ഒട്ടാവ: കാനഡയിലെ എട്ട് പ്രധാന നഗരങ്ങളിൽ കുറഞ്ഞ വേതന വിഭാഗത്തിലുള്ള വിദേശ തൊഴിലാളികളെ നിയമിക്കുന്നതിനുള്ള നിയന്ത്രണങ്ങളിൽ ഫെഡറൽ ഗവൺമെന്റ് ഇളവ് വരുത്തി. ജനുവരി 9 മുതൽ ഈ മേഖലകളിൽ ‘ലോ-വേജ് ലേബർ മാർക്കറ്റ് ഇംപാക്ട് അസസ്മെന്റ്’ (LMIA) അപേക്ഷകൾ പ്രോസസ്സ് ചെയ്തു തുടങ്ങുമെന്ന് ഫെഡറൽ ഗവൺമെന്റ് അറിയിച്ചു. തൊഴിലില്ലായ്മ നിരക്ക് 6 ശതമാനത്തിൽ താഴെയായ സാഹചര്യത്തിലാണ് ഈ തീരുമാനം.
വാൻകൂവർ, വിന്നിപെഗ്, കിങ്സ്റ്റൺ, മോൺട്രിയൽ, ഹാലിഫാക്സ്, മോങ്ക്ടൺ, സെന്റ് ജോൺ, ഫ്രെഡറിക്ടൺ എന്നീ എട്ട് മേഖലകളാണ് പുതിയ പട്ടികയിൽ ഉൾപ്പെട്ടിരിക്കുന്നത്. 2025-ന്റെ അവസാന പാദത്തിൽ ഈ നഗരങ്ങളിൽ കുറഞ്ഞ വേതന ജോലികൾക്കുള്ള എൽ.എം.ഐ.എ അപേക്ഷകൾ സ്വീകരിക്കുന്നത് നിർത്തിവെച്ചിരുന്നു. എന്നാൽ ജനുവരി 8-ലെ പുതിയ കണക്കുകൾ പ്രകാരം വാൻകൂവറിൽ 5.9 ശതമാനവും വിന്നിപെഗിൽ 5.7 ശതമാനവുമായാണ് തൊഴിലില്ലായ്മ നിരക്ക് കുറഞ്ഞത്.
തദ്ദേശീയരായ ഉദ്യോഗാർത്ഥികൾക്ക് മുൻഗണന നൽകുന്നതിന്റെ ഭാഗമായി, തൊഴിലില്ലായ്മ നിരക്ക് 6 ശതമാനമോ അതിൽ കൂടുതലോ ഉള്ള പ്രദേശങ്ങളിൽ കുറഞ്ഞ വേതന എൽ.എം.ഐ.എകൾ പ്രോസസ്സ് ചെയ്യില്ലെന്ന് 2024 ഓഗസ്റ്റിൽ സർക്കാർ പ്രഖ്യാപിച്ചിരുന്നു. തൊഴിലുടമയ്ക്ക് അനുകൂലമായ എൽ.എം.ഐ.എ ലഭിക്കാതെ വിദേശികൾക്ക് താൽക്കാലിക വിദേശ തൊഴിലാളി പ്രോഗ്രാം (TFWP) വഴി വർക്ക് പെർമിറ്റ് പുതുക്കാനോ പുതിയതിന് അപേക്ഷിക്കാനോ സാധിക്കില്ല.
ഒരു പ്രദേശത്തെ ശരാശരി വേതനത്തിന്റെ (Median Wage) 120 ശതമാനത്തിൽ താഴെ ശമ്പളം ലഭിക്കുന്ന തസ്തികകളെയാണ് ‘ലോ-വേജ്’ വിഭാഗത്തിൽ ഉൾപ്പെടുത്തുന്നത്. നിലവിൽ നിയന്ത്രണമുള്ള മേഖലകളിലെ തൊഴിലുടമകൾക്ക് ശമ്പളം വർദ്ധിപ്പിച്ച് തസ്തികകളെ ‘ഹൈ-വേജ്’ വിഭാഗത്തിലേക്ക് മാറ്റാൻ സാധിക്കും. അതേസമയം കാർഷിക മേഖല, നിർമ്മാണം, ആരോഗ്യരംഗം, ഭക്ഷ്യ സംസ്കരണം എന്നീ വിഭാഗങ്ങളിലെ തസ്തികകൾക്ക് ഈ നിയന്ത്രണങ്ങളിൽ നിന്ന് ഇളവ് അനുവദിച്ചിട്ടുണ്ട്.
പുതിയ മാറ്റം നിലവിൽ വന്നതോടെ ഈ എട്ട് നഗരങ്ങളിൽ കുറഞ്ഞ വേതന ജോലികൾക്കായി കാത്തിരിക്കുന്ന വിദേശികൾക്കും തൊഴിലുടമകൾക്കും വലിയ ആശ്വാസമാകും. ഏപ്രിൽ 10-ന് പുറത്തിറക്കുന്ന അടുത്ത പാദവാർഷിക പട്ടികയിലായിരിക്കും ഇനി പുതിയ മാറ്റങ്ങൾ ഉണ്ടാവുക. തൊഴിൽ ലഭിക്കുന്ന സ്ഥലത്തെ തപാൽ കോഡ് (Postal Code) പരിശോധിച്ച് ഓരോ നഗരവും ഏത് വിഭാഗത്തിലാണ് ഉൾപ്പെടുന്നതെന്ന് വരും ദിവസങ്ങളിൽ ഉദ്യോഗാർത്ഥികൾക്ക് കൃത്യമായി മനസ്സിലാക്കാം.
ഒരു അംഗീകൃത ഇമിഗ്രേഷൻ കൺസൽട്ടന്റിന്റെ സേവനങ്ങൾക്ക് ബന്ധപ്പെടാം: +1 (289) 690-8119 ( eHouse Immigrations Services Ltd) (https://ehouseimmigration.ca/)
canada-to-start-processing-low-wage-lmias-in-eight-more-regions-in
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
