങ്കിലും കഴിഞ്ഞ വർഷം അഞ്ച് സ്ഥാനങ്ങൾ പിന്നോട്ട് പോയിരുന്നു. ഈ വർഷം ആ സ്ഥാനം തിരിച്ചുപിടിക്കാൻ ഇന്ത്യക്കായി.
ആഗോള റാങ്കിംഗിൽ ഏഷ്യൻ രാജ്യങ്ങൾ തങ്ങളുടെ കരുത്ത് വീണ്ടും തെളിയിച്ചു. 192 രാജ്യങ്ങളിലേക്ക് വിസ രഹിത പ്രവേശനം ഉറപ്പാക്കി സിംഗപ്പൂർ പട്ടികയിൽ ഒന്നാം സ്ഥാനം നിലനിർത്തി. ജപ്പാൻ, ദക്ഷിണ കൊറിയ എന്നീ രാജ്യങ്ങളാണ് രണ്ടാം സ്ഥാനത്തുള്ളത്. മൂന്നാം സ്ഥാനം ഡെൻമാർക്ക്, സ്വിറ്റ്സർലൻഡ്, സ്വീഡൻ, സ്പെയിൻ, ലക്സംബർഗ് എന്നീ യൂറോപ്യൻ രാജ്യങ്ങൾ പങ്കിട്ടു. അതേസമയം, കഴിഞ്ഞ 20 വർഷത്തിനിടയിലെ ഏറ്റവും വലിയ കുതിച്ചുചാട്ടം നടത്തി യുഎഇ അഞ്ചാം സ്ഥാനത്തെത്തിയത് ശ്രദ്ധേയമായ നേട്ടമായി.
ഇന്റർനാഷണൽ എയർ ട്രാൻസ്പോർട്ട് അസോസിയേഷന്റെ (IATA) ഔദ്യോഗിക വിവരങ്ങൾ അടിസ്ഥാനമാക്കി 199 പാസ്പോർട്ടുകളും 227 യാത്രാ കേന്ദ്രങ്ങളും വിശകലനം ചെയ്താണ് ഹെൻലി ആൻഡ് പാർട്ണേഴ്സ് പട്ടിക തയ്യാറാക്കിയത്. പട്ടികയിൽ അയൽരാജ്യമായ പാകിസ്ഥാൻ 98-ാം സ്ഥാനത്തും അഫ്ഗാനിസ്ഥാൻ ഏറ്റവും പിന്നിലായി 101-ാം സ്ഥാനത്തുമാണ്. കഴിഞ്ഞ വർഷം പന്ത്രണ്ടാം സ്ഥാനത്തേക്ക് പിന്തള്ളപ്പെട്ട അമേരിക്ക, ഇത്തവണ ആദ്യ പത്തിൽ തിരിച്ചെത്തി കരുത്തു തെളിയിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
India advances in Global Passport Index; rises five places to 80th rank
