ന്യൂഫൗണ്ട്‌ലാന്റിനെ വിറപ്പിച്ച് ഇൻഫ്ലുവൻസ; രണ്ട് മരണം; കുട്ടികളിൽ രോഗം കഠിനമെന്ന് മുന്നറിയിപ്പ്

സെന്റ് ജോൺസ്: ന്യൂഫൗണ്ട്‌ലാന്റ് ആൻഡ് ലാബ്രഡോർ പ്രവിശ്യയിൽ ഇൻഫ്ലുവൻസ (പനി) ബാധിച്ച് രണ്ട് പേർ മരിച്ചു. പ്രവിശ്യയിലെ ഔദ്യോഗിക ഹെൽത്ത് ഡാറ്റാ ഹബ്ബ് ഈ വിവരം പുറത്തുവിട്ടത്. 2025-ന്റെ അവസാനത്തിലാണ് ഈ മരണങ്ങൾ സംഭവിച്ചത്. രോഗബാധിതരുടെ എണ്ണത്തിൽ ഡിസംബർ പകുതിയോടെ വലിയ വർധനവുണ്ടായതായും റിപ്പോർട്ടുകൾ സൂചിപ്പിക്കുന്നു. മരണപ്പെട്ടവരുടെ കൂടുതൽ വിവരങ്ങൾ ആരോഗ്യവകുപ്പ് പുറത്തുവിട്ടിട്ടില്ല.

ഈ വർഷം പടരുന്ന പനിയിൽ മുൻവർഷങ്ങളെ അപേക്ഷിച്ച് പ്രകടമായ മാറ്റങ്ങളുണ്ടെന്ന് ആരോഗ്യവകുപ്പ് ഉദ്യോഗസ്ഥനായ ഡോ. മാർക്ക് മക്കെൽവി പറഞ്ഞു. ‘എച്ച്3എൻ2’ (H3N2) വിഭാഗത്തിൽപ്പെട്ട വൈറസാണ് നിലവിൽ പടരുന്നത്. ഇതിൽ തന്നെ ‘സബ്ക്ലേഡ് കെ’ (Subclade K) എന്ന പുതിയ വകഭേദത്തിന്റെ സാന്നിധ്യമാണ് ആരോഗ്യ വിദഗ്ധരെ ആശങ്കയിലാക്കുന്നത്. മുൻപ് കണ്ടിട്ടില്ലാത്ത ഈ വകഭേദം കൂടുതൽ തീവ്രമായ ലക്ഷണങ്ങൾ പ്രകടിപ്പിക്കുന്നതായാണ് പ്രാഥമിക കണ്ടെത്തൽ.

സാധാരണ പനി ലക്ഷണങ്ങളായ ചുമ, ജലദോഷം, ശരീരവേദന, തളർച്ച എന്നിവയ്‌ക്കൊപ്പം പുതിയ വകഭേദം ബാധിച്ചവരിൽ വയറിളക്കം, വയറുവേദന തുടങ്ങിയ അസ്വസ്ഥതകളും കണ്ടുവരുന്നുണ്ട്. പ്രത്യേകിച്ച് കുട്ടികളിൽ അഞ്ച് മുതൽ ഏഴ് ദിവസം വരെ നീണ്ടുനിൽക്കുന്ന കഠിനമായ പനി റിപ്പോർട്ട് ചെയ്യപ്പെടുന്നുണ്ട്. അമേരിക്കയുൾപ്പെടെയുള്ള മറ്റ് രാജ്യങ്ങളിലും സമാനമായ രീതിയിൽ ഈ വകഭേദം ബാധിച്ച കുട്ടികൾ ഗുരുതരാവസ്ഥയിലാകുന്നതായി ഡോക്ടർമാർ ചൂണ്ടിക്കാട്ടുന്നു.

മുൻ വർഷങ്ങളേക്കാൾ നേരത്തെ തന്നെ രോഗബാധിതരുടെ എണ്ണം വർധിക്കുന്നത് ആരോഗ്യരംഗത്ത് വെല്ലുവിളിയുയർത്തുന്നുണ്ട്. നിലവിൽ ആശുപത്രികളിൽ പ്രവേശിപ്പിക്കപ്പെടുന്നവരുടെ എണ്ണം മുൻകാല റെക്കോർഡുകൾ ഭേദിച്ചിട്ടില്ലെങ്കിലും, സീസണിന്റെ പ്രാരംഭ ഘട്ടത്തിൽ തന്നെയുള്ള ഈ വർധനവിനെ ജാഗ്രതയോടെയാണ് അധികൃതർ കാണുന്നത്. സാധാരണ ജലദോഷത്തേക്കാൾ (Common Cold) തീവ്രമാണ് ഇൻഫ്ലുവൻസ പനിയെന്നും ഇത് മരണത്തിന് വരെ കാരണമാകാമെന്നും അധികൃതർ ഓർമ്മിപ്പിച്ചു.

രോഗവ്യാപനം തടയുന്നതിനായി എല്ലാവരും പ്രതിരോധ കുത്തിവെപ്പ് (Vaccination) എടുക്കണമെന്ന് ആരോഗ്യവകുപ്പ് നിർദ്ദേശിച്ചു. ആറ് മാസം പ്രായമുള്ള കുട്ടികൾ മുതൽ എല്ലാവർക്കും സൗജന്യമായി വാക്സിൻ ലഭ്യമാണ്. രോഗലക്ഷണങ്ങൾ ഉള്ളവർ നിർബന്ധമായും വീട്ടിൽ തന്നെ കഴിയണമെന്നും മറ്റുള്ളവരുമായി സമ്പർക്കം ഒഴിവാക്കണമെന്നും നിർദ്ദേശമുണ്ട്. ആശുപത്രികളിൽ അനാവശ്യമായ തിരക്ക് ഒഴിവാക്കണമെന്നും ദുർബലരായ മറ്റ് രോഗികളിലേക്ക് പനി പടരാതിരിക്കാൻ ശ്രദ്ധിക്കണമെന്നും ഡോ. മക്കെൽവി ആവശ്യപ്പെട്ടു.

newfoundland-labrador/influenza-nl-deaths

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt