പാലക്കാട് : ബലാത്സംഗക്കേസിൽ അറസ്റ്റിലായ രാഹുൽ മാങ്കൂട്ടത്തിൽ എം.എൽ.എയുടെ മൊബൈൽ ഫോൺ പോലീസ് കണ്ടെടുത്തു. പാലക്കാട്ടെ കെ.പി.എം ഹോട്ടലിൽ നടത്തിയ പരിശോധനയിലാണ് ഫോൺ കണ്ടെത്തിയത്. എന്നാൽ, കേസിൽ നിർണായകമെന്ന് കരുതുന്ന ലാപ്ടോപ് എവിടെയാണെന്ന് വെളിപ്പെടുത്താൻ രാഹുൽ ഇതുവരെ തയ്യാറായിട്ടില്ല. ലാപ്ടോപ് സംബന്ധിച്ച വിവരം ലഭിച്ച ശേഷം മാത്രമേ ഇയാളെ പാലക്കാട് എത്തിച്ച് തെളിവെടുപ്പ് നടത്തൂ എന്ന നിലപാടിലാണ് അന്വേഷണ സംഘം.
യുവതിയുടെ പരാതിയിൽ പരാമർശിക്കുന്ന ഹോട്ടലിലും പാലക്കാട്ടെ മറ്റ് പ്രധാന കേന്ദ്രങ്ങളിലും എത്തിച്ച് തെളിവെടുപ്പ് നടത്താനാണ് പ്രത്യേക അന്വേഷണ സംഘം (SIT) ലക്ഷ്യമിടുന്നത്. ഇതിന് മുന്നോടിയായി രാഹുൽ വാങ്ങാൻ ഉദ്ദേശിച്ച ഫ്ലാറ്റിന്റെ ബിൽഡറുടെ മൊഴിയും പോലീസ് രേഖപ്പെടുത്തും. നിലവിൽ കണ്ടെടുത്ത മൊബൈൽ ഫോണിലെ കോൾ വിവരങ്ങൾ, സന്ദേശങ്ങൾ, ലൊക്കേഷൻ എന്നിവ ശാസ്ത്രീയ പരിശോധനയ്ക്ക് വിധേയമാക്കുകയാണ്. ഡിജിറ്റൽ തെളിവുകൾ ശേഖരിക്കുന്നതിലൂടെ കേസിൽ കൂടുതൽ വ്യക്തത വരുമെന്നാണ് പോലീസ് പ്രതീക്ഷിക്കുന്നത്.
തിരുവല്ല ജുഡീഷ്യൽ ഫസ്റ്റ് ക്ലാസ് മജിസ്ട്രേറ്റ് കോടതി രാഹുലിനെ മൂന്ന് ദിവസത്തെ പോലീസ് കസ്റ്റഡിയിൽ വിട്ടിരിക്കുകയാണ്. ഏഴ് ദിവസത്തെ കസ്റ്റഡി പോലീസ് ആവശ്യപ്പെട്ടെങ്കിലും വ്യാഴാഴ്ച വൈകുന്നേരം അഞ്ച് മണി വരെയാണ് കോടതി സമയം അനുവദിച്ചത്. കസ്റ്റഡി കാലാവധി പൂർത്തിയാകുന്ന മുറയ്ക്ക് ജനുവരി 16-ന് കോടതി ജാമ്യാപേക്ഷയിൽ വിശദമായ വാദം കേൾക്കും.
അതേസമയം, രാഹുൽ മാങ്കൂട്ടത്തിൽ എം.എൽ.എ സ്ഥാനം രാജിവെക്കണമെന്ന് ആവശ്യപ്പെട്ട് യുവജന സംഘടനകൾ പ്രതിഷേധം ശക്തമാക്കിയിട്ടുണ്ട്. കഴിഞ്ഞ ദിവസങ്ങളിൽ കോടതി പരിസരത്തും കനത്ത പ്രതിഷേധം അരങ്ങേറിയിരുന്നു. മൂന്നാം ബലാത്സംഗക്കേസിൽ റിമാൻഡിൽ കഴിയുന്ന സാഹചര്യത്തിൽ രാഹുലിനെതിരെ രാഷ്ട്രീയ സമ്മർദ്ദവും വർധിക്കുകയാണ്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Rahul Mangkootathil without revealing laptop; phone recovered, investigation team looking for digital evidence
