ഓഫീസുകൾ ഇനി അപ്പാർട്ട്‌മെന്റുകൾ; ഭവനപ്രതിസന്ധി പരിഹരിക്കാൻ പുത്തൻ ചുവടുവെപ്പുമായി മോൺട്രിയൽ

മോൺട്രിയൽ : നഗരത്തിലെ രൂക്ഷമായ ഭവനപ്രതിസന്ധിക്ക് പരിഹാരം കാണുന്നതിനായി ഒഴിഞ്ഞുകിടക്കുന്ന വാണിജ്യ കെട്ടിടങ്ങളെ താമസസൗകര്യങ്ങളാക്കി മാറ്റാൻ പ്രമുഖ റിയൽ എസ്റ്റേറ്റ് കമ്പനികൾ ഒരുങ്ങുന്നു. കോവിഡ് മഹാമാരിക്ക് ശേഷം ജോലി സംസ്കാരത്തിൽ വന്ന മാറ്റങ്ങളെത്തുടർന്ന് മോൺട്രിയലിലെ ഓഫീസ് കെട്ടിടങ്ങളിൽ വലിയൊരു ഭാഗം ഒഴിഞ്ഞുകിടക്കുന്ന സാഹചര്യത്തിലാണ് ഈ നീക്കം. പ്രമുഖ റിയൽ എസ്റ്റേറ്റ് ഗ്രൂപ്പായ ‘ഗ്രൂപ്പ് മാച്ച്’ (Groupe Mach) ആണ് ഈ മാറ്റത്തിന് മുൻകൈ എടുത്തിരിക്കുന്നത്.

പോയിന്റ്-സെന്റ്-ചാൾസിലെ ലാഷിൻ കനാലിന് സമീപമുള്ള ഓഫീസ് കെട്ടിടമാണ് ഇപ്പോൾ ആധുനിക അപ്പാർട്ട്‌മെന്റുകളായി മാറുന്നത്. 2019-ൽ നിർമിച്ച ഈ കെട്ടിടം പ്രമുഖ കമ്പനിയായ എയർബിഎൻബിയുടെ (Airbnb) ആസ്ഥാനമായി പ്രവർത്തിക്കാനാണ് ലക്ഷ്യമിട്ടിരുന്നത്. എന്നാൽ ജീവനക്കാർക്ക് വീട്ടിലിരുന്ന് ജോലി ചെയ്യാൻ കമ്പനി അനുമതി നൽകിയതോടെ കെട്ടിടം ഉപയോഗശൂന്യമായി തുടരുകയായിരുന്നു. ഈ സാഹചര്യത്തിലാണ് ഒഴിഞ്ഞുകിടക്കുന്ന ഓഫീസ് മുറികൾ ഏകദേശം 200 വസതിയൂണിറ്റുകളാക്കി മാറ്റാൻ ഗ്രൂപ്പ് മാച്ച് തീരുമാനിച്ചത്.

പുതിയ കെട്ടിടമായതിനാൽ അടിത്തറ നിർമാണമോ മറ്റ് പ്രധാന പണികളോ വീണ്ടും ആവശ്യമായി വന്നില്ലെന്ന് ഗ്രൂപ്പ് മാച്ച് പ്രസിഡന്റ് വിൻസെന്റ് കിയാര പറഞ്ഞു. സ്റ്റുഡിയോ അപ്പാർട്ട്‌മെന്റുകൾ മുതൽ മൂന്ന് ബെഡ്റൂം സൗകര്യമുള്ള വീടുകൾ വരെ ഇവിടെ ലഭ്യമാകും. 1,500 ഡോളർ മുതൽ 3,500 ഡോളർ വരെയാണ് മാസവാടക പ്രതീക്ഷിക്കുന്നത്. ഈ വർഷം അവസാനത്തോടെ താമസക്കാർക്ക് ഇവിടെ പ്രവേശിക്കാനാകുമെന്ന് അധികൃതർ വ്യക്തമാക്കി.

നിലവിൽ മോൺട്രിയൽ നഗരമധ്യത്തിലെ ഓഫീസ് കെട്ടിടങ്ങളുടെ മൂല്യത്തിൽ 8.2 ശതമാനത്തിന്റെ കുറവുണ്ടായിട്ടുണ്ട്. ഏകദേശം 20 ശതമാനത്തോളം ഓഫീസുകൾ ഇപ്പോൾ ഒഴിഞ്ഞുകിടക്കുകയാണ്. സർക്കാർ ജീവനക്കാർ ആഴ്ചയിൽ മൂന്ന് ദിവസമെങ്കിലും ഓഫീസിൽ എത്തണമെന്ന് ക്യുബെക് സർക്കാർ നിർദ്ദേശിച്ചിട്ടുണ്ടെങ്കിലും, പഴയ രീതിയിലുള്ള ഓഫീസ് തിരക്ക് ഇനിയും മടങ്ങിവന്നിട്ടില്ല. ഈ പശ്ചാത്തലത്തിൽ വാണിജ്യ കെട്ടിടങ്ങളെ പാർപ്പിടങ്ങളാക്കി മാറ്റുന്നത് സാമ്പത്തികമായും പ്രായോഗികമായും ഗുണകരമാകുമെന്നാണ് വിലയിരുത്തൽ.

എല്ലാ ഓഫീസ് കെട്ടിടങ്ങളും ഇത്തരത്തിൽ മാറ്റാൻ കഴിയില്ലെന്നും വിൻസെന്റ് കിയാര ചൂണ്ടിക്കാട്ടി. പഴയ കെട്ടിടങ്ങളുടെ ഘടന പാർപ്പിടങ്ങൾക്ക് അനുയോജ്യമല്ലെങ്കിൽ അവ പൊളിച്ച് നീക്കി പരിസ്ഥിതി സൗഹൃദമായ പുതിയ കെട്ടിടങ്ങൾ നിർമ്മിക്കുന്നതാകും ഉചിതം. ഇത്തരം പദ്ധതികൾ നഗരത്തിലെ ഭവനപ്രതിസന്ധി പൂർണ്ണമായി പരിഹരിക്കില്ലെങ്കിലും, വീടുകളുടെ എണ്ണം കൂടുന്നത് വാടക നിരക്ക് കുറയാനും നഗരമധ്യത്തിലേക്ക് കൂടുതൽ ആളുകൾക്ക് താമസം മാറാനും സഹായിക്കുമെന്ന് അദ്ദേഹം കൂട്ടിച്ചേർത്തു.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt

Offices now apartments; Montreal takes new step to solve housing crisis